ରେଙ୍ଗାଲିକ୍ୟାମ୍ପ: ଆଜି ଅତାବିରା ‘ଜୟ କିସାନ ଆନ୍ଦୋଳନ’ ଅତାବିରା ବ୍ଲକ ଶାଖା ପକ୍ଷରୁ ବ୍ଲକ ସମ୍ପାଦକ ଜିତୁ ବେହେରାଙ୍କ ନେତୃତ୍ୱରେ ବିଭିନ୍ନ ଦାବି ନେଇ ତହସିଲ କାର୍ଯ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରି ଚାଷୀଙ୍କ ହକ ପାଇଁ ସ୍ୱର ଉତ୍ତୋଳନ କରାଯାଇଥିଲା। ଏହାସହ ତହସିଲ କାର୍ଯ୍ୟାଳୟର ମୁଖ୍ୟ କିରାଣୀ କୁବେର ମାଝୀଙ୍କ (ତହସିଲଦାରଙ୍କ ଅନୁପସ୍ଥିତରେ) ଜରିଆରେ ମୁଖ୍ୟ ନ୍ତ୍ରୀଙ୍କ ନିକଟକୁ ପାଞ୍ଚ ଦଫା ଦାବି ନେଇ ଏକ ଦାବିପତ୍ର ପ୍ରଦାନ କରିଥିଲେ ।
ଅତାବିରା ଆରଏମସି ମାର୍କେଟରୁ ପ୍ରଥମେ ଏକ ଶୋଭାଯାତ୍ରା ବାହାରି ବସଷ୍ଟାଣ୍ଡ ଛକ ଦେଇ ତହସିଲ କାର୍ଯ୍ୟଳୟରେ ପହଞ୍ଚିବା ପରେ ଶ୍ରୀ ବେହେରାଙ୍କ ସଭାପତିତ୍ବରେ ଏକ ସାଧାରଣ ସଭା ଅନୁଷ୍ଠିତ ହୋଇଥିଲା। ଏଥିରେ ରାଷ୍ଟ୍ରୀୟ ଜୟକିସାନ ଆନ୍ଦୋଳନର ନେତା ଲିଙ୍ଗରାଜ, ଜିଲା ସଭାପତି ସୁଶିଲ ସାହୁ, ଜିଲା ସମ୍ପାଦକ ହର ବଣିଆ , ବ୍ଲକ ସଭାପତି ରଞ୍ଜନ ବାରିକ୍ ପ୍ରମୁଖଙ୍କ ସହ ଶତାଧିକ ଚାଷୀ ଉପସ୍ଥିତ ରହିଥିଲେ ।
କୃଷି କ୍ଷେତ୍ର ରେ ବ୍ୟବହୃତ ବିଜୁଳି ବିଲ ସମ୍ପୂର୍ଣ୍ଣ ଛାଡ,ଘରୋଇ ବିଜୁଳି ବିଲ ୩୦୦ ୟୁନିଟ ପର୍ୟ୍ୟନ୍ତ ବିଲ ଛାଡ, ଧାନର ସର୍ବ ନିମ୍ନ ସହାୟକ ଦର ଉପରେ ରକ୍ଷଜ୍ୟ ସରକାର ଅନ୍ୟୁନ୧୦୦୦ ଟଙ୍କା ବୋନସ ପ୍ରଦାନ, ଏମଏସପିକୁ ଆଇନର ମାନ୍ୟତା ପ୍ରଦାନ ତଥା କୃଷି ଋଣ ସମ୍ପୂର୍ଣ ଛାଡ କରିବା ଆଦି ୫ ଦଫା ଦାବି ଉଲ୍ଲେଖ ରହିଥିଲା ଦାବିପତ୍ରରେ।
ରାଜ୍ୟ ସରକାର କୃଷକ ମାନଙ୍କୁ ବୋନସ ଦେବା ତା ଦୂର ର କଥା ମଣ୍ଡି ବ୍ୟବସ୍ଥାକୁ ମଧ୍ୟ ଠିକ୍ କରିପାରୁ ନାହାନ୍ତି। ତେଣୁ ଆଜି ସଂକଳ୍ପ ନେଇଛନ୍ତି ଚାଷୀ ମାନେ ନିଜର ହକ ପାଇଁ ସରକାରଙ୍କ ବିରୁଦ୍ଧରେ ଶାଣିତ ସ୍ୱର ଉତ୍ତୋଳନ କରିବେ। ଦାବି ହାସଲ ନ ହେଲେ ଆସନ୍ତା ସାଧାରଣ ନିର୍ବାଚନ ପ୍ରକ୍ରିୟାରେ ସେମାନେ ବିଭିନ୍ନ ରାଜନୈତିକ ଦଳ ମାନଙ୍କ ଉପରେ ଚାପ ସୃଷ୍ଟି କରିବେ ବୋଲି ଚେତାବନୀ ଦେଇଛନ୍ତି।
Comments are closed.