ଅବକାରୀ ବିଭାଗର ଚଢ଼ାଉ: ୪୦ ଡିସମିଲ ଜମିରେ ୧୦ ହଜାର ଅଫିମ ଚାଷ ନଷ୍ଟ, ଅନୁମାନିକ ମୂଲ୍ୟ ଏକ କୋଟି

ରେଢ଼ାଖୋଲ: ସମ୍ବଲପୁର ଜିଲା ରେଢ଼ାଖୋଲ ଥାନା ନକାଟିଦେଉଳ ବ୍ଲକ ଗୋପାଳପୁର ଗ୍ରାମରେ ବେଆଇନ ଅଫିମ ଚାଷ କରାଯାଇଥିଲା। ଖବର ପାଇ ସମ୍ବଲପୁର ଅବକାରୀ ବିଭାଗ ଗୋପାଳପୁର ଗ୍ରାମରେ ପହଞ୍ଚି ଥିଲା। ସେଠାରେ ସମ୍ବଲପୁର ଅବକାରୀ ବିଭାଗ ପକ୍ଷରୁ ଚଢ଼ାଉ କରାଯାଇ ବିପୁଳ ପରିମାଣରେ ଚାଷ ହୋଇଥିବା ଅଫିମ ଗଛ ନଷ୍ଟ କରାଯାଇଥିଲା। ଏଥିରେ ସମ୍ପୃକ୍ତ ଥିବା ୨ଜଣ ବ୍ୟକ୍ତିଙ୍କୁ ଅବକାରୀ ବିଭାଗ ପକ୍ଷରୁ ଅଟକ ରଖାଯାଇଥିବା ସୂଚନା ମିଳିଛି।

ରେଢ଼ାଖୋଲ ଥାନା ଅନ୍ତର୍ଗତ ଗୋପାଳପୁର ଗ୍ରାମରେ ବିପୁଳ ପରିମାଣର ବେଆଇନ ଅଫିମ ଚାଷ ଗଛ ଠାବ କରାଯାଇଥିଲା। ଅବକାରୀ ଅଧିକ୍ଷକଙ୍କ ନେତୃତ୍ୱରେ ରେଢାଖୋଲ ଅବକାରୀ ବିଭାଗର ସହ ରେଢାଖୋଲ ପୁଲିସ ଏବଂ ନାକଟିଦେଓଲ ତହସିଲଦାରର ମିଳିତ ଭାବେ ଚଢାଉ କରିଥିଲେ। ଏହି ମାମଲାରେ ଅବକାରୀ ବିଭାଗ ପକ୍ଷରୁ ୨ଜଣଙ୍କୁ ଅଟକ ରଖାଯାଇଛି।

ରେଢାଖୋଲ ଅଞ୍ଚଳରେ ପ୍ରଥମ ଥର ଅଫିମ ଚାଷ ହୋଇଥିଲା। ୪୦ ଡିସମିଲ ଜମିରେ ୧୦ ହଜାର ଅଫିମ ଗଛ ଚାଷ କରାଯାଇଥିଲା, ଯାହାକୁ ଚଢ଼ାଉ ସମୟରେ ଅବକାରୀ ବିଭାଗ ପକ୍ଷରୁ ନଷ୍ଟ କରି ଦିଆଯାଇଛି। ନଷ୍ଟ କରାଯାଇଥିବା ୧୦ ହଜାର ଅଫିମ ଗଛର  ଅନୁମାନିକ ମୂଲ୍ୟ ଏକ କୋଟି ଟଙ୍କା ହେବ ବୋଲି ଅବକାରୀ ବିଭାଗ ପକ୍ଷରୁ ସୂଚନା ଦିଆଯାଇଛି।