ମସୁର ଡାଲି ଏକ ଚମତ୍କାରୀ ଗୁଣ ବିଶିଷ୍ଟ ଶସ୍ୟ। ଏହାକୁ ଡାଲି କରି ଖାଇବା ଦ୍ୱାରା ଶରୀର ପାଇଁ ଖୁବ୍ ଉପକାରୀ ହୋଇଥିବା ବେଳେ ଏହାର ଆହୁରି ଅନେକ ବ୍ୟବହାର ମଧ୍ୟ ରହିଛି ଯାହାଦ୍ୱାରା ଆମକୁ ବହୁତ ଲାଭ ମିଳିଥାଏ। ଏହା ଖାଇବାକୁ ଯେତିକି ସ୍ୱାଦିଷ୍ଟ, ସୁନ୍ଦରତା ବଢ଼ାଇବା ପାଇଁ ମଧ୍ୟ ସେତିକି ଉପଯୋଗୀ।
ମସୁର ଡାଲିରେ ଥିବା ମିନେରାଲ୍, ଭିଟାମିନ୍, ଆଣ୍ଟିଅକ୍ସଡାଣ୍ଟ୍ ତ୍ୱଚା ପାଇଁ ଲାଭଦାୟକ ହୋଇଥାଏ। ଆପଣଙ୍କ ତ୍ୱଚା ଅନୁସାରେ ମସୁର ଡାଲି ପାଉଡରରେ ଅନ୍ୟ ଉପାଦାନ ମିଶାଇ ମୁହଁରେ ଲଗାଇବା ଦ୍ୱାରା ବହୁତ ଲାଭ ମିଳିଥାଏ।
ତେବେ ଚାଲନ୍ତୁ ଜାଣିବା ସୌନ୍ଦର୍ଯ୍ୟ ବୃଦ୍ଧି ପାଇଁ ଏହାକୁ କିପରି ବ୍ୟବହାର କରିବେ –
୧. ମୁହଁର ସୌନ୍ଦର୍ଯ୍ୟ ବୃଦ୍ଧି ପାଇଁ ମସୁର ଡାଲି ପେଷ୍ଟରେ ବେସନ ଓ ମୁଲତାନୀ ମାଟି ମିଶାଇ ବ୍ୟବହାର କରିପାରିବେ।
୨. ମସୁର ଡାଲିରେ କ୍ଷୀର ଓ ଅଣ୍ଡାର ଧଳା ଭାଗ ମିଶାଇ ଏକ ପେଷ୍ଟ ପ୍ରସ୍ତୁତ କରନ୍ତୁ। ଏବେ ଏହାକୁ ମୁହଁରେ ଲଗାଇ ଶୁଖିବାକୁ ଛାଡ଼ିଦିଅନ୍ତୁ। ଶୁଖିଲା ପରେ ଥଣ୍ଡା ପାଣିରେ ଧୋଇ ଦିଅନ୍ତୁ। ଏହା ଚେହେରାକୁ ସତେଜ ଓ ଉଜ୍ୱଳ କରିଥାଏ।
୩. ମସୁର ଡାଲିରେ କ୍ଷୀର ମିଶାଇ ବ୍ୟବହାର କରିପାରିବେ। ଏହି ପେଷ୍ଟକୁ ହାଲ୍କା ଭାବେ ମୁହଁରେ ଲଗାନ୍ତୁ। ଏହା ମୁହଁରେ ଥିବା ମୃତ କୋଷିକା, ମଇଳା, ତୈଳ ଅଂଶ ବାହାର କରିଦେଇଥାଏ। ସପ୍ତାହକୁ ଥରେ ଏହାକୁ ମୁହଁରେ ଲଗାଇଲେ କଳା ଦାଗ ହଟିଯିବା ସହ ମୁହଁ ଉଜ୍ୱଳ ଦେଖାଯିବ।
୪. ଯେଉଁ ଲୋକଙ୍କ ଚର୍ମ ଶୁଷ୍କ ହୋଇଥାଏ ସେମାନେ ମସୁର ଡାଲି ପାଉଡରରେ ମହୁ ମିଶାଇ ମୁହଁରେ ଲଗାଇଲେ ଲାଭ ମିଳିଥାଏ।
୫. ଯଦି ଆପଣଙ୍କ ଚେହେରା ତେଲିଆ, ତେବେ ମସୁର ଡାଲି ପାଉଡରରେ ଭିନେଗାର ମିଶାଇ ମୁହଁରେ ଲଗାଇ ପାରିବେ।
୬ . ଆପଣଙ୍କ ଚର୍ମ ଶୁଷ୍କ କିମ୍ବା ତେଲିଆ ନହୋଇ ସ୍ୱାଭାବିକ ହୋଇଥିଲେ ମସୁର ଡାଲି ପାଉଡରରେ ଦହି ଓ ଭିନେଗାର ମିଶାଇ ମୁହଁରେ ଲଗାଇପାରିବେ। ଏହା ଶୁଖିଯିବା ପରେ ଧୋଇ ଦିଅନ୍ତୁ, ମୁହଁ ଉଜ୍ୱଳ ଦିଶିବ। ଭିନେଗାର ବଦଳରେ ଆପଣ ଲେମ୍ବୁ ରସ ମଧ୍ୟ ବ୍ୟବହାର କରିପାରିବେ।
୭. ମସୁର ଡାଲି ପାଉଡରରେ ବାଦାମ ତେଲ, ଗ୍ଲିସେରିନ୍ ଓ ଗୋଲାପ ଜଳ ମିଶାଇ ପେଷ୍ଟ ପ୍ରସ୍ତୁତ କରିପାରିବେ। ଏହା ଫେସ୍ ପ୍ୟାକ୍ ପରି କାମ କରିବ।
ଧ୍ୟାନ ଦେବେ –
୧. କଳା ଓ ଧଳା ଦାଗ ଦୂର କରିବାରେ ମସୁର ଡାଲି ବହୁତ ଲାଭକାରୀ। ହେଲେ ଏହାକୁ ସପ୍ତାହକୁ ଥରେରୁ ଅଧିକ ବ୍ୟବହାର କଲେ ମୁହଁ ପାଇଁ ଆବଶ୍ୟକ ତୈଳ ଅଂଶକୁ ମଧ୍ୟ ତ୍ୱଚା ଭିତରକୁ ଯିବା ବନ୍ଦ କରିଦେଇଥାଏ।
୨. ଏହା ଚେହେରାକୁ ଉଜ୍ୱଳ କରିବା ସହ ଶୁଷ୍କ ମଧ୍ୟ କରିଦେଇଥାଏ। ତେଣୁ ଏହାକୁ ବ୍ୟବହାର କରିବା ପରେ ମୁହଁରେ ମଏଶ୍ଚରାଇଜର୍ ଲଗାଇବାକୁ ଭୁଲିବେ ନାହିଁ।
୩. ଯେଉଁମାନଙ୍କ ଚର୍ମ ଶୁଷ୍କ ଓ ସମ୍ବେଦନଶୀଳ, ସେମାନେ ଏହାର ବ୍ୟବହାରରୁ ଦୂରେଇ ରହିବା ଉଚିତ୍।
୪. ଯଦି ମୁହଁରେ ବ୍ରଣ ହୋଇଛି କିମ୍ବା ଚର୍ମରୋଗ ହୋଇଛି, ତେବେ ଏହାକୁ ବ୍ୟବହାର କରନ୍ତୁ ନାହିଁ।