ବୌଦ୍ଧ : ବୌଦ୍ଧ ଜିଲାରେ ସାଧାରଣ ନିର୍ବାଚନ ଭିନ୍ନ ଚର୍ଚ୍ଚା ସୃଷ୍ଟି କରିଛି । ୮୫ କଣ୍ଟାମାଳ ବିଧାନସଭା ନିର୍ବାଚନ ମଣ୍ଡଳୀର ୨୬ ନମ୍ବର କିରାସିରା ଓ ୨୮ ନମ୍ବର ମହିସରପିଣ୍ଡା ବୁଥରେ ମତଦାନବେଳେ ଅନିୟମିତତା ହୋଇଥିବା ଅଭିଯୋଗ ହେବା ଏବଂ ଏ ସଂପର୍କରେ ପ୍ରମାଣ ମିଳିବା ପରେ ଉଭୟ ବୁଥରେ ସାନି ନିର୍ବାଚନ ପାଇଁ ନିର୍ବାଚନ କମିଶନ ନିର୍ଦ୍ଦେଶ ପ୍ରଦାନ କରିଛନ୍ତି ।
ନିର୍ବାଚନ କମିଶନଙ୍କ ନିର୍ଦ୍ଦେଶକ୍ରମେ ୨୩ ତାରିଖରେ ପୁଲିସର କଡା ସୁରକ୍ଷା ମଧ୍ୟରେ ଏବଂ ବରିଷ୍ଠ ଅଧିକାରୀ ଓ ମାଜିଷ୍ଟ୍ରେଟଙ୍କ ଉପସ୍ଥିତିରେ ଉଭୟ ବୁଥରେ ପୁନର୍ବାର ନିର୍ବାଚନ କରିବାକୁ ଜିଲା ନିର୍ବାଚନ ଅଧିକାରୀ ତଥା ଜିଲାପାଳ ଜେ . ସୋନାଲ ନିର୍ଦ୍ଦେଶ ଜାରି କରିଛନ୍ତି । ଏନେଇ ଜିଲାପ୍ରଶାସନ ପକ୍ଷରୁ ଉକ୍ତ ଦୁଇ ସ୍ଥାନରେ ବୁଧବାର ଦିନ ସାନି ମତଦାନ କରିବା ନେଇ ଡାକବାଜି ଯନ୍ତ୍ର ଓ ଡେଙ୍ଗୁରା ବଜାଇ ଭୋଟ ଦେବାକୁ ବୁଥ ଅନ୍ତର୍ଗତ ଗ୍ରାମ ଗୁଡିକରେ ଲୋକଙ୍କୁ ଅନୁରୋଧ କରାଯାଇଛି । ଭୋଟ ଗ୍ରହଣ ସକାଳ ୭ ଟାରୁ ଆରମ୍ଭ ହୋଇ ଅପରାହ୍ନ ୪ ପର୍ଯ୍ୟନ୍ତ ଚାଲୁରହିବ । କିରାସିରା ବୁଥ ପାଇଁ ଉପଜିଲାପାଳ ପ୍ରଭାସ ଚନ୍ଦ୍ର ଦଣ୍ଡସେନା ଓ ମହେଶ୍ୱରପିଣ୍ଡା ବୁଥ ପାଇଁ ଜିଲାପରିଷଦ ମୁଖ୍ୟ କାର୍ଯ୍ୟନିର୍ବାହୀ ଅଧିକାରୀ ଅନିରୁଦ୍ଧ ପ୍ରଧାନଙ୍କ ତତ୍ୱାବଧାନରେ ନିର୍ବାଚନ ପରିଚାଳନା ଦାୟିତ୍ୱ ପ୍ରଦାନ କରାଯାଇଛି ।
