ସୂଚନା ବିନା ତଥ୍ୟ ପ୍ରାପ୍ତି ହୋଇପାରିବ, କିନ୍ତୁ ତଥ୍ୟ ବିନା ସୂଚନା ମିଳି ପାରିବ ନାହିଁ: କୁଳପତି

ଭୁବନେଶ୍ୱର: ରମାଦେବୀ ମହିଳା ବିଶ୍ୱବିଦ୍ୟାଳୟର ଜୀବ ବିଜ୍ଞାନ ବିଭାଗ ଆନୁକୂଲ୍ୟରେ ଜୈବ ସୂଚନା ବିଜ୍ଞାନ ଉପରେ ଏକ ଦୁଇ ଦିନିଆ ଆନ୍ତର୍ଜାତିକ କର୍ମଶାଳା ଉଦ୍‌ଘାଟିତ ହୋଇଯାଇଛି। ଉଦ୍‌ଘାଟନ ଉତ୍ସବରେ ମୁଖ୍ୟଅତିଥି ଭାବେ ଯୋଗଦେଇ କୁଳପତି ପ୍ରଫେସର୍‍ ଅପରାଜିତା ଚୌଧୁରୀ କହିଥିଲେ ଯେ ସୂଚନା ବିନା ତଥ୍ୟ ପ୍ରାପ୍ତି ହୋଇପାରିବ, କିନ୍ତୁ ତଥ୍ୟ ବିନା ସୂଚନା ମିଳି ପାରିବ ନାହିଁ । ଏହି କର୍ମଶାଳା ଛାତ୍ରୀ ତଥା ଗବେଷକମାନଙ୍କ ପାଇଁ ଉପାଦେୟ ହୋଇପାରିବ ବୋଲି ଆଶା ପ୍ରକାଶ କରିଥିଲେ।

ଜୀବ ବିଜ୍ଞାନ ବିଭାଗ ମୁଖ୍ୟ ଡ.ଶିଖା ସିଂ ସ୍ୱାଗତ ଭାଷଣ ପ୍ରଦାନ କରିଥିବା ବେଳେ ପିଜି କାଉନ୍‌ସିଲ୍‌ ଅଧ୍ୟକ୍ଷା ପ୍ରଫେସର୍ ସସ୍ମିତା ମହାନ୍ତି, ପ୍ରଫେସର୍‍ ଚଣ୍ଡି ଚରଣ ରଥ ନିଜସ୍ୱ ବକ୍ତବ୍ୟ ରଖିଥିଲେ। ଡ.ମୁକ୍ତାମୟୀ କୁମ୍ଭାର, ଯମୁନା ଟୁଡୁ, ନବନୀତ କୌର ପ୍ରମୁଖ କର୍ମଶାଳା ପରିଚାଳନା କରିଥିବା ବେଳେ ଡ.ଆଲୋକ ଦାସ ସଂଯୋଜନା କରିଥିଲେ। ଡ.ଶକ୍ତିକାନ୍ତ ରଥ ଧନ୍ୟବାଦ ଅର୍ପଣ କରିଥିଲେ। ଦୁଇ ଦିନ ଧରି ଚାଲିବାକୁ ଥିବା ଏହି କର୍ମଶାଳାରେ ଦେଶ ତଥା ବାହାରୁ ଗବେଷକ ଅଂଶ ଗ୍ରହଣ କରିବେ ବୋଲି ଲୋକ ସଂପର୍କ ଅଧିକାରୀ ଡ.ମାନସ ବେହେରା ସୂଚନା ଦେଇଛନ୍ତି। ନିମନ୍ତ୍ରିତ ବକ୍ତା ଭାବରେ ଇସ୍ରାଏଲ୍‌ରୁ ଡ.ଏକଲବ୍ୟ ବିଶୋୟୀ କଲେରା ଜାତୀୟ ଗବେଷଣା ଅନୁଷ୍ଠାନର ଡ.ସୁରଜିତ ବାସା ପ୍ରମୁଖ ବକ୍ତବ୍ୟ ରଖିବେ।