ଜୟପୁର : ରାଜସ୍ଥାନର ଗୁଜ୍ଜର ସମ୍ପ୍ରଦାୟ ୫ପ୍ରତିଶତ ସଂରକ୍ଷଣ ଦାବିରେ ସରକାରଙ୍କୁ କଣ୍ଟ ଦେଇଛନ୍ତି। ଆସନ୍ତା ୧୧ ଦିନ ମଧ୍ୟରେ ସେମାନଙ୍କ ପାଇଁ ସଂରକ୍ଷଣ ଘୋଷଣା କରା ନ ଗଲେ ତୀବ୍ର ଆନ୍ଦୋଳନ କରାଯିବ ବୋଲି ସମ୍ପ୍ରଦାୟର ନେତା କିଓରୀ ସିଂହ ବୈଂଶାଲା ଚେତାବନୀ ଦେଇଛନ୍ତି। ସାୱାଇ ମାଧୋପୁରଠାରେ ଅନୁଷ୍ଠିତ ଗୁଜ୍ଜରମାନଙ୍କ ମହାପଞ୍ଚାୟତରେ ଏହି ଚେତାବନୀ ଦିଆଯାଇଛି। ଅବସରପ୍ରାପ୍ତ ସେନାଧିକାରୀ କିଓରୀଙ୍କ ନେତୃତ୍ବରେ ଅନୁଷ୍ଠିତ ମହାପଞ୍ଚାୟତରେ ହଜାର ହଜାର ସଂଖ୍ୟାରେ ଗୁଜ୍ଜର ଉପସ୍ଥିତ ଥିଲେ। ୨୦୧୮ ଡିସେମ୍ବରରେ ରାଜସ୍ଥାନ ସରକାର ଗୁଜ୍ଜରଙ୍କ ପାଇଁ ୧ ପ୍ରତିଶତ ଓ ଅନ୍ୟ ପଛୁଆ ବର୍ଗଙ୍କ ପାଇଁ ୪ପ୍ରତିଶତ ସଂରକ୍ଷଣ ଘୋଷଣା କରିଥିଲେ। ପୂର୍ବରୁ ସେହି ବର୍ଷ ଅକ୍ଟୋବରରେ ଅନ୍ୟ ପଛୁଆ ବର୍ଗଙ୍କ ପାଇଁ ସଂରକ୍ଷଣ ପରିମାଣ ୨୧ପ୍ରତିଶତରୁ ୨୬ପ୍ରତିଶତକୁ ବୃଦ୍ଧି ପାଇଁ ବିଧେୟକ ଆଣିଥିଲେ। ଗୁଜ୍ଜର ସମ୍ପ୍ରଦାୟକୁ ଅନ୍ୟ ପଛୁଆ ବର୍ଗ ଅନ୍ତର୍ଭୁକ୍ତ କରିବା ପାଇଁ ଗତ ବର୍ଷ ତୀବ୍ର ଆନ୍ଦୋଳନ କରିବା ପରେ ସରକାର ଏହି ପଦକ୍ଷେପ ନେଇଥିଲେ; କିନ୍ତୁ ସେମାନଙ୍କ ପାଇଁ ୫ପ୍ରତିଶତ ସଂରକ୍ଷଣ ଲାଗୁ କରି ନ ଥିଲେ। ବର୍ତ୍ତମାନର ରାଜ୍ୟର ସଂରକ୍ଷଣ ସ୍ଥିତି ମୋଟ ୫୪ପ୍ରତିଶତ ରହିଛି।
