ଭବାନୀପାଟଣାରେ ୨୯୯, ପୁରୀରେ ୨୦୧ ଓ ଭୁବନେଶ୍ବରରେ ୧୨୩ମି.ମି ବର୍ଷା
ଭୁବନେଶ୍ୱର : ଉତ୍ତର ପଶ୍ଚିମ ବଙ୍ଗୋପସାଗର ଓ ଏହାର ଆଖପାଖ ଅଞ୍ଚଳ ସମେତ ଓଡ଼ିଶା ଓ ପଶ୍ଚିମବଙ୍ଗ ଉପରେ ସୃଷ୍ଟି ହୋଇଥିବା ଲଘୁଚାପ ପ୍ରଭାବରେ ସାରା ରାଜ୍ୟରେ ଲଗାଣ ବର୍ଷା ଲାଗି ରହିଛି । ଗତ ୨୪ ଘଣ୍ଟା ମଧ୍ୟରେ ଦକ୍ଷିଣ ଓଡ଼ିଶାର ରାୟଗଡା, କନ୍ଧମାଳ, ନବରଙ୍ଗପୁର, ପଶ୍ଚିମ ଓଡ଼ିଶାର ସମ୍ବଲପୁର, ବରଗଡ଼, ବଲାଙ୍ଗୀର, ନୂଆପଡା, କଳାହାଣ୍ଡିରେ ପ୍ରବଳ ବର୍ଷା ହୋଇଛି। ସେହିପରି ଜଗତସିଂହପୁର, ଯାଜପୁର, କେନ୍ଦ୍ରାପଡା, ଢେଙ୍କାନାଳ, ଓ କଟକ ଜିଲ୍ଲାର ବିଭିନ୍ନ ସ୍ଥାନରେ ଅବିଶ୍ରାନ୍ତ ବର୍ଷା ଲାଗି ରହିଛି।
ତେବେ ଆଜି ସକାଳୁ କଟକ- ଭୁବନେଶ୍ୱର ଓ ଏହାର ଆଖପାଖ ଅଞ୍ଚଳରେ ଲଗାଣ ବର୍ଷା ଲାଗି ରହିଛି। ରାଜ୍ୟର କେତେକ ସ୍ଥାନରେ ପ୍ରବଳ ବର୍ଷା ଓ ବଜ୍ରପାତ ନେଇ ପାଣିପାଗ ବିଭାଗ ପକ୍ଷରୁ ସତର୍କ ସୂଚନା ଜାରି କରାଯାଇଛି। ଭବାନୀପାଟଣାରେ ସର୍ବାଧିକ ୨୯୯ମି.ମି ବର୍ଷା ରେକର୍ଡ କରାଯାଇଥିବା ସ୍ବତନ୍ତ୍ର ରିଲିଫ କମିଶନର ବିଷ୍ଣୁପଦ ସେଠୀ କହିଛନ୍ତି। ସେହପରି ପୁରୀରେ ୨୦୧ ଓ ଭୁବନେଶ୍ବରରେ ୧୨୩ମି.ମି ବର୍ଷା ହୋଇଥିବା ଶ୍ରୀ ସେଠୀ କହିଛନ୍ତି। ତେବେ ରାଜ୍ୟରେ ବନ୍ୟା ଭଳି ପରିସ୍ଥିତି ସୃଷ୍ଟି ହୋଇ ନାହିଁ ବୋଲି ସେ କହିଛନ୍ତି।
ବର୍ଷା ଲାଗି ରହିବାରୁ ସାଧାରଣ ଜୀବନଯାତ୍ରା ପ୍ରଭାବିତ ହୋଇଛି। ପୁରୀ, ରାୟଗଡ଼ା, ଗଞ୍ଜାମ, କଳାହାଣ୍ଡି ଆଦି ଜିଲାରେ ଅତି ପ୍ରବଳ ବର୍ଷା ଯୋଗୁ ବଂଶଧାରା ନଦୀରେ ଜଳସ୍ତର ବୃଦ୍ଧି ପାଇଛି । ପୁରୀରେ ମଧ୍ୟ ବର୍ଷା ଲାଗି ରହିଛି । ବର୍ଷା ଯୋଗୁଁ ପୁରୀ ମାର୍କେଣ୍ଡେୟ ପୁଷ୍କରିଣୀର ପ୍ରାୟ ୧୦୦ ଫୁଟ୍ର ପାଚେରି ଭୁଶୁଡ଼ି ପଡ଼ିଛି। ଶରଧାବାଲିରେ ରଥ ଉପରେ ଥିବା ଶ୍ରୀ ଜୀଉମାନଙ୍କର ନୀତିକାନ୍ତିରେ ବିଳମ୍ବ ହୋଇଛି।
