କଟକ ..- ଅଖିଳ ଭାରତୀୟ କଂଗ୍ରେସ ଅଧ୍ୟକ୍ଷ ହେବା ପରେ ପ୍ରଥମ ଥର ପାଇଁ ରାହୁଲ ଗାନ୍ଧୀ ଓଡ଼ିଶା ଆସୁଛନ୍ତି । ଜାନୁଆରୀ ୨୫ ତାରିଖରେ ଉପକୂଳବର୍ତ୍ତୀ ଏକ ଜିଲ୍ଲାରେ ସେ ଜନସଭାକୁ ସମ୍ବୋଧିତ କରିବେ । ପାରାଦୀପରେ ରାହୁଲଙ୍କ ଜନସଭା ଅନୁଷ୍ଠିତ ହେବ ବୋଲି ସୂଚନା ମିଳିଛି । ଏହାକୁ ନେଇ ରାଜନୈତିକ ସମୀକରଣ ଆରମ୍ଭ ହୋଇଛି ।
ପୂର୍ବତନମନ୍ତ୍ରୀ ଦାମ ରାଉତ ବିଜେଡିରୁ ବିଦା ହେବା ପରେ ପାରଦୀପକୁ ନେଇ ଅନେକ କଳ୍ପନାଜଳ୍ପନା ଆରମ୍ଭ ହୋଇଛି । ସେ ନିଜର ନୂଆ ରାଜନୈତିକ ଦଳ ବିଜୁ ସମତାକ୍ରାନ୍ତି ଦଳ ଗଠନ କରିଛନ୍ତି । ଡକ୍ଟର ଦାମ ରାଉତ ନିଜ ଦଳରୁ ପାରାଦୀପରେ ନିର୍ବାଚନ ଲଢି ପାରନ୍ତି । ଆସନ୍ତା ନିର୍ବାଚନରେ ପାରାଦୀପରେ ବିଜେଡି ଅନ୍ୟ ଜଣେ ଟାଣୁଆ ନେତାଙ୍କୁ ପ୍ରାର୍ଥୀ କରିପାରେ । ତେବେ ଦାମଙ୍କ ବିରୁଦ୍ଧରେ କଟକ ବାରବାଟୀର ବିଧାୟକ ଦେବାଶୀଷ ସାମନ୍ତରାୟ ପ୍ରାର୍ଥୀ ହୋଇ ପାରନ୍ତି ବୋଲି ଆଲୋଚନା ହେଉଛି । ସେ ବି ଏହା ଭିତରେ ଅନେକ ଥର ପାରାଦୀପ ଗସ୍ତ କରିଛନ୍ତି । କଂଗ୍ରେସରୁ ବାପି ସର୍ଖେଲ ପାରାଦୀପ ଆସନ ପାଇଁ ଆଶାୟୀ । ପାରାଦୀପରେ ତାଙ୍କର ବେଶ୍ ପ୍ରଭାବ ରହିଛି । ୨୦୧୪ ନିର୍ବାଚନରେ ବାପି ସର୍ଖେଲ କଂଗ୍ରେସର ପ୍ରାର୍ଥୀ ଥିଲେ । ସେ ବିଜେଡିର ପ୍ରାର୍ଥୀ ଦାମ ରାଉତଙ୍କ ଠାରୁ ପରାସ୍ତ ହୋଇଥିଲେ ।ଡକ୍ଟର ଦାମ ରାଉତ ୮୫,୨୦୬ ଭୋଟ୍ ପାଇଥିବା ବେଳେ ବାପି ସର୍ଖେଲ ୪୬,୬୦୬ ଖଣ୍ଡ ଭୋଟ ପାଇ ଦ୍ୱିତୀୟସ୍ଥାନରେ ରହିଥିଲେ । ତେବେ ଜଗତସିଂପୁର ଜିଲାରେ ରଞ୍ଜୀବ ଓ ଚିରଞ୍ଜୀବ ବିଶ୍ୱାଳଙ୍କର ବେଶ୍ ପ୍ରଭାବ ରହିଛି । ଏବେ ଚିରଞ୍ଜୀବ ବିଶ୍ୱାଳ ଜଗତସିଂହପୁରରୁ ବିଧାୟକ ଅଛନ୍ତି । ରଞ୍ଜୀବ ବିଶ୍ୱାଳ ରାଜ୍ୟ ସଭାର ସାଂସଦ ଅଛନ୍ତି ।
ରଞ୍ଜୀବ ବିଶ୍ୱାଳ ପାରାଦୀପରୁ ପ୍ରାର୍ଥୀ ହୋଇ ପାରନ୍ତି ବୋଲି ଚର୍ଚ୍ଚା ହେଉଛି । ୧୯୯୬ ଓ ୧୯୯୮ରୁ ଜଗତସିଂପୁରର ଲୋକସଭା ଆସନରୁ ରଞ୍ଜୀବ ବିଜୟ ଲାଭ କରିଥିଲେ । ମାତ୍ର ୧୯୯୯ରେ ଅନୁଷ୍ଠିତ ସାଧାରଣ ନିର୍ବାଚନରେ ରଞ୍ଜୀବ ବିଶ୍ୱାଳ ବିଜେଡି ପ୍ରାର୍ଥୀ ପଞ୍ଚାନନ କାନୁନଗୋଙ୍କଠାରୁ ହାରି ଯାଇଥିଲେ । ସେହିପରି ୨୦୦୪ରେ ବ୍ରହ୍ମାନନ୍ଦ ପଣ୍ଡାଙ୍କ ଠାରୁ ରଞ୍ଜୀବ ବିଶ୍ୱାଳ ପରାଜିତ ହୋଇଥିଲେ । ୨୦୦୯ ଓ ୨୦୧୪ରେ ରଞ୍ଜୀବ ବିଶ୍ୱାଳ ଲୋକସଭା ପ୍ରାର୍ଥୀ ହୋଇ ନ ଥିଲେ ।
୨୦୧୯ରେ ସେ କଂଗ୍ରେସର ପ୍ରାର୍ଥୀ ହେବା ନେଇ କଳ୍ପନା ଜଳ୍ପନା ଚାଲିଛି । ରାହୁଲ ଗାନ୍ଧୀଙ୍କ ସହ ତାଙ୍କର ଭଲ ସମ୍ପର୍କ ଥିବା ବି ଚର୍ଚ୍ଚା ହେଉଛି । ଆସନ୍ତା ନିର୍ବାଚନରେ ସେ ପାରାଦୀପରୁ ପାର୍ଥୀ ହେବା ନେଇ ଆଲୋଚନା ହେଉଛି ।
ରାହୁଲ ଗାନ୍ଧୀ ଉପକୂଳ ଓଡ଼ିଶାର କୌଣସି ସ୍ଥାନକୁ ୨୫ ତାରଖରେ ଆସିପାରନ୍ତି । ସେ ପାରାଦୀପ ଆସିବାର ସମ୍ଭାବନା ଅଧିକ ବୋଲି କଂଗ୍ରେସ ମୁଖପାତ୍ର ତଥା ମିଡିଆସେଲ୍ ମୁଖ୍ୟ ସତ୍ୟପ୍ରକାଶ ନାୟକ ସୂଚନା ଦେଇଛନ୍ତି । ରଞ୍ଜୀବ ବିଶ୍ୱାଳ ପାରଦୀପରୁ ପ୍ରାର୍ଥୀ ହେବା ନେଇ ଯେଉଁ ଆଲୋଚନା ହେଉଛି ତାହା କେବଳ ମାତ୍ରା ଏକ ଚର୍ଚ୍ଚା , କଂଗ୍ରେସର ଅନେକ ଆଶାୟୀ ପ୍ରାର୍ଥୀ ଅଛନ୍ତି । ପ୍ରଦେଶ କଂଗ୍ରେସର ନିଷ୍ପତି ଅନୁସାରେ ଯୋଗ୍ୟ ବ୍ୟକ୍ତିମାନଙ୍କୁ ପ୍ରାର୍ଥୀ କରାଯିବ ବୋଲି ସେ କହିଛନ୍ତି । ପୂର୍ବ ସାଧାରଣ ନିର୍ବାଚନରେ ପ୍ରଦେଶ କଂଗ୍ରେସରେ ଯେପରି ନେତୃତ୍ୱ ପରିବର୍ତ୍ତନ ହୋଇଥିଲା ଏଥର ସେପରି ହେବ ନାହିଁ , ନିରଞ୍ଜନ ପଟ୍ଟନାୟକଙ୍କ ନେତୃତ୍ୱରେ ପ୍ରଦେଶ କଂଗ୍ରେସ ରାଜ୍ୟରେ ନିର୍ବାଚନ ଲଢିବ ବୋଲି ସେ ସୂଚନା ଦେଇଛନ୍ତି ।
ଆଲେଖ୍ୟ – ଜିତ୍ ପଟ୍ଟନାୟକ
