ମୁମ୍ବଇ : ବଲିଉଡ଼ରେ ଖୁବ୍ ଲୋକପ୍ରିୟତା ହାସଲ କରିଥିବା ପାକିସ୍ତାନୀ କଣ୍ଠଶିଳ୍ପୀ ରାହତ ଫତେ ଅଲୀ ଖାନଙ୍କୁ ପ୍ରବର୍ତ୍ତନ ନିର୍ଦ୍ଦେଶାଳୟ(ଇଡି) ପକ୍ଷରୁ ନୋଟିସ୍ ଜାରି କରାଯାଇଛି। ଫେମା(ଫରେନ୍ ଏକ୍ସଜେଞ୍ଜ୍ ମ୍ୟାନେଜମେଣ୍ଟ୍ ଆକ୍ଟ)ର ଉଲଙ୍ଘନ ଅଭିଯୋଗରେ ତାଙ୍କୁ ଏହି ନୋଟିସ୍ ପଠାଯାଇଛି। ସୂଚନା ଅନୁସାରେ, କଣ୍ଠଶିଳ୍ପୀଙ୍କ ଉପରେ ଭାରତରେ ବିଦେଶୀ ମୁଦ୍ରା ଚୋରା ଚାଲାଣର ଅଭିଯୋଗ ହୋଇଛି। ଏହି ଅଭିଯୋଗକୁ ଆଧାର କରି ଇଡି ତାଙ୍କୁ କାରଣ ଦର୍ଶାଅ ନୋଟିସ୍ ଜାରି କରଛି।
ମିଳିଥିବା ଖବର ଅନୁସାରେ, ରାହତ ଫତେ ଅଲୀ ଖାନ୍ ଅବୈଧ ଭାବେ ୩,୪୦,୦୦୦ ଡଲାର ଆୟ କରିଛନ୍ତି। ତନ୍ମଧ୍ୟରୁ ୨,୨୫,୦୦୦ ଡଲାର ସେ ଚୋରାଚାଲଣ କରିଥିବା ଜଣାପଡ଼ିଛି। ତେବେ ଯଦି ତଦନ୍ତକାରୀ ରାହତଙ୍କ ଉତ୍ତରରେ ସନ୍ତୁଷ୍ଟ ନହୁଅନ୍ତି ତାଙ୍କୁ ଚୋରାଚାଲାଣ ପରିମାଣର ୩୦୦ ପ୍ରତିଶତ ଜୋରିମାନା ଦେବାକୁ ପଡ଼ିବ ବୋଲି କୁହାଯାଉଛି। ଜୋରିମାନା ନଦେଲେ ତାଙ୍କ ବିରୋଧରେ ଲୁକ୍ ଆଉଟ୍ ନୋଟିସ୍ ଜାରି କରାଯିବ ଓ ଏଥିସହିତ ଭାରତରେ ତାଙ୍କ ଶୋ’ ଉପରେ ନିଷେଧାଦେଶ ଜାରି କରାଯାଇପରେ।
ଉଲ୍ଲେଖଯୋଗ୍ୟ, ପୂର୍ବରୁ ୨୦୧୧ରେ ମଧ୍ୟ କଣ୍ଠଶିଳ୍ପୀଙ୍କୁ ଦିଲ୍ଲୀର ଇନ୍ଦିରା ଗାନ୍ଧୀ ଆନ୍ତର୍ଜାତୀୟ ବିମାନ ବନ୍ଦରରେ ବେଆଇନ ମୁଦ୍ରା ଚାଲାଣ ଅଭିଯୋଗରେ ଧରାଯାଇ ଜେରା କରାଯାଇଥିଲା।
