ନୂଆଦିଲ୍ଲୀ: ଭାରତର ବଡ କୂଟନୈତିକ ବିଜୟ ହୋଇଛି। ୧୮ ମାସ ଧରି କାତାର ଜେଲରେ ଥିବା ୮ଜଣ ପୂର୍ବତନ ନୌସେନା ଅଧିକାରୀ ମୁକ୍ତ ହୋଇଛନ୍ତି। ସେମାନଙ୍କ ମଧ୍ୟରୁ ୭ ଜଣ ସୋମବାର ନୂଆଦିଲ୍ଲୀ ବିମାନ ବନ୍ଦରରେ ପହଞ୍ଚିଛନ୍ତି। ସେମାନଙ୍କୁ ମୁକ୍ତ କରାଯିବା ସହ ଭାରତରେ ପହଞ୍ଚିବା ପାଇଁ ସମସ୍ତ ପ୍ରକାର ସହାୟତା କରିଥିବା କାତାର ସରକାରଙ୍କୁ ଧନ୍ୟବାଦ ଜଣାଇଛନ୍ତି ଭାରତ ସରକାରଙ୍କ ବୈଦେଶିକ ମନ୍ତ୍ରାଳୟ। ନୂଆଦିଲ୍ଲୀରେ ପହଞ୍ଚିବା ପରେ ସେମାନେ ଭାବବିହ୍ବଳ ହୋଇପଡିଛନ୍ତି। ଜନ୍ମମାଟିକୁ ଫେରିଥିବାରୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ଏବଂ ଭାରତ ସରକାରଙ୍କୁ କୃତଜ୍ଞତା ଜଣାଇଛନ୍ତି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବ୍ୟକ୍ତିଗତ ହସ୍ତକ୍ଷେପ ଯୋଗୁଁ ଜନ୍ମମାଟିକୁ ଫେରି ପାରିଲୁ ବୋଲି କାତାରରୁ ଫେରିଥିବା ପୂର୍ବତନ ନୌସେନା ଅଧିକାରୀମାନେ କହିଛନ୍ତି। ଗୁପ୍ତଚର ଅଭିଯୋଗରେ ୨୦୨୨ ଅଗଷ୍ଟ ୩୦ରେ ଭାରତର ୮ ଜଣ ନୌସେନା ଅଧିକାରୀଙ୍କୁ କାତାର ସରକାର ଅଟକ ରଖିବା ପରେ ସେମାନଙ୍କୁ ଜେଲରେ ଭର୍ତ୍ତି କରିଥିଲେ। ୨୦୨୩ ଅକ୍ଟୋବର ୨୬ରେ କାତାରର ଏକ କୋର୍ଟ ସେମାନଙ୍କୁ ଫାଶୀ ଦଣ୍ଡାଦେଶ ଦେଇଥିଲେ। ଏହାକୁ ନେଇ ଭାରତରେ କଡା ପ୍ରତିକ୍ରିୟା ପ୍ରକାଶ ପାଇଥିଲା। ଭାରତ ପକ୍ଷରୁ କୂଟନୈତିକ ଚାପ ପରେ ମୃତ୍ୟୁ ଦଣ୍ଡାଦେଶକୁ କୋହଳ କରାଯାଇଥିଲା।
Comments are closed.