ଶ୍ରୀକ୍ଷେତ୍ର ପୁରୀରେ ଆଜି ପ୍ରସିଦ୍ଧ ଗୋସାଣୀ ଯାତ୍ରା ଅନୁଷ୍ଠିତ ହେଉଛି। ସହରର ବିଭିନ୍ନ ଯାଗା ଆଖେଡାରେ ନିର୍ମିତ ଦେବୀଙ୍କର ବିଶାଳକାୟ ମୃଣ୍ମୟ ପ୍ରତିମା ଓ ସୋଲ, ଜରି, ଜମ୍ବୁରାରେ ସଜ୍ଜିତ ମେଢକୁ ଆଜି ସଂଧ୍ୟାରେ ସିଂହଦ୍ୱାର ସମ୍ମୁଖକୁ ଅଣାଯାଇ ସେସବୁକୁ ବଡଦାଣ୍ଡରେ ରଖାଯିବ। ସେଠାରେ ହେବାକୁ ଥିବା ଦେବୀ ମେଳଣକୁ ଗୋସାଣୀଯାତ ବୋଲି କୁହାଯାଇଥାଏ। ଏକାଦଶୀ ତିଥିରେ ଦେବୀମାନେ ଶ୍ରୀମନ୍ଦିର ଉଠିବାକୁ ଥିବା ମହାଦୀପ ଦର୍ଶନ କରିବା ପରେ ବିଳମ୍ବିତ ରାତିରେ ଗୋସାଣୀ ସବୁକୁ ଶୋଭାଯାତ୍ରାରେ ନିଆଯାଇ ମୂଷାନଈରେ ବିସର୍ଜନ କରାଯିବ ବୋଲି ସୂଚନା ମିଳିଛି। ତେବେ ସର୍ବସାଧାରଣ ଲୋକେ ଯେପରି ଗହଳି କରି ନ ପାରିବେ ସେଥିଲାଗି ସିଂହଦ୍ୱାର ଠାରୁ ମରଚିକୋଟ ଛକ ଓ ବଡଦେଉଳ ଚାରିପଟେ ବ୍ୟାପକ ପୋଲିସ ମୂତୟନ କରାଯାଇଛି।
ଆଜି ଠାରୁ ଶ୍ରୀମନ୍ଦିରରେ ଏକ ମାସ ବ୍ୟାପୀ କାର୍ତ୍ତିକ ବ୍ରତ ନୀତି ଆରମ୍ଭ ହୋଇଛି। ଏହି ଅବସରରେ ଶ୍ରୀଜୀଉମାନଙ୍କୁ ରାଧା ଦାମୋଦର ବେଶରେ ସଜ୍ଜିତ କରାଯିବା ସହିତ ବାଳଭୋଗ ଅନୁଷ୍ଠିତ ହୋଇଛି। ଏଥିଲାଗି ଶ୍ରୀମନ୍ଦିର ପ୍ରଶାସନ ପକ୍ଷରୁ ସ୍ୱତନ୍ତ୍ର ନୀତିନିର୍ଘଣ୍ଟ ପ୍ରସ୍ତୁତ କରାଯାଇଛି। କରୋନା ମହାମାରୀ ଯୋଗୁ ଆଜି ମଧ୍ୟାହ୍ନ ୧୨ଟା ପରେ ଶ୍ରୀମନ୍ଦିର ଭିତରକୁ ସର୍ବସାଧାରଣ ଭକ୍ତଙ୍କ ପ୍ରବେଶ ଉପରେ କଟକଣା ଲାଗୁ କରାଯାଇଛି। ଚଳିତବର୍ଷ ଜିଲ୍ଲା ପ୍ରଶାସନ ପକ୍ଷରୁ ପୁରୀରେ ରହି କାର୍ତ୍ତିକ ବ୍ରତ ପାଳନ କରିବା ପାଇଁ କୌଣସି ବ୍ୟବସ୍ଥା କରାଯାଇ ନାହିଁ।
