ତାଲିବାନର ଆଫଗାନିସ୍ତାନ ଦଖଲ ପଛରେ ପାକିସ୍ତାନ ଆଇଏସଆଇର ମୁଖ୍ୟ ଭୂମିକା

ୱାଶିଂଟନ: ତାଲିବାନକୁ ପୃଷ୍ଠପୋଷକତା ଯୋଗାଇବା କ୍ଷେତ୍ରରେ ପାକିସ୍ତାନ ଏବଂ ଏହାର ଗୁଇନ୍ଦା ସଂସ୍ଥା (ଆଇଏସଆଇ) ମୁଖ୍ୟ ଭୂମିକା ଗ୍ରହଣ କରିଛନ୍ତି। ତାଲିବାନର ଆଫଗାନିସ୍ତାନ ଦଖଲ ପଛରେ ମଧ୍ୟ ସେମାନଙ୍କର ମୁଖ୍ୟ ଭୂମିକା ରହିଥିବା ଆମେରିକାରେ ଜଣେ ତୁଙ୍ଗ ରିପବ୍ଲିକାନ ସାଂସଦ କହିଛନ୍ତି। ତାଲିବାନ ବିଜୟରେ ଇସଲାମାବାଦ ବିଜୟ ଉତ୍ସବ ମନାଇବା ଦୃଶ୍ୟ ଅତ୍ୟନ୍ତ ଅଶ୍ୱସ୍ତିକର ବୋଲି ସେ କହିବା ସହିତ ଏହାଦ୍ୱାରା ଆଫଗାନ ଜନସାଧାରଣ ପୁଣି ବର୍ବରତାର ନର୍କରେ ଘାଣ୍ଟିହେବେ ବୋଲି ସେ କହିଛନ୍ତି।
ଆମେରିକା କଂଗ୍ରେସର ରିପବ୍ଲିକାନ ସଦସ୍ୟ ଷ୍ଟିଭ ଚାବଟ୍‍ ରବିବାର ଦିନ ହିନ୍ଦୁ ରାଜନୈତିକ କାର୍ଯ୍ୟାନ୍ୱୟନ କମିଟିକୁ ଆଭାସି ଜରିଆରେ ଉଦବୋଧନ ଦେଇ କହିଥିଲେ, ତାଲିବାନ ଭୟରେ ଦେଶ ଛାଡୁଥିବା ଆଫଗାନ ନାଗରିକଙ୍କୁ ଭାରତ ସରକାର ସ୍ୱାଗତ କରିବା ବିଷୟ ପ୍ରଶଂସନୀୟ ହୋଇଛି। ଅନ୍ୟପକ୍ଷରେ ଏକଥା ସମସ୍ତେ ଜାଣନ୍ତି ଯେ ପାକିସ୍ତାନ ଏବଂ ବିଶେଷକରି ଏହାର ଗୁଇନ୍ଦା ସଂସ୍ଥା ଆଇଏସଆଇ ତାଲିବାନକୁ ପୃଷ୍ଠପୋଷକତା ଯୋଗାଇବା ତଥା ଏହା ଆଫଗାନିସ୍ତାନକୁ ଅଧିକାର କରିବା ପଛରେ ମୁଖ୍ୟ ଭୂମିକା ନେଉଛି। ତାହାଛଡା ପାକିସ୍ତାନରେ ମଧ୍ୟ ମହିଳା ଓ ଯୁବତୀଙ୍କ ଉପରେ ଅତ୍ୟାଚାର କରାଯାଉଛି। ସେଠାରେ ସଂଖ୍ୟାଲଘୁ ହିନ୍ଦୁ ନାବାଳିକାଙ୍କୁ ବଳପୂର୍ବକ ବୟସ୍କ ମୁସଲମାନ ପୁରୁଷଙ୍କ ସହିତ ବିବାହ କରାଇ ଦିଆଯାଉଛି। ଏସବୁ ଅଭିଯୋଗ ଅମୂଳକ ନୁହେଁ। ଅନ୍ୟପକ୍ଷରେ ପ୍ରାୟ ୬ ନିୟୁତ ହିନ୍ଦୁ ଆମେରିକାରେ ବାସ କରୁଛନ୍ତି ଏବଂ ସେମାନେ ସାରା ଆମେରିକାରେ ନିଃସନ୍ଦେହରେ ସ୍ଥାନୀୟ ସାମାଜିକ ବ୍ୟବସ୍ଥାର ଅବିଚ୍ଛେଦ୍ୟ ଅଙ୍ଗ ପାଲଟିଛନ୍ତି। ଉଚ୍ଚ ନୈତିକ ମୂଲ୍ୟବୋଧ ସହିତ ଉଚ୍ଚତର ଶିକ୍ଷାଗତ ଯୋଗ୍ୟତା ଜରିଆରେ ହିନ୍ଦୁମାନେ ଆମେରିକା ସ୍ୱପ୍ନ ସାକାର କରିବାରେ ଦୃଷ୍ଟାନ୍ତକାରୀ ଭୂମିକା ଗ୍ରହଣ କରିଛନ୍ତି।