କଟକ: ତୃତୀୟ ପର୍ୟ୍ୟାୟ ଲକ୍ଡାଉନ ଜାରି ରହିଥିବା ବେଳେ କଟକଣାକୁ ଆହୁରି କଡ଼ାକଡ଼ି କରିଛି କଟକ କମିସନରେଟ ପୁଲିସ। ନୂଆ ନିୟମ ଅନୁଯାୟୀ ଆଜିଠାରୁ ସହରରେ କେବଳ ଔଷଧ ଦୋକାନ ବ୍ୟତୀତ ଅନ୍ୟ ସମସ୍ତ ଦୋକାନ ସନ୍ଧ୍ୟା ୬ଟା ସୁଦ୍ଧା ବନ୍ଦ ରହିବ। ଏହି ସମୟ ପରଠାରୁ ସକାଳ ୭ଟା ପର୍ୟ୍ୟନ୍ତ ଲୋକଙ୍କ ଚଳପ୍ରଚଳ ଉପରେ କଟକଣା କରାଯାଇଥିବାରୁ ଏହାକୁ କଡ଼ାକଡ଼ି ଭାବେ ପାଳନ କରାଯିବା ପାଇଁ ପୁଲିସ ପକ୍ଷରୁ ପଦକ୍ଷେପ ନିଆଯାଇଛି। ନୂଆ ନିୟମ ସଂପର୍କରେ ବହୁ ଲୋକେ ଅବଗତ ନ ଥିବାରୁ ଗତକାଲି ଏଥିପାଇଁ କୋହଳ କରାଯାଇଥିଲା।
ଆଜିଠାରୁ ସନ୍ଧ୍ୟା ୬ଟାରେ ପରେ ବାଇକ୍ ଧରି ବାହାରେ ବୁଲିଲେ ପୂର୍ବପରି କାର୍ୟ୍ୟାନୁଷ୍ଠାନ ଗ୍ରହଣ ସ୍ୱରୂପ ଗାଡି ଜବତ କରାଯିବ ଏବଂ ଲକ୍ଡାଉନ ଜାରି ପର୍ୟ୍ୟନ୍ତ ଏହା ବଳବତ୍ତର ରହିବ ବୋଲି ବିଭିନ୍ନ ଥାନା ପକ୍ଷରୁ ସେମାନଙ୍କ ଅଞ୍ଚଳରେ ମାଇକ ଯୋଗେ ପ୍ରଚାର କରାଯାଇଛି। କେବଳ ମେଡିକାଲ(ତତ୍ ସଂଲଗ ଦସ୍ତାବିଜ୍) ରହିଥିବା ଲୋକଙ୍କୁ ଛଡ଼ାଯିବ। ଅନ୍ୟ କୌଣସି ପରିସ୍ଥିତିରେ କାହାରିକୁ ନ ଛାଡିବା ପାଇଁ ଡିସିପି ଅଖିଳେଶ୍ୱର ସିଂହ ସବୁ ଥାନାକୁ ନିର୍ଦେଶ ଦେଇଛନ୍ତି।
