ପ୍ରତିବର୍ଷ ଜଙ୍ଗଲରେ ୫ ଦିନ ଏକୁଟିଆ ରୁହନ୍ତି ପ୍ରଧାନମନ୍ତ୍ରୀ

ନୂଆଦିଲ୍ଲୀ: ପ୍ରତିବର୍ଷ ଜଙ୍ଗଲରେ ୫ ଦିନ ଏକୁଟିଆ ରୁହନ୍ତି ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ। ବହୁ ବର୍ଷ ଧରି ସେ ଏହି ଅଭ୍ୟାସ ଜାରି ରଖିଛନ୍ତି। ନିଜେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀ ହିଁ ଏ ସମ୍ପର୍କରେ ସୂଚନା ଦେଇଛନ୍ତି।
ଫେସ୍‍ବୁକ୍‍ ପେଜ୍‍ ‘ଦ ହ୍ୟୁମାନ୍‍ସ୍‍ ଅଫ୍‍ ବମ୍ବେ’କୁ ସାକ୍ଷାତକାର ଅବସରରେ ପ୍ରଧାନମନ୍ତ୍ରୀ ମୋଦୀ କହିଛନ୍ତି ଯେ ପ୍ରତିବର୍ଷ ଦୀପାବଳୀ ସମୟରେ ମୁଁ ଏକୁଟିଆ କୌଣସି ଏକ ଜଙ୍ଗଲକୁ ଚାଲିଯାଏ। ସେଠାରେ ପାଞ୍ଚ ଦିନ ବିତାଇବା ପରେ ଫେରିଆସେ। ଏ ବିଷୟରେ ଅନେକେ ହୁଏତ ଜାଣିନାହାନ୍ତି। ଯିବା ବେଳେ ସାଙ୍ଗରେ ପାଞ୍ଚ ଦିନ ପାଇଁ ଖାଇବା ପିଇବା ନେଇ ଯାଇଥାଏ। ସେଠାରେ ଟିଭି, ଖବର କାଗଜ, କମ୍ପ୍ୟୁଟର, ଫୋନ୍‍ କିଛି ନଥାଏ। କେବଳ ଚତୁର୍ଦ୍ଦିଗରେ ଜଙ୍ଗଲ ଓ ଝରଣାର ଶାନ୍ତ ପରିବେଶ। ସେଠାରେ ମୁଁ ଆତ୍ମଚିନ୍ତନ କରେ।’ ନିଜ ଜୀବନର ଏହି ଗୁଢ଼ ରହସ୍ୟ ଉନ୍ମୋଚନ କରିବା ସହିତ କନିଷ୍ଠମାନେ ମଧ୍ୟ ଏହି ପନ୍ଥା ଅନୁସରଣ କରିବାକୁ ମୋଦୀ ଉପଦେଶ ଦେଇଛନ୍ତି। ବର୍ତ୍ତମାନର କ୍ଷୀପ୍ର ଜୀବନଶୈଳୀରେ ଶାନ୍ତି ଓ ଆତ୍ମଚିନ୍ତନ ପାଇଁ ଏହା ନିତାନ୍ତ ଆବଶ୍ୟକ ବୋଲି ମୋଦୀ କହିଛନ୍ତି। ସେଠାରେ ହିଁ ଜଣେ ଜଗତର ବାସ୍ତବ ସତ୍ୟକୁ ଉପଲବ୍ଧ କରିପାରିବ। ଅନ୍ୟମାନେ ଆପଣଙ୍କୁ କଣ କହୁଛନ୍ତି ତାହାର ସମୀକ୍ଷା ସହିତ ନିଜକୁ ଦୃଢ଼ ପ୍ରତିଜ୍ଞ କରିପାରିବ। ଆଗାମୀ ଦିନରେ ଏହି ଉପଲବ୍ଧି ଆପଣଙ୍କ ପାଇଁ ବହୁ ଉପାଦେୟ ସାବ୍ୟସ୍ତ ହେବ ବୋଲି ପ୍ରଧାନମନ୍ତ୍ରୀ ମୋଦୀ କହିଛନ୍ତି।
ନିଜ ବାଲ୍ୟଜୀବନର ସ୍ମୃତିଚାରଣ କରି ମୋଦୀ କହିଛନ୍ତି ଯେ ‘୧୭ ବର୍ଷ ବୟସରେ ମୁଁ ଘର ତ୍ୟାଗ କରି ହିମାଳୟ ଚାଲିଗଲି। ସେଠାରୁ ଫେରିବା ପରେ ମୋତେ ଲାଗିଲା ଲୋକଙ୍କ ସେବାରେ ମୁଁ ନିଜକୁ ସମର୍ପିତ କରିବା ଆବଶ୍ୟକ। ସେଠାରୁ ମୁଁ ଅହମ୍ମଦାବାଦ ଗଲି। ତାହା ଥିଲା ମୁଁ ମୋ ଜୀବନରେ ଦେଖିଥିôବା ସବୁଠାରୁ ବଡ଼ ସହର। ସେଠାକାର ଜୀବନଶୈଳୀ ଖୁବ୍‍ କ୍ଷୀପ୍ର ଥିଲା। ଶାନ୍ତି ନଥିଲା। ମୁଁ ମୋ ଦାଦାଙ୍କ କ୍ୟାଣ୍ଟିନରେ ରହି ତାଙ୍କୁ ସହାୟତା କରୁଥିଲି। ଏହାପରେ ରାଷ୍ଟ୍ରୀୟ ସ୍ୱୟଂ ସେବକ ସଂଘର ପୂର୍ଣ୍ଣକାଳୀନ ପ୍ରଚାରକ ପାଲଟିଗଲି। ଆରଏସ୍‍ଏସ୍‍ କାର୍ଯ୍ୟାଳୟକୁ ଆସୁଥିବା ଲୋକଙ୍କୁ ଚା’ ପରସିବା, ଘର ସଫା କରିବା ବାସନ ମାଜିବା କାମ କରିବାକୁ ପଡ଼ୁଥିଲା। ଏହି ଅବସରରେ ମୁଁ ଅନେକ ବର୍ଗର ଲୋକଙ୍କ ସହିତ ଭେଟିବାର ଓ କାମ କରିବାର ସୁଯୋଗ ପାଇଲି। ତାହା ହିଁ ମୋ ଜୀବନର ମୋଡ଼ ବଦଳାଇ ଦେଲା। ଜୀବନ କ୍ଷୀପ୍ର ହୋଇଗଲା; କିନ୍ତୁ ହିମାଳୟରୁ ପାଇଥିବା ଶାନ୍ତି ଆଉ ନଥିଲା। ସେହି ଦିନଠାରୁ ନିଷ୍ପତ୍ତି ନେଲି ବର୍ଷକରେ ଥରେ ୫ ଦିନ ଏକୁଟିଆ ରହିିବି। ବେଳେ ବେଳେ କିଛି ଲୋକ ମୋତେ ପଚାରନ୍ତି କେଉଁଠାକୁ କାହା ପାଖକୁ ଯାଉଛ? ମୁଁ ଉତ୍ତର ଦିଏ ମୋ ନିଜକୁ ଭେଟିବାକୁ।’