ପିପିଲି:ପିପିଲି ଦେଇ ପ୍ରବାହିତ ଦୟାନଦୀର କଣ୍ଟି ଠାରେ କୁମ୍ଭୀର ଆତଙ୍କ ଦେଖାଦେଇଛି। ସୋମବାର ସକାଳେ କେତେକ ଗ୍ରାମବାସୀ ନଦୀକୁ ଗାଧୋଇବାକୁ ଯାଇଥିବା ବେଳେ କଣ୍ଟି ଖେଳପଡ଼ିଆ ନିକଟରେ ଦୟାନଦୀରେ ଏକ ଘଡିଆଳ କୁମ୍ଭୀର ପାଣିରେ ଯାଉଥିବା ଦେଖିବାକୁ ପାଇଥିଲେ। କୁମ୍ଭୀରଟି ନଦୀରେ ଏକ ଚଢେଇକୁ ଖାଉଥିବା ପରିଲକ୍ଷିତ ହୋଇଥିବା ବେଳେ ଗ୍ରାମର କେତେକ ଯୁବକ ଏହାକୁ ମୋବାଇଲ ଫୋନ୍ରେ ରେକଡିଂ କରିଥିଲେ। ଏହାକୁ ନେଇ ନଦୀକୂଳିଆ ଅଞ୍ଚଳବାସୀଙ୍କ ମଧ୍ୟରେ ଆତଙ୍କ ଖେଳିଯାଇଛି। ଭୟରେ କେହି ନଦୀକୁ ଗାଧୋଇବାକୁ କିମ୍ବା ଶୌଚ ହେବାକୁ ଯାଉନଥିବା ସୂଚନା ମିଳିଛି।
ଖବର ପ୍ରଚାର ହେବା ପରେ କୁମ୍ଭୀରକୁ ଦେଖିବା ପାଇଁ ଆଖପାଖ ଅଞ୍ଚଳର ଶତାଧିକ ଲୋକେ ସେଠାରେ ଭିଡ ଜମାଇଥିଲେ। ଖବର ପାଇ ପିପିଲି ତହସିଲଦାର ଦିଲିପ କୁମାର ମାଝୀ ଏସଂପର୍କରେ ବନ ବିଭାଗର ବାଳକାଟୀ ରେଞ୍ଜର ରେଶମା ପରିଡାଙ୍କୁ ଜଣାଇଥିଲେ। ରେଞ୍ଜରଙ୍କ ନିର୍ଦ୍ଦେଶକ୍ରମେ ବନ ବିଭାଗର କର୍ମଚାରୀମାନେ ଘଟଣାସ୍ଥଳରେ ପହଞ୍ôଚଥିବା ସୂଚନା ମିଳିଛି। ତେବେ ନଦୀ ମଧ୍ୟରୁ କୁମ୍ଭୀରକୁ ଧରିବା କଷ୍ଟସାଧ୍ୟ ହୋଇଥିବା ବେଳେ କେତେକ ଯୁବକ ଟେକା ମାରିବା ଫଳରେ କୁମ୍ଭୀରଟି ସେଠାରୁ ଦୂରକୁ ଚାଲିଯାଇଥିବା ଜଣାଯାଇଛି।
ରବିବାର ଦିନ କୁଆଖାଇ ନଦୀର ଟଙ୍କପାଣି ପୋଲ ରଙ୍ଗବଜାର ନିକଟରେ ଏକ କୁମ୍ଭୀର ନଦୀରେ ଦେଖିବାକୁ ମିଳିଥିବା ବେଳେ ସେହି କୁମ୍ଭୀରଟି ଦୟାନଦୀକୁ ଚାଲି ଆସିଥାଇପାରେ ବୋଲି ସାଧାରଣରେ ଅନୁମାନ କରାଯାଉଛି।
Comments are closed.