ଜନସ୍ୱାର୍ଥର ରକ୍ଷକ ଥିଲେ ପିପିଲିର ପୂର୍ବତନ ବିଧାୟକ ଯୁଧିଷ୍ଠିର ସାମନ୍ତରାୟ

ପିପିଲି:ସୁସଂଗଠକ, କଂଗ୍ରେସ ଦଳର ବରିଷ୍ଠ ରାଜନେତା ତଥା ପିପିଲିର ପୂର୍ବତନ ବିଧାୟକ ଯୁଧିଷ୍ଠିର ସାମନ୍ତରାୟ ଜନସ୍ୱାର୍ଥର ରକ୍ଷକ ଥିଲେ ବୋଲି ବିଶିଷ୍ଠ ବ୍ୟକ୍ତିମାନେ ମତବ୍ୟକ୍ତ କରିଛନ୍ତି। ସ୍ୱର୍ଗତ ସାମନ୍ତରାୟଙ୍କ ପ୍ରଥମ ଶ୍ରାଦ୍ଧବାର୍ଷିକୀ ଅବସରରେ ମାଧିପୁର ଗ୍ରାମରେ ଶୁକ୍ରବାର ସଂନ୍ଧ୍ୟାରେ ଅନୁଷ୍ଠିତ ସ୍ମୃତିଚାରଣ ସଭାରେ ଯୋଗଦେଇ ବହୁ ବିଶିଷ୍ଟ ବ୍ୟକ୍ତି ସ୍ୱର୍ଗତ ସାମନ୍ତରାୟଙ୍କ ସ୍ମୃତିଚାରଣ କରିବା ସହ ପିପିଲି-ଡେଲାଙ୍ଗ ଅଞ୍ଚଳର ବିକାଶ ପ୍ରତି ଥିବା ତାଙ୍କର ଅବଦାନ ସଂପର୍କରେ ଆଲୋକପାତ କରିଥିଲେ। ସେଠାରେ ନାମ ସଂକୀର୍ତ୍ତନ ଓ ଭଜନ ସମାରୋହ ଅନୁଷ୍ଠିତ ହୋଇଥିଲା।
ଏହି ଅବସରରେ ଶୁକ୍ରବାର ପୂର୍ବାହ୍ନରେ ସ୍ୱର୍ଗତ ସାମନ୍ତରାୟଙ୍କ ସୁପୁତ୍ର ତଥା ଓଡିଶା ରାଜ୍ୟ ଖାଦ୍ୟ ଆୟୋଗ ସଦସ୍ୟ ପ୍ରିୟବ୍ରତ ସାମନ୍ତରାୟ ନିଜର ସମର୍ଥକଙ୍କ ସହ ପିପିଲି ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର, ମଙ୍ଗଳପୁର ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ର, ଡେଲାଙ୍ଗ ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରରେ ରୋଗୀମାନଙ୍କୁ କ୍ଷୀର, ପାଉଁରୁଟି ଓ ଫଳ ବଣ୍ଟନ କରିଥିବା ବେଳେ ପିପିଲି ସ୍ଥିତ ବୃଦ୍ଧାଶ୍ରମର ଅନ୍ତେବାସୀଙ୍କୁ ଶୁଖିଲା ଖାଦ୍ୟ ବଣ୍ଟନ କରିଥିଲେ। ପରେ ପିପିଲି ପଶୁଡାକ୍ତରଖାନା ପରିସରରେ ଥିବା ଗୋରୁଗାଇଙ୍କୁ ଗୋଖାଦ୍ୟ ପ୍ରଦାନ କରାଯାଇଥିଲା। ଏହା ପରେ ପିପିଲି ସ୍ଥିତ ବାସଭବନ ସମ୍ମୁଖରେ ଓ ମାଧିପୁର ଠାରେ ନିର୍ମିତ ସ୍ୱର୍ଗତ ସାମନ୍ତରାୟଙ୍କ ଦୁଇଟି ପ୍ରତିମୂର୍ତ୍ତୀକୁ ଲୋକାର୍ପଣ କରାଯାଇଥିଲା। ଏହି କାର୍ଯ୍ୟକ୍ରମରେ ପୂର୍ବତନ ବିଧାୟକ ରୁଦ୍ରପ୍ରତାପ ମହାରଥୀ, ଜଟଣୀ ବିଧାୟକ ବିଭୂତି ଭୂଷଣ ବଳବନ୍ତରାୟ, ପୂର୍ବତନ ବ୍ଲକ ଅଧ୍ୟକ୍ଷ ପୂର୍ଣ୍ଣଚନ୍ଦ୍ର ସ୍ୱାଇଁ, ଏନ୍‌‌ଏସି ଅଧ୍ୟକ୍ଷ ସେକ୍‌‌ ବାବୁ, ଉପାଧ୍ୟକ୍ଷା ଭାଗ୍ୟବତୀ ମହାରଣା, ପୁରୀ ଜିଲା ଯୁବ ବିଜେଡି ସଭାପତି ନାରାୟଣ ସ୍ୱାଇଁ, ବରିଷ୍ଠ ନେତା ସୁଧିର ପ୍ରଧାନ, ଅଲ୍ଲୀ ବାବୁଲା, ପୂର୍ବତନ ସମିତିସଭ୍ୟ ଜିତୁପ୍ରକାଶ ପରିଡା, ଯୁବନେତା ପ୍ରମୋଦ ପଲେଇ, ବିଷ୍ଣୁ ପ୍ରସାଦ ଦଳେଇ ପ୍ରମୁଖ ଉପସ୍ଥିତ ଥିଲେ।