ପିପିଲି:ପିପିଲି ଥାନା ଅନ୍ତର୍ଗତ ସାତଶଙ୍ଖ ବଜାର ନିକଟବର୍ତ୍ତୀ ସୁବଳପୁର ଗ୍ରାମ୍ୟଛକ ଠାରେ ଥିବା ଗଙ୍ଗାଧର ବିଶ୍ୱାଳଙ୍କ ଦୋକାନ ଉପରକୁ ରବିବାର ଅପରାହ୍ନରେ ବୋମାମାଡ ହୋଇଥିବା ଅଭିଯୋଗ ହୋଇଛି। ଏଥିରେ କେହି ମୃତାହତ ହୋଇନଥିବା ବେଳେ ଦୋକାନରେ ଥିବା କେତେକ ସାମଗ୍ରୀ ନଷ୍ଟ ହୋଇଯାଇଛି। ପୂର୍ବ ବିବାଦକୁ ନେଇ ଏହି ଘଟଣା ଘଟିଥିବାର ସୂଚନା ମିଳିଥିବା ବେଳେ ପୁଲିସ ଘଟଣାସ୍ଥଳରେ ପହଞ୍ଚି ତଦନ୍ତ ଚଳାଇଛି।
ଅଭିଯୋଗ ଅନୁଯାୟୀ, ସାତଶଙ୍ଖ ଫାଣ୍ଡି ଅନ୍ତର୍ଗତ ସୁବଳପୁର କଲୋନୀର ବାସିନ୍ଦା ଗଙ୍ଗାଧର ବିଶ୍ୱାଳଙ୍କ ପୁତୁରା ସହ ଅନ୍ୟ ଜଣେ ଯୁବକର ଗତକାଲି ସଂନ୍ଧ୍ୟାରେ କୌଣସି କଥାକୁ ନେଇ ଗଣ୍ଡଗୋଳ ଘଟିଥିଲା। ରବିବାର ଅପରାହ୍ନ ୨ଟା ୨୦ ମିନିଟ୍ ସମୟରେ ଗଙ୍ଗାଧର ଦୋକାନରେ ନଥିବା ବେଳେ ଉକ୍ତ ଯୁବକ ଜଣକ ସେଠାକୁ ଆସି ଦୋକାନକୁ ଲକ୍ଷ୍ୟ କରି ୩ଟି ସୁତୁଲି ବୋମା ପକାଇଥିବା ଅଭିଯୋଗ ହୋଇଛି। ଦୋକାନରେ ଥିବା ତାଙ୍କ ପତ୍ନୀ ଓ ଶିଶୁପୁତ୍ର ଜୀବନ ବିକଳରେ ଦୋକାନ ଛାଡି ପଳାଇଥିଲେ। ଖବର ପାଇ ସାତଶଙ୍ଖ ଫାଣ୍ଡି ଅଧିକାରୀ ପ୍ରଫୁଲ୍ଲ କୁମାର ଭୂୟାଁ ଘଟଣାସ୍ଥଳରେ ପହଞ୍ôଚ ତଦନ୍ତ ଚଳାଇଥିଲେ। ତେବେ ଏହା ବୋମା ନୁହେଁ ବାଣ ହୋଇଥାଇପାରେ ବୋଲି ଫାଣ୍ଡି ଅଧିକାରୀ ସୂଚନା ଦେଇଛନ୍ତି। ରିପୋର୍ଟ ଲେଖାଯିବା ପର୍ଯ୍ୟନ୍ତ ଏନେଇ ପୁଲିସରେ କୌଣସି ଲିଖିତ ଅଭିଯୋଗ ହୋଇନଥିବା ସୂଚନା ମିଳିଛି।
