ଫୁଲବାଣୀ: ବାକିରେ ୫-ଟି ସ୍କୁଲ ନିର୍ମାଣ କରି ବାଃ ବାଃ ନେବା ବ୍ଲକ ପ୍ରଶାସନ ପାଇଁ ମହଙ୍ଗା ପଡ଼ିଛି। ସ୍କୁଲ ନିର୍ମାଣ ଦେୟ ବାକି ଥିବାରୁ ୫-ଟି ସ୍କୁଲରେ ତାଲା ପକାଇଦେଇଛନ୍ତି ଦୁଇ ଜଣ ପେଟି ଠିକାଦାର। ଏଭଳି ଅଭାବନୀୟ ଘଟଣା ଦେଖିବାକୁ ମିଳିଛି କନ୍ଧମାଳ ଜିଲ୍ଲା ସଦର ମହକୁମା ଫୁଲବାଣୀ ବ୍ଲକ ଅନ୍ତର୍ଗତ ବିଶିପଡ଼ା ଶ୍ରୀଦେବୀ ଉଚ୍ଚ ବିଦ୍ୟାଳୟରେ। ସ୍କୁଲ ୫-ଟି ରୂପାନ୍ତରଣ ହେବାର ବର୍ଷେରୁ ଊର୍ଦ୍ଧ୍ବ ସମୟ ବିତିଯାଇଥିଲେ ସୁଦ୍ଧା ଦୁଇ ପେଟି ଠିକାଦାର ଭଗବାନ ସାହୁ ଓ ଗୋପବନ୍ଧୁ ସାହାଣୀ(ଉଭୟ ବିଶିପଡ଼ାର)ଙ୍କୁ ୩୫ ଲକ୍ଷରୁ ଊର୍ଦ୍ଧ୍ବ ଟଙ୍କା ମିଳିନଥିବା ଅଭିଯୋଗରେ ଶୁକ୍ରବାର ଦୁଇ ଠିକାଦାର ଗ୍ରାମବାସୀଙ୍କ ସହାୟତାରେ ସ୍କୁଲରେ ତାଲା ପକାଇ ଦେଇଥିଲେ। ସ୍କୁଲର ସମସ୍ତ ଶିକ୍ଷକ ଶିକ୍ଷୟତ୍ରୀ ଏବଂ ଛାତ୍ରଛାତ୍ରୀମାନଙ୍କୁ ବାହାର କରି ଦୁଇ ଠିକାଦାର ସ୍କୁଲର ମୁଖ୍ୟ ଫାଟକରେ ତାଲା ପକାଇ ଦେଇଥିଲେ। ଫଳରେ ସମସ୍ତ ଶିକ୍ଷକ ଶିକ୍ଷୟତ୍ରୀ ଏବଂ ଛାତ୍ରଛାତ୍ରୀ ସ୍କୁଲ ବାହାରେ ରହି ହଟାହଟା ହୋଇଥିଲେ। ଦୀର୍ଘ ୨ ଘଣ୍ଟା ପରେ ସ୍କୁଲରେ ଫୁଲବାଣୀ ବ୍ଲକର ଅତିରିକ୍ତ ଗୋଷ୍ଠି ଉନ୍ନୟନ ଅଧିକାରୀ ସନ୍ତୋଷ କୁମାର ଦିଗାଲ ପହଞ୍ଚି ଦୁଇ ଠିକାଦାରଙ୍କ ବକେୟା ନିର୍ମାଣ ଟଙ୍କା ୧୦ ଦିନ ମଧ୍ୟରେ ଦିଆଯିବ ବୋଲି ପ୍ରତିଶୃତି ଦେବା ପରେ ସ୍କୁଲର ତାଲା ଖୋଲିଥିଲେ ଦୁଇ ଠିକାଦାର। ତେବେ ତୁରନ୍ତ ଠିକାଦାରମାନଙ୍କର ଟଙ୍କା ଦେଇଦେବାକୁ ଅଞ୍ଚଳବାସୀ ମଧ୍ୟ ଦାବୀ କରିଛନ୍ତି।
Popular Categories
Previous article
Next article