ଫୁଲବାଣୀ: ଫୁଲବାଣୀ ଆଦର୍ଶ ଥାନାରେ କାର୍ଯ୍ୟରତ ଥିବା ମହିଳା ଗୃହରକ୍ଷୀ ଅନୁ ବେହେରାଙ୍କ ଅକାଳ ବିୟୋଗ ଘଟିଥିବା ବେଳେ କନ୍ଧମାଳ ଜିଲ୍ଲା ପଞ୍ଜୀକୃତ ହୋମାଗାର୍ଡ ସଂଘରର କର୍ମକର୍ତ୍ତା ମାନେ ଆଜି ଉକ୍ତ ଗୃହରକ୍ଷୀଙ୍କ ପରିବାର ପାଖରେ ପହଞ୍ଚି ରାସନ ସାମଗ୍ରୀ ଓ କିଛି ଆର୍ଥିକ ସହାୟତା ପ୍ରଦାନ କରିବା ସହିତ ଶୋକ ସନ୍ତାନ ପରିବାରକୁ ସମବେତନା ଜଣାଇଛନ୍ତି ।
ଜିଲ୍ଲା ହୋମଗାର୍ଡ ସଂଘର ସଭାପତି ପ୍ରଭାତ କୁମାର ସାହାଣୀ, ଉପସଭାପତି ବିରାଜ କୁମାର ପ୍ରଧାନ, କାର୍ଯ୍ୟକାରୀ ସଭାପତି ଅକ୍ଷୟ କୁମାର ରାୟ, କୋଷାଧ୍ୟକ୍ଷ ଏସ.କେ.ରିହାଜୁଦିନ୍ଙ୍କ ସମେତ ରାଉଟଥାନା ହୋମଗାର୍ଡ ସଂଘର ସଭାପତି ରାଜ କୁମାର ବେହେରା, ଉପସଭାପତି ସାଫ୍ରିନ୍ ଖାନ, ସହ ସଂପାଦକ ଚିଦାନନ୍ଦ ଦାସ, କୋଷାଧ୍ୟକ୍ଷ ଜୟନ୍ତୀ ଚୌଧୁରୀ, ଉପକୋଷାଧ୍ୟକ୍ଷ ଭଜରାମ ନାୟକ ଓ ସଂଘର କର୍ମକର୍ତ୍ତା ସରୋଜ ଦାସ , ସୁନୀତା ପାତ୍ର , ଶରସ୍ୱତୀ ନାୟକ , ଭାଗ୍ୟଲତା ନାୟକ ଓ ଅନ୍ୟମାନେ ଏଥିରେ ସାମିଲ୍ ହୋଇଥିଲେ ।
ସାରା ଜୀବନ ପୁଲିସ ବିଭାଗରେ ଗୃହରକ୍ଷୀ ଭାବେ କାର୍ଯ୍ୟକରିବା ସହିତ ଅନେକ ସମୟରେ ନିଜ ଜୀବନକୁ ବାଜି ଲଗାଇ ନିଷ୍ଠା ଓ ଆନ୍ତରିକତାର ସହିତ କାର୍ଯ୍ୟକରି ଆସୁଥିଲେ ମଧ୍ୟ ସରକାରୀ ସ୍ତରରେ ଗୃହରକ୍ଷୀ ମାନଙ୍କର ଦୁଃଖ ନବୁଝିବା ପରିତାପର ବିଷୟ ବୋଲି ସଂଘ ପକ୍ଷରୁ କୁହାଯାଇଛି । କୌଣସି ଗୃହରକ୍ଷୀଙ୍କର ବିୟୋଗ ଘଟିଲେ କିମ୍ବା ଅବସର ଗ୍ରହଣ କରିଲେ ମଧ୍ୟ ତାଙ୍କ ପରିବାରକୁ ସରକାରୀ ସ୍ତରରେ କୌଣସି ପ୍ରକାର ସହାୟତା କିମ୍ବା ସହଯୋଗ କରାଯାଉନାହିଁ । ଏପରିକି ପରିବାରର କୌଣସି ସଦସ୍ୟଙ୍କ ଥଇଥାନ ବ୍ୟବସ୍ଥା ମଧ୍ୟ ନାହିଁ ।
କାର୍ଯ୍ୟରତ ଗୃହରକ୍ଷୀଙ୍କ ଦେହାନ୍ତ ଘଟିଲେ ମଧ୍ୟ ତାଙ୍କ ପରିବାରକୁ କୌଣସି ପ୍ରକାର ସୁବିଧା ଯୋଗାଇ ଦିଆଯାଉନାହିଁ । ଏଥିପ୍ରତି ସରକାରୀ ଦୃଷ୍ଟିଦେବାକୁ ସଂଘ ପକ୍ଷରୁ ଦାବି କରାଯାଇଛି ।
