ଭୁବନେଶ୍ବର: କରୋନା ସଂକ୍ରମଣ ସାରା ବିଶ୍ବକୁ କବଳିତ କରିଥିବା ବେଳେ ରାଜ୍ୟ ମଧ୍ୟ ପ୍ରଭାବିତ ହୋଇଛି। ସେଥିପାଇଁ ଲକଡାଉନ କରାଯାଇଥିବା ବେଳେ କଟକଣା କୋହଳ ହେଲେ ମଧ୍ୟ ସାମାଜିକ ଦୁରତ୍ବ ସହ ମାସ୍କ ପିନ୍ଧିବା କଟକଣା ବଳବତ୍ତର ରହିବା ସମ୍ଭାବନା ରହିଛି। ଏଭଳି ପରିସ୍ଥିତିରେ ରଥଯାତ୍ରା କରାଯିବା ନିଷ୍ପତି ଠିକଣା ଭାବେ ବିଚାରବିମର୍ଷ କରି ନିଆଯିବା ଦରକାର ବୋଲି ପ୍ରଦେଶ କଂଗ୍ରେସ କମିଟି ସଭାପତି ନିରଞ୍ଜନ ପଟ୍ଟନାୟକ ପରାମର୍ଶ ଦେଇଛନ୍ତି।
ଏ ସଂକ୍ରାନ୍ତରେ ସେ ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କୁ ଚିଠି ଲେଖି କରୋନା ସ୍ଥିତି ସ୍ପର୍ଶକାତର ହୋଇଥିବାରୁ ଜଗତଗୁରୁ ଶଙ୍କରାଚାର୍ୟ୍ୟ ଓ ଶ୍ରୀମନ୍ଦିର ପରିଚାଳନା କମିଟି ସହ ଆଲୋଚନା କରି ନିଷ୍ପତି ନେବାକୁ ପରାମର୍ଶ ଦେଇଛନ୍ତି। ସେ ଆହୁରି ଦର୍ଶାଇଛନ୍ତି ଯେ ରାଜ୍ୟରେ ଅନେକ ମଠ, ମନ୍ଦିର ତଥା ଧର୍ମାନୁଷ୍ଠାନର ପୂଜକମାନେ ଆର୍ଥିକ ଦୁର୍ଗତିରେ ଗତି କରୁଛନ୍ତି। ଶ୍ରୀମନ୍ଦିର ପୂଜକଙ୍କ ପରିବାରକୁ ୫ ହଜାର ଟଙ୍କା ଲେଖାଏଁ ସହାୟତା ଢ଼ାଞ୍ଚାରେ ସେମାନଙ୍କୁ ଦିଆଯାଉ ବୋଲି ପିସିସି ସଭାପତି ଶ୍ରୀ ପଟ୍ଟନାୟକ ଦାବି କରିଛନ୍ତି।
