ପାଟଣା – ପାଣି ପଞ୍ଚାୟତ ପକ୍ଷ ପାଳନ ସମୟରେ ଚାଷୀ ମାନଙ୍କୁ ଖରାଦିନିଆ ଧାନ ଆଦି ଅନ୍ୟାନ୍ୟ ରବି ଫସଲ ପାଇଁ କାନଝରୀ କେନାଲର ଡାହାଣ ପାର୍ଶ୍ଵ କେନାଲ ରେ ପାଣି ଛାଡ଼ିବାକୁ ପ୍ରତିଶ୍ରୁତି ଦେଇ ଚାଷୀ ମାନଙ୍କୁ ନିୟମିତ ବ୍ୟବଧାନରେ ପାଣି ଛଡା ଯାଉନଥିବାରୁ ଶୁକ୍ରବାରରେ ତୋରାଣିପୋଖରୀ ପଞ୍ଚାୟତ ପୋଇପାଣି ଅଞ୍ଚଳର ଚାଷୀମାନେ ବିରୋଧ ପ୍ରଦର୍ଶନ କରିଛନ୍ତି । ବିଭାଗୀୟ ଏସ ଡି ଓ ଚତୁର୍ଭୁଜ ନାୟକଙ୍କୁ ଗାଁଆ କୁ ଡକାଇ ଏହାର ସମାଧାନା କରିବାକୁ ଦାବି କରିବା ସହ ତାଙ୍କୁ ଅଟକ ରଖିଥିଲେ ।
ଉପରିସ୍ଥ ଅଧିକାରୀଙ୍କ ନିର୍ଦ୍ଦେଶରେ ପାଣି ଛଡା ଯାଉ ନଥିବା ଓ କୃଷିବିଭାଗ ଖରାଦିନିଆ କୃଷି ସମ୍ବନ୍ଧୀୟ କାର୍ଯକ୍ରମ ସୂଚନା ଦେଇନଥିବା ବାହାନା କରୁଥିବା ଏହି ଅଧିକାରି ଙ୍କ କଥାକୁ କୃଷି ବିଭାଗ ଅସ୍ବୀକାର କରିବା ପରେ ଚାଷୀମାନେ ଆନନ୍ଦପୁର ଗ୍ରସ୍ତରେ ଥିବା କେନ୍ଦୁଝର ସାଂସଦ ଅନନ୍ତ ନାୟକ ଓ ମୂଖ୍ୟମନ୍ତ୍ରୀଙ୍କ ପ୍ରତିନିଧି ଯୋଗାଯୋଗ କରିଥିଲେ । ଏହି ଦୁଇ ନେତାଙ୍କ ହସ୍ତକ୍ଷେପ ପରେ ଅଧିକାରୀ ଜଣକ ଆ ସନ୍ଧ୍ୟା ସୁଦ୍ଧା କାନଝରୀ ଡାହାଣ ପାର୍ଶ୍ଵ କେନାଲ ରେ ପାଣି ଛାଡ଼ିବାର ପ୍ରତିଶ୍ରୁତି ଦେଇ ସେଠାରୁ ମୁକୁଳିଥିବା ଜଣାପଡିଛି ।
ଜଳସେଚନ ବିଭାଗକୁ ଭରଷା କରି ଏହି ଅଞ୍ଚଳର ଲୋକେ ଶତାଧିକ ଏକର ଜମିରେ ଧାନଚାଷ, ସୂର୍ଯ୍ୟମୁଖି, ସୋରିଷ, ଚିନାବାଦାମ, ମକା ଆଦି ରବିଫସଲ କରିଥିବା ବେଳେ ୧୫ ଦିନ ହେଲା କେନାଲରେ ପାଣି ଛଡାଯାଉନ ଥିବାରୁ ବାଧ୍ୟ ହୋଇ ଚାଷୀ ମାନେ ଆନ୍ଦୋଳନ ମୁହାଁ ହୋଇଥିଲେ । ତେବେ ସନ୍ଧ୍ୟା ସୁଦ୍ଧା କେନାଲ ରେ ପାଣି ଆସିଥିବା ଜଣାପଡ଼ିଛି।
