ନଦୀ ଶଯ୍ୟାରୁ ବାଲି ଉତ୍ତୋଳନ କରୁଥିଲା ଜେସିବି, ଜବତ କଲା ବନ ବିଭାଗ 

ପାଟଣା : ପାଟଣା ତହସିଲ ଅନ୍ତର୍ଗତ ଅଙ୍କୁରା ବୈତରଣୀ ନଦୀ ଶଯ୍ୟାରୁ ବାଲି ଉତ୍ତୋଳନ କରୁଥିବାବେଳେ ୨ଟି ଜେସିବି ମେସିନକୁ ବନବିଭାଗ ଜବତ କରିଛି। ହାତୀ ଚଲାପଥ ଥିବା ଜଙ୍ଗଲ ସଂଲଗ୍ନ ଏହି ନଦୀ ଶଯ୍ୟାରେ ରାତି ଅଧିଆ ବାଲି ଉତ୍ତୋଳନ ହେଉଥିବା ଖବର ପାଇ କେନ୍ଦୁଝର ଡିଏଫଓ ଏଚ.ଡି.ଧନରାଜ, ପାଟଣା ବନାଞ୍ଚଳ ଅଧିକାରୀ ବନବିହାରୀ ସର୍ଦ୍ଧାର, ପାଟଣା ବନପାଳ ପିଅନ ନାଏକ ଓ ବନବିଭାଗ ମୋବାଇଲ ୟୁନିଟ ଘଟଣାସ୍ଥଳରେ ପହଞ୍ଚିଥିଲେ।

ଏହି ଚଢାଉ ସମୟରେ ବାଲି ବୋଝେଇ ହାଇୱା ଖସି ଯିବାରେ ସମର୍ଥ ହୋଇଥିବା ବେଳେ କେବଳ ୨ଟି ଜେସିବିକୁ ବନ ବିଭାଗ ଜବତ କରିଛି । ଏହାର ଚାଳକଙ୍କୁ ବନବିଭାଗ ଜାମିନରେ ଛାଡି ଦେଇଥିବା ବେଳେ ଲଘୁ ଖଣିଜ ବେଆଇନ ଉତ୍ତୋଳନ ପାଇଁ ଖଣି ବିଭାଗ ଜୋରିମାନା ଧାର୍ଯ୍ୟ କଲାପରେ ଜେସିବି ମେସିନକୁ ଛଡାଯିବ ବୋଲି ବନବିଭାଗ ସୂଚନା ଦେଇଛି।