ପାଟଣା: ବର୍ଷା ପବନରେ ୫ଟି ବିଦ୍ୟାଳୟର ଉଡିଗଲା ଟିଣ ଛପର। କେନ୍ଦୁଝର ଜିଲା ସାହାରପଡା ବ୍ଲକ ଦାମାହୁଦା ପଞ୍ଚାୟତ ଗୋଜାପଥର ସରକାରୀ ଉଚ୍ଚ ବିଦ୍ୟାଳୟର ଟିଣ ଛପର ବର୍ଷା ପବନରେ ଉଡିଯାଇଛି। ବିଦ୍ୟାଳୟକୁ ୫-ଟି ଯୋଜନାରେ ସାମିଲ କରାଯାଇ ରୂପାନ୍ତରିକରଣ କାର୍ଯ୍ୟ ହୋଇଥିଲା। ଗୁରୁବାର ସଂଧ୍ୟାରେ ପ୍ରବଳ ପବନ ବହିବା କାରଣରୁ ବିଦ୍ୟାଳୟର ୮ ବଖରା ଘରେ ଲାଗିଥିବା ଟିଣ ଛପର ଉପୁଡି ଉଡ଼ି ଯାଇ ନଷ୍ଟ ହୋଇଯାଇଛି।
ବିଦ୍ୟାଳୟ ଛୁଟି ରହିଥିବାରୁ ଏକ ବଡ ଦୁର୍ଘଟଣା ଅଳ୍ପକେ ଟଳି ଯାଇଛି। ଗତ ୧୪ ନଭେମ୍ବର ୨୦୨୧ ମସିହାରେ ମୁଖ୍ୟମନ୍ତ୍ରୀ ଏହାକୁ ଆଭାସି କାର୍ଯ୍ୟକ୍ରମ ମାଧ୍ୟମରେ ଉଦଘାଟନ କରିଥିଲେ। ବିଦ୍ୟାଳୟର ଉନ୍ନତି କରଣ କାର୍ଯ୍ୟ ଅତ୍ୟନ୍ତ ନିମ୍ନମାନର ହୋଇଥିବା ଯୋଗୁଁ ଏପରି ପରିସ୍ଥିତି ସୃଷ୍ଟି ହୋଇଥିବା ସ୍ଥାନୀୟ ଲୋକେ ଅଭିଯୋଗ କରିଛନ୍ତି। ଅନ୍ୟ ପକ୍ଷରେ ଜିଲାରେ ବିଦ୍ୟାଳୟ ରୂପାନ୍ତରଣ କାର୍ଯ୍ୟ ପାଇଁ ଜିଲ୍ଲା ଖଣିଜ ପାଣ୍ଠିରୁ କୋଟି କୋଟି ଟଙ୍କା ଖର୍ଚ୍ଚ ହେଉଥିଲେ ମଧ୍ୟ ପ୍ରଶାସନିକ ଅବହେଳା ଓ ଠିକାଦାରଙ୍କ ଲାଭଖୋର ମନୋବୃତ୍ତି ଯୋଗୁଁ ଜିଲାର ଅନେକ ବିଦ୍ୟାଳୟ ୫-ଟି ଯୋଜନାରେ ଅତ୍ୟନ୍ତ ନିମ୍ନମାନର କାମ ହୋଇଥିବା ଅଭିଯୋଗ ହୋଇଛି।
