ତୁରୁମୁଙ୍ଗା ଥାନା ଅଞ୍ଚଳରେ ଅବକାରୀ ବିଭାଗର ଚଢ଼ାଉ, ୬୩ ଲିଟର ଚୋରା ମଦ ସହ ୪ ଗିରଫ

ପାଟଣା: କେନ୍ଦୁଝର ଜିଲା ଅବକାରୀ ଅଧିକ୍ଷକ ସୀତାକାନ୍ତ ମୁଦୁଲିଙ୍କ ନିର୍ଦ୍ଦେଶ କ୍ରମେ ଆଜି ପାଟଣା ଅବକାରୀ ବିଭାଗ ପକ୍ଷରୁ ତୁରୁମୁଙ୍ଗା ଥାନା ଅଞ୍ଚଳର ବିଭିନ୍ନ ଗ୍ରାମରେ ଚଢ଼ାଉ କରାଯାଇ ୬୩ ଲିଟର ଚୋରା ମହୁଲି ମଦ ଜବତ କରାଯାଇଛି। ଏହାସହ ବେଆଇନ ମଦ କାରବାର ଅଭିଯୋଗରେ ୪ ଜଣଙ୍କୁ ଗିରଫ କରାଯାଇଛି। ଏହା ସହ ଦାଶରଥିପୁର ଗ୍ରାମରେ ଚାଲିଥିବା ଏକ ଚୋରା ମଦ ଭାଟି ଭାଙ୍ଗିବା ସହ ୩୬୦ କେଜି ମହୁଲ ପୋଚ ନଷ୍ଟ କରି ମଦରନ୍ଧା ସରଞ୍ଜାମ ଜବତ କରିଛି ଅବକାରୀ ବିଭାଗ।

ଗିରଫ ଅଭିଯୁକ୍ତମାନେ ହେଲେ ଦାଶରଥିପୁର ଗ୍ରାମର ପଦ୍ମାବତୀ ମୁଣ୍ଡା, ଗୋଡିପୋଖରୀ ଗ୍ରାମର ଗୀତା ମୁଣ୍ଡା ଓ ସବିତା ରାଣୀ ମୁଣ୍ଡା, କଣ୍ଟିଆପଡା ଗ୍ରାମର ଦେବକୀ ବେହେରା ବୋଲି ଜଣାପଡିଛି। ତେବେ ଘଟଣାରେ ୫ ଟି ମାମଲା ରୁଜୁ ହୋଇଥିବା ବେଳେ ଅବକାରୀ ବିଭାଗ ୪ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ଏହି ଚଢ଼ାଉରେ ପାଟଣା ଅବକାରୀ ଥାନା ଅଧିକାରୀ ଜନାର୍ଦ୍ଦନ ପଲେଇଙ୍କ ସହ ଚମ୍ପୁଆ ଓ ଝୁମ୍ପୁରା ଅବକାରୀ ବିଭାଗର କର୍ମଚାରୀ ସାମିଲ ଥିଲେ ।