ଲାହୋର.- କୁଏତର ପାକିସ୍ତାନକୁ ଅତିଥି ଭାବେ ଆସିଥିବା କିଛି ସରକାରୀ ପ୍ରତିନିଧି । ଏମାନଙ୍କ ମଧ୍ୟରୁ ଜଣଙ୍କର ପର୍ସ ବା ଅର୍ଥ ଥିବା ବଟୁଆଟି ଚୋରି ହୋଇଯାଇଥିଲା। ଏକ ବୈଠକ ଚାଲିଥିବା ବେଳେ ଏହି ଘଟଣା ଘଟିଥିଲା । ପାକିସ୍ତାନରେ ପୁଞ୍ଜି ନିବେଶ ପାଇଁ ଏହି ଦୁଇ ଦିନିଆ ବୈଠକ ଚାଲିଥିଲା । କୁଏତ୍ର ପ୍ରତିନିଧି ଜଣଙ୍କ ବଟୁଆକୁ ଟେବୁଲ ଉପରେ ରଖି ଯ।ଇଥିଲେ । ଏହି ସମୟରେ କେହି ସେଠାରେ ଉପସ୍ଥିତ ନ ଥିଲେ । ସେ ଆସି ବଟୁଆକୁ ଖୋଜା ଖୋଜି କରିଥିଲେ । ଏଥିରେ ତାଙ୍କର ଡେବିଟ୍ କାର୍ଡ ସହ ଅନ୍ୟ କେତକ ଗୁରୁତ୍ୱପୂର୍ଣ୍ଣ ଜିନିଷ ଥିଲା । ମାତ୍ର ବଟୁଆଟି ମିଳି ନଥିଲା ।
ପରେ ସେଠାରେ ଥିବା ଅନ୍ୟ ଅଧିକାରୀମାନେ ସିସି ଟିଭି ଫୁଟେଜକୁ ଯାଞ୍ଚ କରିବା ପାଇଁ କହିଥିଲେ । ସିସିଟିଭି ଫୁଟେଜରୁ ପାକିସ୍ତାନର ପୁଞ୍ଜି ନିବେଶର ବିଭାଗର ବରିଷ୍ଠ ଅଧିକାରୀ ତଥା ଯୁଗ୍ମ ସଚିବ ଜରାର ହାଇଦର ଖାନ୍ ଏହାକୁ ଚୋରି କରୁଥିବା ଦେଖିବାକୁ ମିଳିଥିଲା । ସେ ଏହାକୁ ଚଟାପଟ ଉଠାଇ ନିଜ କମିଜର ପକେଟରେ ଏହାକୁ ରଖୁଥିବା ଦେଖିବାକୁ ମିଳିଥିଲା । ଏହାପରେ ତାଙ୍କୁ ଗିରଫ କରାଯାଇଛି । ଆଇନ ଅନୁଯାୟୀ ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପାକିସ୍ତାନର ସରକାର ସୂଚନା ଦେଇଛନ୍ତି ।
