ବିଦ୍ୱେଷମୂଳକ ଭାଷଣ, କୋଭିଡ ଆଇନ ଉଲ୍ଲଂଘନ ପାଇଁ ଓୱାଇସିଙ୍କ ବିରୁଦ୍ଧରେ ମାମଲା ରୁଜ୍ଜୁ

ନୂଆଦିଲ୍ଲୀ: ଅଖିଳ ଭାରତ ମଜଲିସ ଇ ଇତ୍ତେହାଦ ଉଲ୍‍ ମୁସଲିମିନ (ଏଆଇଏମଆଇଏମ) ମୁଖ୍ୟ ଆସାଦଉଦ୍ଦିନ ଓୱାଇସିଙ୍କ ବିରୁଦ୍ଧରେ ବିଦ୍ୱେଷମୂଳକ ଭାଷଣ ଦେବା ଏବଂ କୋଭିଡ-୧୯ ନିୟମର ଉଲ୍ଲଂଘନ ଅଭିଯୋଗରେ ମାମଲା ରୁଜ୍ଜୁ କରାଯାଇଛି। ଉତ୍ତର ପ୍ରଦେଶର ବାରବାଙ୍କି ଜିଲାରେ ଓୱାଇସି ନିଜ ଭାଷଣରେ ଏକ ନିର୍ଦ୍ଦିଷ୍ଟ ସଂପ୍ରଦାୟକୁ ଉସୁକାଇବା ଏବଂ ସାଂପ୍ରଦାୟିକ ସଦଭାବ ପ୍ରତି ଆଞ୍ଚ ଆଣିବାର ଅପଚେଷ୍ଟା କରିଥିବା ଅଭିଯୋଗ ହୋଇଛି। ବାରବାଙ୍କି ପୁଲିସ ଅଧୀକ୍ଷ୍‍କ ଯମୁନା ପ୍ରସାଦଙ୍କ କହିବା ଅନୁଯାୟୀ ଓୱାଇସି କୋଭିଡ-୧୯ ନିୟମାବଳୀ ସହିତ ତାଙ୍କୁ ମିଳିଥିବା ଅନୁମତିର ସର୍ତ୍ତଗୁଡିକୁ ଉଲ୍ଲଂଘନ କରିଥିଲେ। ତାହାସହିତ ସେ ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ଏବଂ ଉତ୍ତର ପ୍ରଦେଶ ମୁଖ୍ୟମନ୍ତ୍ରୀ ଯୋଗି ଆଦିତ୍ୟନାଥଙ୍କ ବିରୁଦ୍ଧରେ ନିଜ ଭାଷଣରେ ଦୁର୍ବ୍ୟବହାର କରିବା ଭଳି ଭାଷା ପ୍ରୟୋଗ କରିଥିଲେ। ସେଥିପାଇଁ ଗୁରୁବାର ରାତିରେ ଓୱାଇସିଙ୍କ ବିରୁଦ୍ଧରେ ଭାରତୀୟ ଦଣ୍ଡବିଧି ଆଇନର ଧାରା ୧୫୩ଏ, ୧୬୯ ଏବଂ ୧୭୦ ଧାରା ସହିତ ମହାମାରୀ ରୋଗୀ ଆଇନର ବିଭିନ୍ନ ଧାରାରେ ମାମଲା ରୁଜ୍ଜୁ କରାଯାଇଛି।

ଓୱାଇସି ନିଜ ଭାଷଣରେ ଅଭିଯୋଗ କରିଥିଲେ ଯେ ଚଳିତ ବର୍ଷ ଆରମ୍ଭରେ ପ୍ରଶାସନ ବାରବାଙ୍କିରେ ଶତାବ୍ଦୀ ପୁରାତନ ଏକ ମସଜିଦକୁ ଧ୍ୱଂସ କରିଦେଇଥିଲା। ଏହା ଏକ ରାଜନୈତିକ ଧ୍ୱଂସ ଲୀଳା ବୋଲି ସେ କହିଥିଲେ। ଉକ୍ତ ମସଜିଦ ଭାଙ୍ଗିବା ସମୟରେ ପ୍ରଶାସନ ଆଇନର ଅନୁପାଳନ କରିନଥିଲେ ଏବଂ ଏହି ଘଟଣା ବିରୁଦ୍ଧରେ ନକହିବାକୁ ବିରୋଧୀ ଦଳଗୁଡିକ ଉପରେ ଆକ୍ରମଣ କରିଥିଲେ। ଚଳିତ ବର୍ଷ ମଇ ମାସରେ ବାରବାଙ୍କି ପ୍ରଶାସନ ଦ୍ୱାରା ଉକ୍ତ ମସଜିଦକୁ ଭାଙ୍ଗି ଦିଆଯାଇଥିଲା। ତେବେ ସେ ମସଜିଦର ନାମ ଉଲ୍ଲେଖ କରିନଥିଲେ। ଓୱାଇସି ଏକଥା ମଧ୍ୟ କହିଥିଲେ ଯେ, ୨୦୧୪ରେ ଭାରତୀୟ ଜନଦା ପାର୍ଟି କ୍ଷମତାକୁ ଆସିବା ପରେ ଦେଶର ଧର୍ମନିରପେକ୍ଷତା ଦୁର୍ବଳ ହୋଇଯାଇଛି। ଏହି ଅବସରରେ ସେ ବେଆଇନ କାର୍ଯ୍ୟକଳାପ (ନିରାକରଣ) ଆଇନକୁ ବିରୋଧ କରୁନଥିବାରୁ ସମାଜବାଦୀ ପାର୍ଟି ଏବଂ ବହୁଜନ ସମାଜ ପାର୍ଟିକୁ ଦୃଢ ନିନ୍ଦା କରିଥିଲେ।