ବାଲିଗୁଡା/ଫୁଲବାଣୀ: କନ୍ଧମାଳ ଜିଲା ବାଲିଗୁଡ଼ା ବିଜ୍ଞାପିତ ଅଞ୍ଚଳ ପରିଷଦ ପକ୍ଷରୁ ଗୃହ ଟିକସ ଅନଲାଇନ୍ ମାଧ୍ୟମରେ ପ୍ରଦାନର ଶୁଭାରମ୍ଭ ହୋଇଯାଇଛି। ଅନୁଷ୍ଠିତ କାର୍ଯ୍ୟକ୍ରମରେ ଏନଏସି ଅଧ୍ୟକ୍ଷ ଲୋକନାଥ ପାଢୀ ଓ ବାଲିଗୁଡା ଏକ୍ସିସ ବ୍ୟାଙ୍କର ଶାଖା ପରିଚାଳକ ଦୀପକ ଦାସ ଓ ଜିଲ୍ଲା ସଂଯୋଜିକା ଲୀନା ଦାସ ଉପସ୍ଥିତ ରହି ଏହି ଏମପିଓଏସ ମେସିନର ଶୁଭାରମ୍ଭ କରିଛନ୍ତି। ବାଲିଗୁଡା ବିଜ୍ଞାପିତ ଅଞ୍ଚଳ ପରିଷଦରେ ଥିବା ସମସ୍ତ ଗୃହ, ଦୋକନ, ବିଭିନ୍ନ କାର୍ଯ୍ୟାଳୟ, ଭଡାଟିଆ ଗୃହ ଆଦି ସମସ୍ତ ହିତାଧିକାରୀ ଅନଲାଇନ ମାଧ୍ୟମରେ ଗୃହ ଟିକସ ପ୍ରଦାନ କରିବେ। ଏହି ଏମପିଓଏସ ମେସିନରେ ଘରର ନମ୍ବର ଦବେଇଲେ ଉକ୍ତ ଘରର କେତେ ଦେୟ ଦେବାକୁ ଅଛି ତାହା ଜଣାପଡିଯିବ ଓ ଗୃହ ମାଲିକ ଏହି ମେସିନ ଦ୍ୱାରା ଏଟିଏମ୍ କାର୍ଡ ମାଧ୍ୟମରେ ଗୃହର ଟିକସ ଦେଇପାରିବେ। ଟିକସ ଦେବାମାତ୍ରେ ହିଁ ଉକ୍ତ ମେସିନରୁ ଦେଇଥିବା ଟିକସର ରସିଦ ମିଳିଯିବ। ଆଜି ଏହି ଶୁଭାରମ୍ଭରେ ଏନଏସି ଅଧ୍ୟକ୍ଷ ଲୋକନାଥ ପାଢୀ ନିଜ ବାସଗୃହର ଟିକସ ପ୍ରଥମେ ଦେଇ ଏହାର ଶୁଭାରମ୍ଭ କରିଥିଲେ। କୋଭିଡ ପାଇଁ ଚଳିତ ବର୍ଷର ସେପ୍ଟେମ୍ବର ଓ ଅକ୍ଟୋବର ମାସର ଟିକସ ଉପରେ ଶତକଡା ଦଶଭାଗ ଛାଡ କରାଯାଇଛି। ବାଲିଗୁଡାରେ ଏହିଭଳି ଗୃହ ଟିକସ ପ୍ରଥମ ଥର ପାଇଁ ଅନଲାଇନରେ ଆଦାୟ କରାଯାଉଛି ଓ ଘରର ଭେଲୁଏସନ ଦେଖି ବାର୍ଷିକ ଟିକସ ଆଦାୟ କରାଯାଉଛି ବୋଲି ଏନଏସି କଲାର୍ଯ୍ୟାଳୟ ତରଫରୁ ସୂଚନା ଦିଆଯାଇଛି। ଟ୍ୟାକ୍ସ କଲେକ୍ଟର ଭାବେ ନିରଞ୍ଜନ ସାହୁ ଏହି କାର୍ଯ୍ୟପାଇଁ ନିୟୋଜିତ ଅଛନ୍ତି। ଆହିର ଏହି କାର୍ଯ୍ୟକ୍ରମକୁ ଏନଏସିର ମୁକେଶ ରଞ୍ଜନ ନାୟକ ଓ ଅନ୍ୟମାନେ ପରିଚାଳନା କରିଥିଲେ।
Comments are closed.