ହରିୟାଣାର କୁଣ୍ଡଳୀ ସୀମାରେ କେନ୍ଦ୍ର ସରକାରଙ୍କ କୃଷି ଆଇନ ବିରୋଧରେ ଚାଲିଥିବା ଆନ୍ଦୋଳନରେ ଆଉ ଜଣେ ଚାଷୀ ଆଖି ବୁଜିଛନ୍ତି। ଧାରଣା ସ୍ଥଳରେ ବସିଥିବା ଏହି ଚାଷୀ ଜଣକ ଅତ୍ୟଧିକ ଥଣ୍ଡା ସହ୍ୟ କରି ନ ପାରି ହୃଦ୍ଘାତର ଶିକାର ହେବା ଫଳରେ ତାଙ୍କର ମୃତ୍ୟୁ ଘଟିଛି।
କୃଷକ ଆନ୍ଦୋଳନରେ ବର୍ତ୍ତମାନ ସୁଦ୍ଧା ୯ ଚାଷୀଙ୍କ ମୃତ୍ୟୁ ଘଟିସାରିଛି। ଟିକରି ସୀମାରେ ଚାଲିଥିବା ଆନ୍ଦୋଳନ ସ୍ଥଳରେ ୬ ଚାଷୀଙ୍କର ମୃତ୍ୟୁ ଘଟିଥିବାବେଳେ କୁଣ୍ଡଳୀ ସୀମାରେ ୩ ଚାଷୀଙ୍କ ମୃତ୍ୟୁ ହୋଇସାରିଛି। ଅଧିକାଂଶ ଚାଷୀ ହୃଦ୍ଘାତ ଯୋଗୁ ପ୍ରାଣ ହରାଇଥିବା ଜଣାପଡ଼ିଛି। ମଙ୍ଗଳବାର ପ୍ରାଣ ହରାଇଥିବା ଚାଷୀ ଜଣକ ପଞ୍ଜବାର ମୋଗା ଜିଲା ଅନ୍ତର୍ଗତ ଭିଣ୍ଡର କଲାଙ୍ଗ ଗ୍ରାମର ମଖନ୍ ଖାନ୍(୪୨)।
ମଖନ୍ ୩ ଦିନ ତଳେ ଅନ୍ୟ ୨ ସାଥୀଙ୍କ ସହିତ କୁଣ୍ଡଳୀ ସୀମାରେ ଚାଲିଥିବା ଆନ୍ଦୋଳନ ସ୍ଥଳକୁ ଆସି ଧାରଣାରେ ବସିଥିଲେ। ସୋମବାର ତାଙ୍କ ଛାତିରେ ଯନ୍ତ୍ରଣା ହୋଇଥିଲା। ସେଠାରୁ ତାଙ୍କୁ ହସ୍ପିଟାଲ ନିଆଯାଇଥିଲା। ପରେ ତାଙ୍କର ମୃତ୍ୟୁ ଘଟିଛି। ଜଣେ ଆନ୍ଦୋଳନକାରୀ ଗୁରିନ୍ଦ୍ର ସିଂହ କହିଛନ୍ତି, ଥଣ୍ଡା ଯୋଗୁ ଚାଷୀମାନେ ହୃଦ୍ଘାତର ଶିକାର ହେଉଛନ୍ତି। ଥଣ୍ଡାରେ ରକ୍ତ ଜମାଟ ବାନ୍ଧି ଯାଉଥିବାରୁ ଚାଷୀଙ୍କ ଜୀବନ ଯାଉଛି। ତଥାପି ଚାଷୀମାନେ ଶେଷ ନିଃଶ୍ଵାସ ଥିବା ଯାଏ ଲଢ଼େଇ ଜାରି ରଖିବେ।
