ଆଠଗଡ : ଆଠଗଡ ଏନଏସି ପକ୍ଷରୁ ସ୍ଵାୟତ୍ତ ଶାସନ ଦିବସ ପାଳନ ଅବସରରେ ରବିବାର ସହରରେ ବିଭିନ୍ନ ପ୍ରକଳ୍ପ ଉଦଘାଟିତ ହେବା ସହ ଏକ ମାର୍କେଟ କମ୍ପ୍ଲେକ୍ସ ପାଇଁ ଶିଳାନ୍ୟାସ କରାଯାଇଛି । ଅଧ୍ୟକ୍ଷା ସସ୍ମିତା ରାଉତଙ୍କ ସଂଯୋଜନାରେ ଅନୁଷ୍ଠିତ ଏହି କାର୍ଯ୍ୟକ୍ରମରେ ବିଧାୟକ ରଣେନ୍ଦ୍ର ପ୍ରତାପ ସ୍ଵାଇଁ ମୁଖ୍ଯ ଅତିଥି ଭାବେ ଯୋଗଦେଇ ଆଠଗଡକୁ ଏକ ସରସ, ସୁନ୍ଦର, ସ୍ୱଚ୍ଛ ଓ ବିକଶିତ ସହରରେ ପରିଣତ କରିବା ପାଇଁ ବିଜ୍ଞାପିତ ଅଞ୍ଚଳ ପରିଷଦ ବଦ୍ଧପରିକର ବୋଲି ପ୍ରକାଶ କରିଥିଲେ । ଏଥିରେ ନିର୍ବାଚିତ ପାରିଷଦ ଏବଂ ସହରର ସମସ୍ତ ଅଧିବାସୀ ସହଯୋଗ କରିବା ଆବଶ୍ୟକ ବୋଲି ସେ ମତପୋଷଣ କରିଥିଲେ । ୯୦ ଦଶକର ମଧ୍ଯ ଭାଗରେ ନିର୍ମିତ ବିଜୁ ପଟ୍ଟନାୟକ ଶିଶୁ ଉଦ୍ୟାନର ଆବଶ୍ୟକତା ଅନୁଯାୟୀ ୭୫ ଲକ୍ଷ ଟଙ୍କା ବ୍ୟୟରେ ନବୀକରଣ କରାଯାଇଛି । ଏହାକୁ ବିଧାୟକ ସ୍ଵାଇଁ ଉଦଘାଟନ କରିଥିଲେ । ସେହିପରି ବିଧାୟକ ଉପଜିଲ୍ଲାପାଳଙ୍କ କାର୍ଯ୍ୟାଳୟ ପରିସର, ବିଜୁ ପଟ୍ଟନାୟକ କଲ୍ୟାଣ ମଣ୍ଡପ ପରିସର ଏବଂ ବଡ ପୋଖରୀ (ଭାଗିରଥି ସିଗର) ନିକଟରେ ମୋଟ ୭୦ ଲକ୍ଷ ଟଙ୍କା ବ୍ୟୟରେ ନିର୍ମିତ ତିନୋଟି ଅତ୍ୟାଧୁନିକ ଗୋଷ୍ଠୀ ଶୌଚାଳୟ ଉଦଘାଟନ କରିଥିଲେ । ଏଥିସହିତ ଏନଏସି କାର୍ଯ୍ୟାଳୟ ନିକଟରେ ୬୮ ଲକ୍ଷ ଟଙ୍କା ବ୍ୟୟରେ ନିର୍ମାଣ ହେବାକୁ ଥିବା ୧୨ ଟି ଦୋକାନ ଘର ପାଇଁ ମଧ୍ଯ ବିଧାୟକ ସ୍ୱାଇଁ ଭିତ୍ତିପ୍ରସ୍ତର ସ୍ଥାପନ କରିଥିଲେ । ଏହି ଉଦଘାଟନ ଓ ଶିଳାନ୍ୟାସ କାର୍ଯ୍ୟକ୍ରମରେ ଉପାଧ୍ୟକ୍ଷ ବି.ଶୁଭ୍ରଶଙ୍କର ଜ୍ୟୋତି, ସମସ୍ତ କାଉନସିଲର, କାର୍ଯ୍ଯନିର୍ବାହୀ ଅଧିକାରୀ ବଳୟ ଦେହୁରୀ, ସହକାରୀ ଯନ୍ତ୍ରୀ ଆଦିତ୍ଯ କୁମାର ମିଶ୍ର, ସମସ୍ତ କର୍ମଚାରୀ ଏବଂ ବହୁ ନିମନ୍ତ୍ରିତ ମାନ୍ଯଗଣ୍ଯ ବ୍ଯକ୍ତି ଯୋଗଦାନ କରିଥିଲେ ।
Popular Categories
Previous article
Next article