ରେଙ୍ଗାଲିକ୍ୟାମ୍ପ: ଲାଦରପାଲି ରାମଚଣ୍ଡୀ ମନ୍ଦିର ପାଖ ଜାତୀୟ ରାଜପଥ ୫୩ କଡରେ ଛିଡ଼ା ହୋଇଥିବା ଏକ ଧାନକଟା ବୋଝେଇ ଟ୍ରକକୁ ସମାନ ଦିଗରେ ପଛରେ ଆସୁଥିବା ଏକ ମାଲ୍ ବୋଝେଇ ଟ୍ରକ ଧକ୍କା ମାରି ଡିଭାଇଡର ଉପରକୁ ଚଢି ଯାଇଥିଲେ। ଫଳରେ ଧାନ କଟା ଯନ୍ତ୍ର ବୋଝେଇ ଟ୍ରକରେ ଥିବା ୨ ଜଣ ଗୁରୁତର ଆହତ ହୋଇଛନ୍ତି। ଏହା ସହ ବୋଝେଇ ହୋଇଥିବା ଧାନ କଟା ଯନ୍ତ୍ରଟି ମଧ୍ୟ ଚୁରମାର ହୋଇଯାଇଛି।
ଖବରପାଇ ଅତାବିରା ପୁଲିସ ଘଟଣାସ୍ଥଳରେ ପହଞ୍ଚି ଆହତ ଦ୍ୱୟକୁ ଚିକିତ୍ସା ପାଇଁ ସ୍ଥାନୀୟ ଡାକ୍ତରଖାନାକୁ ନେଇଥିଲେ। ଆହତ ମାନେ ହେଲେ ଭୁବ ସିଂ ରାବତ (୪୮) ହରିୟାଣା ଓ ମନୋଜ ବେନିବାଲ (୨୫) ଉତ୍ତରପ୍ରଦେଶର ବୋଲି ଜଣାପଡିଛି। ଫସଲ ଅମଳ ସମୟରେ ଏମାନେ ଆସି ବରହାଗୁଡ଼ା ଆନ୍ଧ୍ର ପଡ଼ା ଯେ ପି ରାମାୟା ପଟ୍ଟାଙ୍କ ଘରେ ରହି ଧାନ କଟା ଯନ୍ତ୍ର ଚଳାଇ ଥାଆନ୍ତି। ଗୋଡ଼ ଭଗାରୁ ଜଣେ କୃଷକର ଧାନ କାଟି ବରହାଗୁଡ଼ା ଫେରୁଥିବା ସମୟରେ ଏହି ଦୁର୍ଘଟଣା ଘଟିଥିଲା।
