ଫୁଲବାଣୀ: କନ୍ଧମାଳ ଜିଲ୍ଲା କ. ନୂଆଗାଁ ବ୍ଲକ ଆଡିମାହା ପଞ୍ଚାୟତ ସାଙ୍କୁଶ ବାଲି ଉଚ୍ଚ ବିଦ୍ୟାଳୟରେ ଶିକ୍ଷକ ନ ଥିବାରୁ ଶତାଧିକ ଗ୍ରାମବାସୀ ଜିଲ୍ଲାପାଳଙ୍କ ଦ୍ଵାରସ୍ଥ ହୋଇଛନ୍ତି। ଗ୍ରାମବାସୀ ଜିଲାପାଳଙ୍କ କାର୍ଯ୍ୟାଳୟକୁ ଆସି ଶିକ୍ଷକ ପଦବୀ ପୂରଣ ନିମନ୍ତେ ଏକ ଦାବିପତ୍ର ପ୍ରଦାନ କରିଛନ୍ତି।
ସୂଚନା ମୁତାବକ, ସାଙ୍କୁଶ ବାଲି ଉଚ୍ଚ ବିଦ୍ୟାଳୟରେ ପ୍ରଥମରୁ ଦଶମ ଶ୍ରେଣୀ ରହିଛି। ପୂର୍ବରୁ ଏହି ବିଦ୍ୟାଳୟ ଉଚ୍ଚ ପ୍ରାଥମିକ ବିଦ୍ୟାଳୟ ଥିଲା। ରାଜ୍ୟ ସରକାରଙ୍କ ନିର୍ଦ୍ଦେଶ କ୍ରମେ ଦୁଇବର୍ଷ ତଳେ ଉଚ୍ଚ ବିଦ୍ୟାଳୟ ମାନ୍ୟତା ପ୍ରଦାନ କରାଯାଇ ନବମ, ଦଶମ ଶ୍ରେଣୀରେ ଛାତ୍ରଛାତ୍ରୀଙ୍କ ନାମଲେଖା ହୋଇଥିଲା। ବର୍ତ୍ତମାନ ବିଦ୍ୟାଳୟରେ ୧୧୬ ଛାତ୍ରଛାତ୍ରୀ ଅଧ୍ୟୟନରତ ଥିବାବେଳେ ସେଥିମଧ୍ୟରୁ ୪୨ ଜଣ ନବମ, ଦଶମ ଶ୍ରେଣୀରେ ରହିଛନ୍ତି। ତେବେ ବିଦ୍ୟାଳୟରେ କୌଣସି ନୂତନ ଶିକ୍ଷକଙ୍କୁ ନିଯୁକ୍ତି ଦିଆଯାଇ ନ ଥିବାବେଳେ ପୂର୍ବରୁ ପ୍ରାଥମିକ ବିଦ୍ୟାଳୟରେ ଶିକ୍ଷାଦାନ କରୁଥିବା ମାତ୍ର ୩ ଶିକ୍ଷକ ରହିଛନ୍ତି। ଯେଉଁମାନେ ନବମ, ଦଶମ ଶ୍ରେଣିର ଛାତ୍ରଛାତ୍ରୀଙ୍କୁ ପାଠ ପଢ଼ାଇବାରେ ଅକ୍ଷମ। ଏଭଳି ପରିସ୍ଥିତିରେ ଶିକ୍ଷକ ଅଭାବ ଯୋଗୁ ପାଠପଢ଼ା ହେଉନାହିଁ। ଛାତ୍ରଛାତ୍ରୀଙ୍କ ଭବିଷ୍ୟତ ଅନ୍ଧାର ହେବାକୁ ବସିଲାଣି। ଅନେକ ଛାତ୍ରଛାତ୍ରୀ ଟିସି ନେଇ ଅନ୍ୟ ସ୍କୁଲରେ ନାମ ଲେଖାଉଛନ୍ତି। ଗାଁରେ ସ୍କୁଲ ଥାଇ ମଧ୍ୟ ଶିକ୍ଷକ ଅଭାବରୁ ଛାତ୍ରଛାତ୍ରୀମାନେ ୧୦ରୁ ୧୫ କିଲୋମିଟର ଚାଲିଚାଲି ଅନ୍ୟ ସ୍କୁଲ ଯିବାକୁ ବାଧ୍ୟ ହେଉଛନ୍ତି। ତେଣୁ ସାଙ୍କୁଶ ବାଲି ଉଚ୍ଚ ବିଦ୍ୟାଳୟରେ ଯାଥାଶୀଘ୍ର ଶିକ୍ଷକ ପଦବୀ ପୂରଣ ପାଇଁ ସରପଞ୍ଚ, ସମିତି ସଭ୍ୟ ପଦ୍ମଚରଣ ପାତ୍ର, ଗ୍ରାମବାସୀ କଣ୍ଠସ୍ଵର ଦିଗାଲ, ସନ୍ତୋଷିନୀ ମାଝୀ, ଅଞ୍ଜଳି ଦିଗାଲ , କାଳିଆ ମଲିକଙ୍କ ସମେତ ଗ୍ରାମବାସୀମାନେ ଦାବି କରିଛନ୍ତି।
