ନୂଆଦିଲ୍ଲୀ: ଦେଶର ଆର୍ଥିକ ବ୍ୟବସ୍ଥାକୁ ସ୍ବାଭାବିକ କରିବାକୁ ପ୍ରଧାନମନ୍ତ୍ରୀଙ୍କ ୨୦ ଲକ୍ଷ କୋଟି ଟଙ୍କା ପ୍ୟାକେଜକୁ ଗତ ଦୁଇଦିନ ହେଲା ବିସ୍ତୃତ ବ୍ୟାଖ୍ୟା କରୁଛନ୍ତି ଅର୍ଥମନ୍ତ୍ରୀ ନିର୍ମଳା ସୀତାରମଣ । ଆଜି ସାମ୍ବାଦିକ ସମ୍ମିଳନୀରେ ଅର୍ଥମନ୍ତ୍ରୀ ରାସ୍ତାକଡ଼ର ବୁଲାବିକାଳି (ଷ୍ଟ୍ରୀଡ଼ ଭେଣ୍ଡର) ଓ ଛୋଟ ବ୍ୟବସାୟୀଙ୍କ ନିମନ୍ତେ ମୁଦ୍ରା ଯୋଜନାରେ ଋଣ ପ୍ରସଙ୍ଗରେ ସୂଚନା ଦେଇଛନ୍ତି ।
ଅର୍ଥମନ୍ତ୍ରୀଙ୍କ ସୂଚନା ଅନୁସାରେ ମୁଦ୍ରା ଯୋଜନାରେ୧୫ହଜାର କୋଟି ଟଙ୍କା ଋଣ ପ୍ରଦାନ ଲକ୍ଷ୍ୟ ରଖାଯାଇଛି । ଏହା ଛୋଟ ବ୍ୟବସାୟୀଙ୍କ ଆର୍ଥିକ ବିକାଶକୁ ଅଧିକ ଦୃତତର କରିବ ବୋଲି ସେ ଆଶା ରଖିଛନ୍ତି । ପ୍ରଧାନମନ୍ତ୍ରୀଙ୍କ ଆତ୍ମନିର୍ଭରଶୀଳ ଭାରତ ନିମନ୍ତେ ଏହି ପ୍ୟାକେଜ ଅଧିକ ଉପଯୋଗୀ ହେବ ।
ଅନୁରୂପ ଭାବରେ ଷ୍ଟ୍ରୀଟ ଭେଣ୍ଡରମାନଙ୍କୁ ୫ ହଜାର କୋଟି ଟଙ୍କାର ଋଣ ପ୍ରଦାନ ଲକ୍ଷ୍ୟ ରଖାଯାଇଛି । ଲକ୍ଡ଼ାଉନ ଯୋଗୁଁ ହାତବାନ୍ଧି ବସିଥିବା ରାସ୍ତା କଡ଼ର ଛୋଟ ବ୍ୟବସାୟୀମାନେ ଏହାଦ୍ବାରା ଉପକୃତ ହେବେ ।
ଅପରପକ୍ଷରେ ୩କୋଟି ଚାଷୀଙ୍କୁ ଶସ୍ତାରେ ୪ଲକ୍ଷ କୋଟି ଟଙ୍କାର ଋଣ ଦିଆଯାଇଛି ବୋଲି ସୀତାରମଣ କହିଛନ୍ତି । ୨୫ଲକ୍ଷ ନୂଆ ଚାଷୀଙ୍କୁ କିଷାନ କ୍ରେଡ଼ିଟ କାର୍ଡ଼ ଦିଆଯାଇଛି । କିସାନ କ୍ରେଡ଼ିଟ କାର୍ଡ଼ରେ ୨୫ହଜାର କୋଟିର ଋଣ ବ୍ୟବସ୍ଥା ହୋଇଛି । କୃଷି ଋଣ ପରିଶୋଧ ଅବଧି ମେ ୩୧କୁ ବୃଦ୍ଧି କରାଯାଇଛି । ମାର୍ଚ୍ଚ ଓ ଏପ୍ରିଲରେ ୬୩ଲକ୍ଷ ଚାଷୀଙ୍କୁ ଋଣ ମିଳିଛି । ୬୩ଲକ୍ଷ ଚାଷୀଙ୍କୁ ୮୬ହଜାର ୬୦୦କୋଟି ଟଙ୍କାର ଋଣ ମିଳିଛି । ନାବାର୍ଡ଼ ଜରିଆରେ ଚାଷୀଙ୍କ ପାଇଁ ୩୦ହଜାର କୋଟିର ଫଣ୍ଡ କରାଯାଇଛି । ରବି ଫସଲ ପାଇଁ ଚାଷୀଙ୍କୁ ଏହି ଫଣ୍ଡରୁ ଋଣ ଦିଆଯିବ । ୩କୋଟି ଚାଷୀଙ୍କୁ ଏଥିରୁ ସୁବିଧା ମିଳିବ ବୋଲି ଅର୍ଥମନ୍ତ୍ରୀ କହିଛନ୍ତି ।
