ଲଣ୍ଡନ କୋର୍ଟରେ ପଳାତକ ନୀରବ ମୋଦୀର ଜାମିନ ଖାରଜ

ଲଣ୍ଡନ : ପଞ୍ଜାବ ନ୍ୟାସନାଲ ବ୍ୟାଙ୍କ (ପିଏନ୍‍ବି)ର ବହୁ କୋଟି ଟଙ୍କା ଠକେଇ ମାମଲାର ମୁଖ୍ୟ ଅଭିଯୁକ୍ତ ନୀରବ ମୋଦୀଙ୍କ ଜାମିନ ଆବଦନ ଶୁକ୍ରବାର ଲଣ୍ଡନ କୋର୍ଟରେ ଖାରଜ ହୋଇଯାଇଛି। ଫଳରେ ନୀରବ ମୋଦୀଙ୍କୁ ଆଉ କିଛି ଦିନ ଲଣ୍ଡନ ଜେଲରେ ବିତାଇବାକୁ ପଡ଼ିବ। ଲଣ୍ଡନ କୋର୍ଟ ଏହାକୁ ‘ଅସାମାନ୍ୟ ଠକେଇ’ ମାମଲା ବୋଲି କହିଛନ୍ତି।
ଲଣ୍ଡନ ୱେଷ୍ଟମିନିଷ୍ଟର କୋର୍ଟରେ ଶୁଣାଣି ବେଳେ ବହୁତ ଆଶ୍ଚର୍ଯ୍ୟଜନକ କଥା ପଦାକୁ ଆସିଥିଲା। ଭାରତୀୟ ପ୍ରାଧିକରଣ ପକ୍ଷରୁ ମାମଲା ଲଢୁଥିବା କ୍ରାଉନ ଓକିଲ ଟିଭି କ୍ୟାଣ୍ଡମ୍ୟାନ କହିଥିଲେ ଯେ ନୀରବ ମୋଦୀ ଜଣେ ସାକ୍ଷୀ ଆଶିଷ ଲାଡଙ୍କୁ ଡାକି ଜୀବନରୁ ମାରିଦେବାକୁ ଧମକ ଦେଇଛନ୍ତି। ନୀରବ ମୋଦୀ ଭାରତୀୟ ତଦନ୍ତକାରୀ ଦଳଙ୍କୁ ତଦନ୍ତରେ କୌଣସି ପ୍ରକାର ସହଯୋଗ କରୁନାହାନ୍ତି। ସେ ଯୁକ୍ତି ବାଢିଥିଲେ ଯେ ଜାମିନ ମିଳିଲେ ନୀରବ ମୋଦୀ ଦେଶ ଛାଡ଼ି ଚାଲିଯିବାର ଆଶଙ୍କା ରହିଛି। ଜେଲରୁ ବାହାରିବା ପରେ ସେ ପ୍ରମାଣ ନଷ୍ଟ କରିବା କିମ୍ବା ସାକ୍ଷୀଙ୍କୁ ପ୍ରଭାବିତ କରିବାକୁ ଚେଷ୍ଟା କରିପାରନ୍ତି। ତେଣୁ ନୀରବଙ୍କ ଜାମିନ ଆବେଦନ ଖାରଜ କରିବାକୁ ସେ ଦାବି କରିଥିଲେ।
ଅପରପକ୍ଷରେ ନୀରବଙ୍କ ଓକିଲ କହିଥିଲେ ଯେ ତାଙ୍କ ମହକିଲ ୨୦୦୮ ଜାନୁଆରୀରୁ ଲଣ୍ଡନରେ ଅଛନ୍ତି। ତାଙ୍କ ଗୃହବନ୍ଦୀ କିମ୍ବା ଇଲେକ୍ଟ୍ରୋନିଂ ମନିଟରିଂ ମଧ୍ୟରେ ରଖାଯାଇପାରିବ। ନୀରବ ମୋଦୀଙ୍କୁ ସ୍ୱତନ୍ତ୍ର ଫୋନ ଦିଆଯାଇପାରିବ ଓ ଅଧିକାରୀ କୌଣସି ସମୟରେ ତାଙ୍କୁ ଯୋଗଯୋଗ କରିପାରିବେ। କୋର୍ଟ ସମସ୍ତ ଯୁକ୍ତି ଶୁଣିବା ପରେ ନୀରବଙ୍କ ଜାମିନ ଆବେଦନକୁ ଖାରଜ କରିଦେଇଥିଲେ। ଏହି ମାମଲାର ଆସନ୍ତା ଶୁଣାଣି ଅପ୍ରେଲ ୨୬ରେ ହେବ।