ଡେସ୍କ: ସମ୍ବଲପୁର ସହରରେ ଦେଖାଦେଇ ଥିବା ଉତ୍ତେଜନାମୂଳକ ପରିସ୍ଥିତି ଧୀରେ ଧୀରେ ଶାନ୍ତ ହେବାରେ ଲାଗିଛି। ବାଇକ ଶୋଭାଯାତ୍ରା ବେଳେ ପୁଲିସ ଉପରକୁ ପଥର ମାଡ଼ରେ ଅନେକ ପୁଲିସ କର୍ମଚାରୀ ଆହତ ହୋଇଥିଲେ ମଧ୍ୟ ସହରରେ ଶାନ୍ତି ଫେରାଇ ଆଣିବା ଓ ଭାଇଚାରା ବଜାୟ ରଖିବା ଲାଗି ପୁଲିସ ଉଦ୍ୟମ ଜାରି ରଖିଛି। ଆଜି ସନ୍ଧ୍ୟାରେ ଶୋଭାଯାତ୍ରା ବାହାରିବାକୁ ଥିବାରୁ ସାରା ସହରରେ ୪୨ ପ୍ଲାଟୁନ ପୁଲିସ ଫୋର୍ସ ମୁତୟନ କରାଯାଇଛି।
ଇତି ମଧ୍ୟରେ ସମ୍ବଲପୁର ଡିଆରଡିଏ ସଭାଗୃହରେ ଜିଲ୍ଲାପାଳଙ୍କ ଅଧ୍ୟକ୍ଷତାରେ ଶାନ୍ତି କମିଟି ବୈଠକ ଆୟୋଜିତ ହୋଇଛି। ଏଥିରେ ସହରର ବିଭିନ୍ନ କମିଟି ଯୋଗ ଦେଇଥିଲେ କିନ୍ତୁ ଏହି ବୈଠକକୁ ହନୁମାନ ଜୟନ୍ତୀ ସମନ୍ବୟ ସମିତି ଆସିନଥିଲା। ଆଜି ହେବାକୁ ଥିବା ଶୋଭାଯାତ୍ରାରେ ଶାନ୍ତି ଶୃଙ୍ଖଳା ନିମନ୍ତେ ଜଣେ ଏସପି, ୯ଜଣ ଏଏସପି ଓ ୨୭ ଜଣ ଡିଏସପି ମୁତୟନ ରହିବେ ବୋଲି ସୂଚନା ମିଳିଛି।
ଏହା ଛଡା ପୁଲିସ ସିସିଟିଭି ଓ ଡ୍ରୋନ୍ ଜରିଆରେ ସହରର ବିଭିନ୍ନ ସମ୍ବେଦନଶୀଳ ସ୍ଥାନ ଉପରେ ନଜର ରଖିଥିବା ବେଳେ ପଥର ଫିଙ୍ଗା ଘଟଣାରେ ୪୩ ଜଣଙ୍କୁ ଅଟକ ରଖି ପଚରାଉଚୁରା କରୁଛି।
