ରେଙ୍ଗାଲି: ଦେଶର ସର୍ବପ୍ରଥମ ବହୁମୁଖୀ ଯୋଜନାରେ ନିର୍ମିତ ହୀରାକୁଦ ନଦୀ ବନ୍ଧ ଯୋଗୁଁ ସୃଷ୍ଟି ହୋଇଥିବା ହୀରାକୁଦ ଜଳ ଭଣ୍ଡାରର ପାଣି ଏବଂ ଜମି ଉପରେ ଶିଳ୍ପାନୁଷ୍ଟାନ ଗୁଡିକର ଜବର ଦଖଲ ପ୍ରକ୍ରିୟା ବେଧଡକ ଚାଲିଥିଲେ ମଧ୍ୟ ସ୍ଥାନୀୟ ପ୍ରଶାସନ, ଜଳସମ୍ପଦ ବିଭାଗ ଏଥିରେ ଅଙ୍କୁଶ ଲଗାଇବାରେ ବିଫଳ ଏବଂ ଅସହାୟ ହେଉଥିବା ଦେଖିବାକୁ ମିଳୁଛି। ଏପରିକି ବିଗତ ବର୍ଷରେ ପ୍ରଶାସନ ପକ୍ଷରୁ ଜବରଦଖଲ ଉଚ୍ଛେଦ କରି ଭାଙ୍ଗିଦେଲା ପରେ ମଧ୍ୟ କାରଖାନା କର୍ତ୍ତୃପକ୍ଷ ପ୍ରଶାସନର କାର୍ଯ୍ୟାନୁଷ୍ଠାନକୁ ଖାତିର ନକରି ପୁଣି ନିର୍ମାଣ କାର୍ଯ୍ୟ କରିଥିବା ଦେଖିବାକୁ ମିଳୁଛି।
ସମ୍ବଲପୁର ଜିଲ୍ଲା ରେଙ୍ଗାଲି ବ୍ଳକର ବମାଲୋଇ ମୌଜା ଫୁଳଚାଙ୍ଗେର ଠାରେ ପ୍ରତିଷ୍ଠିତ ଆର୍ୟାନ ଇସ୍ପାତ୍ କର୍ତ୍ତୃପକ୍ଷ ହୀରାକୁଦ ଜଳଭଣ୍ଡାର ଜମି ଜବର ଦଖଲ କରି ରାସ୍ତା ନିର୍ମାଣ କରିଥିବା ନେଇ ସ୍ୱେଚ୍ଛାସେବୀ ହେମନ୍ତ ରାଉତ ୨୩/୧୦/୨୦୦୯ ଦିନ ଜିଲ୍ଲାପାଳଙ୍କ ନିକଟରେ ଅଭିଯୋଗ କରିଥିଲେ। ଏହାପରେ ରେଙ୍ଗାଲି ତହସିଲଦାର, ପୁଲିସ ଏବେଂ ଜଳସମ୍ପଦ ବିଭାଗର କନିଷ୍ଠ ଯନ୍ତ୍ରୀଙ୍କ ଉପସ୍ଥିତିରେ ୧୬/୧୧/୨୦୦୯ ଦିନ ଜବରଦଖଲ ଜମିର ସୀମା ଚିହ୍ନଟ କରାଯାଇଥିବା ସମୟରେ ଜଳଭଣ୍ଡାର ଜମିରେ କମ୍ପାନୀ ନିଜର ସୁଇଚ୍ ୟାର୍ଡକୁ ରାସ୍ତା ଏବଂ ପାଚେରୀ ନିର୍ମାଣ କରିଥିବା ଜଣାପଡ଼ିଥିଲା। ପରେ କମ୍ପାନୀ ଦ୍ୱାରା ନିର୍ମିତ ପାଚେରୀ ଏବଂ ସୁଇଚ୍ ୟାର୍ଡକୁ ସଂଯୋଗ ପାଇଁ ନିର୍ମାଣ ହୋଇଥିବା ମାଟି ରାସ୍ତାକୁ କାଟି ଦିଆଯାଇଥିଲା। କିନ୍ତୁ କ୍ଷୋଭର ବିଷୟ ଯେ ତତ୍କାଳିନ ତହସିଲଦାରଙ୍କ ଦ୍ୱାରା ଜବରଦଖଲ ଉଚ୍ଛେଦ କରି କଟା ଯାଇଥିବା ମାଟି ରାସ୍ତା ଉପରେ ପୁଣି ମାଟି ଭର୍ତ୍ତି କରି ରାସ୍ତା ନିର୍ମାଣ କରାଯାଇ ଉକ୍ତ ରାସ୍ତାରେ ବେଧଡକ କମ୍ପାନୀର ଭାରିଯାନ ଚଳାଚଳ କରୁଛି ବୋଲି ସଚେତନ ନାଗରିକ ମହଲରେ ଅଭିଯୋଗ ହେଉଛି। ସମ୍ବଲପୁର-ରାଉରକେଲା ୧୦ ନମ୍ବର ରାଜ୍ୟ ରାଜପଥ ପାର୍ଶ୍ବରେ ଏହି ଜବରଦଖଲ ହୋଇଥିଲେ ମଧ୍ୟ ସ୍ଥାନୀୟ ପ୍ରଶାସନ, ଜଳ ସମ୍ପଦ ବିଭାଗ କିମ୍ବା ଜିଲ୍ଲା ପ୍ରଶାସନ କାର୍ଯ୍ୟାନୁଷ୍ଠାନ ଗ୍ରହଣ ନକରି ନୀରବ ଦ୍ରଷ୍ଟା ସାଜିଥିବା ଚରମ ବିଡମ୍ବନା ବିଷୟ ଅଟେ।
