ଆଠଗଡ଼: ଅବକାରୀ କମିଶନର ନରସିଂହ ଭୋଳଙ୍କ ନିର୍ଦ୍ଦେଶକ୍ରମେ ଜିଲ୍ଲା ଅବକାରୀ ଅଧିକ୍ଷକ ଦେବାଶିଷ ପଟେଲଙ୍କ ପ୍ରତ୍ୟକ୍ଷ ତତ୍ତ୍ୱାବଧାନରେ ୨ଟି ଦଳ ଗଠନ କରାଯାଇ ଆଠଗଡ଼ ଓ ନରସିଂହପୁର ଅଞ୍ଚଳରେ ଗୁରୁବାର ଚଢାଉ କରାଯାଇ ବିପୁଳ ପରିମାଣର ଗଞ୍ଜେଇ ଓ ମଦ ଜବତ କରାଯାଇଥିବା ଜଣାପଡ଼ିଛି। ଗୋଟିଏ ଅବକାରୀ ସ୍କାର୍ଡ ନରସିଂହପୁର ନିକଟ ବାଗଧରିଆ ଛକଠାରେ ପେଟ୍ରୋଲିଂ କରୁଥିବା ବେଳେ ଏକ ମାରୁତି ସ୍ୱିଫ୍ଟ ଡିଜାୟାର କାରକୁ ଅଟକାଇ ଯାଞ୍ଚ କରିବା ବେଳକୁ ତା ମଧ୍ୟରେ ଚାଲାଣ ହେଉଥିବା ୬୦କେଜି ଗଞ୍ଜେଇ ଜବତ କରିଥିଲେ। ଜବତ ଗଞ୍ଜେଇର ଆନୁମାନିକ ମୂଲ୍ୟ ୬ଲକ୍ଷ ଟଙ୍କା ହେବ ବୋଲି ବିଭାଗୀୟ ସୁତ୍ରରୁ ପ୍ରକାଶ। ଉକ୍ତ କାରର ଚାଳକ ନୟାଗଡ଼ ଶରଣକୂଳ ଅଞ୍ଚଳର ମାନସ କୁମାର ପ୍ରଧାନଙ୍କୁ ମଧ୍ୟ ଗିରଫ କରାଯାଇଛି।
ସେହିପରି ଅନ୍ୟ ଏକ ଅବକାରୀ ସ୍କାର୍ଡ ଆଠଗଡ଼ ଥାନା ଅନ୍ତର୍ଗତ ଖୁଣ୍ଟକଟା ନିକଟବର୍ତ୍ତୀ ତାରିଣୀ ଛକଠାରେ ପେଟ୍ରୋଲିଂ କରୁଥିବାବେଳେ ଏକ ବୋଲେରୋ ଗାଡିକୁ ଅଟକାଇ ଯାଞ୍ଚ କରିବା ସମୟରେ ସେଥିରେ ୩୬୦ଲିଟର ସଦ୍ୟ ପ୍ରସ୍ତୁତ ଦେଶୀମଦ ଚାଲାଣ ହେଉଥିବା ଦେଖି ତାକୁ ଜବତ କରିଥିଲେ। ବୋଲେରୋ ଗାଡି ଜବତ କରିିବା ସହ ଚାଳକ ଢେଙ୍କାନାଳ ସଦର ବ୍ଲକ ଅନ୍ତର୍ଗତ ସିଆରିଆ ଗ୍ରାମର ମାନସ କୁମାର ବେହେରାଙ୍କୁ ଗିରଫ କରିଥିବା ଜଣାପଡ଼ିଛି। ଆଠଗଡ଼ ଅବକାରୀ ଉପଅଧିକ୍ଷକ ପ୍ରମୋଦ କୁମାର ପଣ୍ଡା, ଆଠଗଡ଼ ଅବକାରୀ ନିରୀକ୍ଷକ କେଶବ ଚନ୍ଦ୍ର ଦାସ, ଉପନିରୀକ୍ଷକ ସୌମ୍ୟରଞ୍ଜନ ମାଝି, ନରସିଂହପୁର ଉପନିରୀକ୍ଷକ ଅରୁଣ କୁମାର ଭୋଇଙ୍କ ସମେତ ବହୁ ଅବକାରୀ ଅଧିକାରୀ ଓ କର୍ମଚାରୀ ଏହି ଚଢାଉରେ ଅଂଶଗ୍ରହଣ କରିଥିଲେ।
