ନୂଆଦିଲ୍ଲୀ : ନ୍ୟାସନାଲ୍ ହାଇଓ୍ବେ ଅଥୋରିଟି ଅଫ୍ ଇଣ୍ଡିଆର(NHAI)ର ପଥ କର ଅଥୋରିଟି ତରଫରୁ ଫାଷ୍ଟ୍ୟାଗ୍ ବ୍ୟବହାରକାରୀଙ୍କ ପାଇଁ ନିର୍ଦ୍ଦେଶାବଳୀ ଜାରି କରାଯାଇଛି । ସଂସ୍ଥା ଦ୍ବାରା ୩୨ ବ୍ୟାଙ୍କମାନଙ୍କ ଏକ ତାଲିକା ପ୍ରସ୍ତୁତ କରାଯାଇଛି ଏବଂ ବ୍ୟବହାରକାରୀଙ୍କୁ ସେହି ନିର୍ଦ୍ଧାରିତ ବ୍ୟାଙ୍କରୁ ଫାଷ୍ଟ୍ୟାଗ୍ କିଣିବା ପାଇଁ କୁହାଯାଇଛି । ଏହି ତାଲିକାରେ ପେଟିଏମ୍ ପେମେଣ୍ଟ୍ସ ବ୍ୟାଙ୍କ ଫାଷ୍ଟ୍ୟାଗ୍ ନାଁ ନାହିଁ । ଏହାର ଅର୍ଥ ଏଣିକି ପେଟିଏମ୍ ଫାଷ୍ଟ୍ୟାଗ୍ ବ୍ୟବହାରକାରୀଙ୍କୁ ନୂଆ କାର୍ଡ ନେବାକୁ ହେବ । କହିରଖୁଛୁ ରିଜର୍ଭ ବ୍ୟାଙ୍କ ପେଟିଏମ୍ ପେମେଣ୍ଟ ବ୍ୟାଙ୍କ ଉପରେ ରୋକ ଲଗାଇ ଦେଇଛି । ରିଜର୍ଭ ବ୍ୟାଙ୍କର ନିର୍ଦ୍ଦେଶ ଅନୁସାରେ ୨୯ ଫେବୃୟାରୀ ପରଠୁ ପେଟିଏମ୍ ପେମେଣ୍ଟ ବ୍ୟାଙ୍କର ସମସ୍ତ ସେବା ବନ୍ଦ ହୋଇଯିବ ।
ଏନଏଚଏଆଇର ସୋସିଆଲ ମିଡିଆ ଆକାଉଣ୍ଟରେ ଏକ ପୋଷ୍ଟ କରାଯାଇଛି । ଏଥିରେ ଲେଖାଯାଇଛି କି ବିନା କୌଣସି ଚିନ୍ତାରେ ଫାଷ୍ଟ୍ୟାଗ୍ ସହିତ ଯାତ୍ରା କରନ୍ତୁ । କେବଳ ତଳେ ଦିଆଯାଇଥିବା ବ୍ୟାଙ୍କରୁ ହିଁ ନିଜ ଫାଷ୍ଟ୍ୟାଗ୍ କିଣନ୍ତୁ । ଏହି ତାଲିକାରେ ୩୨ଟି ବ୍ୟାଙ୍କର ନାଁ ଜାରି କରାଯାଇଛି । ତେବେ ପେଟିଏମ୍ ଫାଷ୍ଟ୍ୟାଗ୍ ବ୍ୟବହାରକାରୀଙ୍କୁ ହଇରାଣ ହେବାରୁ ରକ୍ଷା କରିବା ପାଇଁ ହାଇଓ୍ବେ ଅଥୋରିଟି ଏଭଳି ପଦକ୍ଷେପ ନେଇଛି । କହିରଖୁଛୁ ଭାରତରେ ଏବେ ୭ କୋଟିରୁ ଅଧିକ ଫାଷ୍ଚ୍ୟାଗ୍ ବ୍ୟବହାରକାରୀ ଅଛନ୍ତି । ସେଥି ମଧ୍ୟରୁ ୩୦ ପ୍ରତିଶତ ବ୍ୟବହାରକାରୀ ପେଟିଏମ୍ ପେମେଣ୍ଟ ବ୍ୟାଙ୍କର ଉପଭୋକ୍ତା । ଅର୍ଥାତ୍ ପ୍ରାୟ ୨ କୋଟିରୁ ଅଧିକ ଉପଭୋକ୍ତା ପେଟିଏମ୍ ପେମେଣ୍ଟ ବ୍ୟାଙ୍କର ଫାଷ୍ଟ୍ୟାଗ୍ କାର୍ଡ ବ୍ୟବହାର କରୁଛନ୍ତି ।
Comments are closed.