ନୂଆଦିଲ୍ଲୀ: ଶରଦ ପାୱରଙ୍କ ସହ ମିଶି ଏନସିପି ଗଠନ କରିଥିବା ବିହାରର ସାଂସଦ ତାରିକ ଅନୱର ତାଙ୍କ ପଦ ଓ ଦଳର ପ୍ରାଥମିକ ସଦସ୍ୟତାକୁ ଇସ୍ତଫା ଦେଇଛନ୍ତି। ବିହାରର ଏହି ଲୋକପ୍ରିୟ ନେତା ପୁଣି ଥରେ କଂଗ୍ରେସକୁ ପ୍ରତ୍ୟାବର୍ତ୍ତନ କରି ପାରନ୍ତି ବୋଲି ରାଜନୈତିକ ସମୀକ୍ଷକମାନେ ଆକଳନ କରୁଛନ୍ତି।
୧୯୯୯ରେ କଂଗ୍ରେସ ଅଧ୍ୟକ୍ଷା ସୋନିଆ ଗାନ୍ଧିଙ୍କ ବିରୋଧରେ ସ୍ୱର ଉତ୍ତୋଳନ କରି ତାରିକ ଅନୱର ଓ ଶରଦ ପାୱର ଦଳରୁ ଇସ୍ତଫା ଦେଇ ନ୍ୟାସନାଲ କଂଗ୍ରେସ ପାର୍ଟିର ଗଠନ କରିଥିଲେ। ଶରଦ ପାୱାରଙ୍କ ରାଫେଲ ସମ୍ପର୍କିତ ମନ୍ତବ୍ୟକୁ ବିରୋଧ କରି ଏନସିପିର ଅନ୍ୟତମ ସଂସ୍ଥାପକ ଉଭୟ ଦଳ ଓ ପଦରୁ ଇସ୍ତଫା ଦେଇଥିବା ସ୍ୱୀକାର କରିଛନ୍ତି। ତେବେ ଆଗାମୀ ଦିନରେ ସେ କେଉଁ ଦଳକୁ ଯିବେ ତାହା ଅଦ୍ୟାବଧି ଠିକ୍ କରି ନାହାନ୍ତି ବୋଲି ସେ ପ୍ରକାଶ କରିଛନ୍ତି। ସମର୍ଥକଙ୍କ ସହ ଆଲୋଚନା ପରେ ଏ ସମ୍ପର୍କରେ ନିଷ୍ପତ୍ତି ନେବେ ବୋଲି ସେ ପ୍ରକାଶ କରିଥିଲେ।
ସୁତ୍ରରୁ ମିଳିଥିବା ତଥ୍ୟ ଅନୁଯାୟୀ ବିହାର ଏହି ଲୋକପ୍ରିୟ ନେତା ଆଗାମୀ ଦିନରେ କଂଗ୍ରେସରେ ଯୋଗ ଦେବାର ସମ୍ଭାବନା ରହିଛି। ବିହାର କଟିହାର ଅଞ୍ଚଳରୁ ତାରିକ ଅନୱର ୨୦୧୪ରେ ସାଂସଦ ନିର୍ବାଚିତ ହୋଇଥିଲେ। ଶରଦ ପାୱର ରାଫେଲ ପ୍ରସଙ୍ଗରେ ମୋଦୀ ସରକାରଙ୍କୁ ସମର୍ଥନ କରିବା କାରଣରୁ ତାରିକ ଅନୱର ଏଭଳି ପଦକ୍ଷେପ ଗ୍ରହଣ କରିଥିଲେ।
