ନାରାୟଣପୁର: ନାରାୟଣପୁରର ଆମଦଇ ଖଣି ସୁରକ୍ଷାରେ ନିୟୋଜିତ ଯବାନମାନଙ୍କୁ ନକ୍ସଲମାନେ ପୁଣି ଥରେ ଟାର୍ଗେଟ କରିଛନ୍ତି। ଆଇଇଡି ବିସ୍ଫୋରଣରେ ଜଣେ ଯବାନ ଶହୀଦ ହୋଇଥିବା ବେଳେ ଅନ୍ୟ ଜଣେ ଯବାନ ଆହତ ହୋଇଛନ୍ତି। ଖଣିର ବିଭିନ୍ନ ସ୍ଥାନରେ ଆଇଇଡି ଖଞ୍ଜିବା ନେଇ ନକ୍ସଲମାନେ ଚେତାବନୀ ମଧ୍ୟ ଦେଇଥିଲେ। ଏହାପୂର୍ବରୁ ଆଇଇଡି ବିସ୍ଫୋରଣରେ ଦୁଇଜଣ ଶ୍ରମିକଙ୍କର ମୃତ୍ୟୁ ଘଟିଥିଲା। ଶହୀଦ ଯବାନଙ୍କ ନାଁ କମଲେଶ ସାହୁ। ସେ ଜାଞ୍ଜଗିର ଚାମ୍ପା ଜିଲାର ହସୌଦ ଗାଁର ବାସିନ୍ଦା ବୋଲି ଜଣାପଡ଼ିଛି।
ବସ୍ତର ଆଇଜି ପି. ସୁନ୍ଦର ରାଜ କହିଛନ୍ତି ଯେ, ନାରାୟଣପୁରର ଛୋଟେଡୋଙ୍ଗର ଥାନା ଅନ୍ତର୍ଗତ ଆମଦଇ ଖଣିରେ ନକ୍ସଲମାନେ ମଙ୍ଗଳବାର ସକାଳେ ଆଇଇଡି ବିସ୍ଫୋରଣ କରିବା ସହ ଗୁଳି ଚଳାଇଥିଲେ। ଏହାର ଜବାବରେ ସୁରକ୍ଷା ବାହିନୀଙ୍କ ପକ୍ଷରୁ ଗୁଳି ଚାଳନା କରାଯାଇଥିଲା। ନକ୍ସଲଙ୍କ ଆକ୍ରମଣରେ ସିଏଏଫର ୯ମ ବାହିନୀର ଜଣେ ଯବାନ କମଲେଶ କୁମାର ଶହୀଦ ହୋଇଛନ୍ତି। ଅନ୍ୟ ଜଣେ ଯବାନ ବିନୟ କୁମାର ସାମାନ୍ୟ ଆହତ ହୋଇଛନ୍ତି ଏବଂ ତାଙ୍କର ପ୍ରାଥମିକ ଚିକିତ୍ସା କରାଯାଇଛି। ସ୍ଥାନୀୟ ଅଞ୍ଚଳରେ ପୁଲିସ, ଡିଆରଜି ଏବଂ ଆଇଟିବିପି ଦ୍ବାରା ତଲାସୀ ଅଭିଯାନ ଜାରି ରହଛି।
Comments are closed.