କୋଟ୍ଟାୟାମ : ଆଠଥର ‘ମିଷ୍ଟର ଇଣ୍ଡିଆ’ ଘୋଷିତ ୩୮ ବର୍ଷ ବୟସ୍କ ନୌସେନା ଅଧିକାରୀ ମୁରଲୀ କୁମାରଙ୍କୁ ବଳାତ୍କାର ଅଭିଯୋଗରେ ପୁଲିସ ଗିରଫ କରିଛି। ବିବାହର ମିଥ୍ୟା ପ୍ରତିଶ୍ରୁତି ଦେଇ ମୁରଲୀ ତାଙ୍କ ଝିଅକୁ ବଳାତ୍କାର କରିଥିବା ପୀଡ଼ିତାଙ୍କ ପିତା ଅଭିଯୋଗ କରିଛନ୍ତି। ମୁମ୍ବାଇଠାରେ ନୌସେନାର ମୁଖ୍ୟ ପେଟି ଅଧିକାରୀ ଭାବେ ନିଯୁକ୍ତ ମୁରଲୀଙ୍କୁ ଗିରଫ ପରେ ବିଚାରବିଭାଗୀୟ ହାଜତକୁ ପଠାଇ ଦିଆଯାଇଥିବା ପୁଲିସ ସୂଚନା ଦେଇଛି। ତାଙ୍କ ବିରୋଧରେ ଅନୁସୂଚିତ ଜାତି ଏବଂ ଅନୁସୂଚୀତ ଜନଜାତି (ଏସ୍ସି/ଏସ୍ଟି) ଆଇନ ଅଧୀନରେ ଏକ ମାମଲା ରୁଜୁ କରାଯାଇଛି। ୨୦ ବର୍ଷ ବୟସ୍କା ପୀଡ଼ିତା କହିଛନ୍ତି, ଗତ ସପ୍ତାହରେ ଏକ ହୋଟେଲକୁ ମୁରଲୀ ତାଙ୍କୁ ଡାକିଥିଲେ। ସେଠାରେ ପହଞ୍ଚିବା ପରେ ସେ ତାଙ୍କୁ ବଳାତ୍କାର କରିଥିଲେ। ଏହି ଘଟଣା ପରେ ପୀଡ଼ିତାଙ୍କୁ ସ୍ଥାନୀୟ ଏକ ହସ୍ପିଟାଲରେ ଭର୍ତ୍ତି କରାଯାଇଥିଲା। ପୂର୍ବରୁ ଦୁଇଥର ମିଷ୍ଟ ଏସିଆ ରହିଥିବା ମୁରଲୀ ସାମାଜିକ ଗଣମାଧ୍ୟମରେ ମଧ୍ୟ ମହିଳାଙ୍କୁ ଠକି ଆସୁଥିବା ଜଣାପଡିଛି। ଏହି ଘଟଣା ସମ୍ବନ୍ଧରେ ନୌସେନା ଅଧିକାରୀଙ୍କ ନିକଟରେ ଏକ ରିପୋର୍ଟ ଦାଖଲ କରାଯିବ ବୋଲି ପୁଲିସ ପ୍ରକାଶ କରିଛି।
