ପ୍ରଦର୍ଶନୀ ପଡିଆରେ ଜମୁଛି ଜାତୀୟ ଜନଜାତି ଶିଳ୍ପମେଳା ଏବଂ ନୃତ୍ୟ ମହୋତ୍ସବ

ଭୁବନେଶ୍ବର: ଜାନୁଆରୀ ୫ତାରିଖଠାରୁ ରାଜଧାନୀ ପ୍ରଦର୍ଶନୀ ପଡିଆରେ ଆରମ୍ଭ ହୋଇଛି ଜାତୀୟ ଜନଜାତି ଶିଳ୍ପମେଳା ଏବଂ ନୃତ୍ୟ ମହୋତ୍ସବ। ଅନୁସୂଚିତ ଜନଜାତି ଓ ପଛୁଆ ବର୍ଗ କଲ୍ୟାଣ ବିଭାଗ ମନ୍ତ୍ରୀ ଜଗନ୍ନାଥ ସାରକା ଶୁକ୍ରବାର ସନ୍ଧ୍ୟାରେ ଏହାକୁ ଉଦଘାଟନ କରିଛନ୍ତି। ଏହି ଅବସରରେ ମନ୍ତ୍ରୀ କହିଛନ୍ତି ଜନଜାତିଙ୍କ ଜୀବନ ଓ ଅନ୍ୟନ୍ୟ କଳା ସଂସ୍କୃତିର ବିଶେଷ ଆକର୍ଷଣ ରହିଛି।

ବର୍ତ୍ତମାନ ସମୟରେ ଜନଜାତି ବର୍ଗର ଯୁବପିଢି ଏବଂ ଛାତ୍ରଛାତ୍ରୀ ମାନେ ବିଭିନ୍ନ କ୍ଷେତ୍ରରେ ନିଜର ସ୍ବତନ୍ତ୍ର ପରିଚୟ ସୃଷ୍ଟି କରିଛନ୍ତି । ଏହି କାର୍ଯ୍ୟକ୍ରମ ସେମାନଙ୍କୁ ଆହୁରି ଆଗକୁ ଯିବାକୁ ପ୍ରେରଣା ଦେବ । ଭାରତ ସରକାରଙ୍କ ଜନଜାତି ବ୍ୟାପାର ମନ୍ତ୍ରାଳୟ ଏବଂ ରାଜ୍ୟ ଅନୁସୂଚିତ ଜାତି ଓ ଅନୁସୂଚିତ ଜନଜାତି ଗବେଷଣା ପ୍ରତିଷ୍ଠାନ ପକ୍ଷରୁ ଏହି ମେଳାର ଆୟୋଜନ କରାଯାଉଛି।

ଏଥିରେ ୧୨ଟି ରାଜ୍ୟର ପ୍ରାୟ ୨୦୦ରୁ ଉଦ୍ଧ୍ଵର୍ର୍ ଜନଜାତି କାରିଗର ଏଥିରେ ସାମିଲ ହୋଇଛନ୍ତି। ୭୦ରୁ ଅଧିକ ଷ୍ଟଲ ବସିଥିବାବେଳେ ଜନଜାତି ଅଳଙ୍କାର , ଆକର୍ଷଣୀୟ ପୋଷାକ , ବାଉଁଶ ଏବଂ ଲୌହ ସାମଗ୍ରୀ , ଢୋକ୍ରା , ଟେରାକୋଟା ଆଦି ସମାଗ୍ରୀ ଲୋକଙ୍କର ମୁଖ୍ୟ ଆକର୍ଷଣର କେନ୍ଦ୍ରବିନ୍ଦୁ ସାଜିଛି। ଏହି ମେଳା ଜାନୁଆରୀ ୧୧ ତାରିଖ ଯାଏଁ ଚାଲିବ । ଅପରାହ୍ନ ୨ଟା ୩୦ରୁ ରାତି ୯ଟା ପର୍ୟ୍ୟନ୍ତ ପ୍ରବଳ ଗହଳି ଦେଖିବାକୁ ମିଳୁଛି।

ସେପଟେ ପ୍ରଥମ ଦିନରେ ଅରୁଣାଞ୍ଚଳ ପ୍ରଦେଶର ମିସିମି ଜନଜାତିଙ୍କ ପକ୍ଷରୁ ଲୋକନୃତ୍ୟ , ଗୁଜୁରାଟର କୁନ୍ ଜନଜାତିଙ୍କ କାହାଡିଆ ନୃତ୍ୟ, ତ୍ରିପୁରା ଜନଜାତିଙ୍କ ଖାପରି ନୃତ୍ୟ ଆଦି ଦର୍ଶକଙ୍କୁ ମନ୍ତ୍ରମୁଗ୍ଧ କରିଥିଲା। ଏହି ନୃତ୍ୟ ମହୋତ୍ସବ ଜାନୁଆରୀ ୭ ତାରିଖ ର୍ପଯ୍ୟନ୍ତ ଚାଲିବ । ଏହି ଅବସରରେ ଏକ କଫି ଟେବୁଲ ବୁକ୍ ମଧ୍ୟ ଉନ୍ମୋଚନ କରାଯାଇଥିଲା।

ଏଥିରେ ମୁଖ୍ୟତଃ ଆଦିବାସୀଙ୍କ ଜୀବନ , ସଂସ୍କୃତି ଏବଂ ପରମ୍ପରାକୁ ନେଇ ଯୁବ ଶିଳ୍ପୀମାନେ ଚିତ୍ରଣ କରିଥିବା ବିଭିନ୍ନ ଆକର୍ଷଣୀୟ ଚିତ୍ରକଳା ସ୍ଥାନ ପାଇଛି। ଏହି କାର୍ୟ୍ୟକ୍ରମରେ ଏସଏସଟିଆରଟିଆଇ ଉପନିର୍ଦେଶକ ସନ୍ତୋଷ ରଥ ଏବଂ ଓଏସଡି ସମରେନ୍ଦ୍ର ଭୂତିଆ ପ୍ରମୂଖ ଯୋଗ ଦେଇଥିଲେ।