ନୂଆଦିଲ୍ଲୀ: ଲୋକସଭା ନିର୍ବାଚନ ଆରମ୍ଭ ହେବା ପୂର୍ବରୁ ମାର୍ଚ୍ଚ ୨୬ରେ ପ୍ରସାରଣ ଆରମ୍ଭ କରିଥିବା ନମୋ ଟିଭିର ପ୍ରସାରଣ ନିର୍ବାଚନର ଅନ୍ତିମ ପର୍ଯ୍ୟାୟ ପୂର୍ବରୁ ବନ୍ଦ ହୋଇଯାଇଛି। ବିଜେପି କହିଛି, ଅନ୍ତିମ ପର୍ଯ୍ୟାୟ ନିର୍ବାଚନ ପ୍ରଚାର ଶେଷ ହେବାର ୪୮ ଘଣ୍ଟା ପୂର୍ବରୁ ନମୋ ଟିଭିକୁ ବନ୍ଦ କରାଯାଇଛି। ୪୮ଘଣ୍ଟା ପୂର୍ବରୁ ମଧ୍ୟ କୌଣସି ରାଜନୈତିକ ବିଜ୍ଞାପନ ଦିଆଯାଇ ନାହିଁ। ଏହି ଚ୍ୟାନେଲକୁ ଟାଟା ସ୍କାଏ, ଭିଡିଓକନ ଏବଂ ଡ଼ିସ ଟିଭି ମାଗଣାରେ ପ୍ରସାରଣ କରୁଥିଲେ ଯେତେବେଳେ କି ବିରୋଧୀ ଏହି ଚ୍ୟାନେଲକୁ ନିର୍ବାଚନ ପ୍ରଚାର ପାଇଁ ଉଦ୍ଦିଷ୍ଟ ବୋଲି କହି ସମାଲୋଚନା କରିଥିଲେ।
ନିର୍ବାଚନ ଆୟୋଗରେ ବିରୋଧୀ ଦଳଗୁଡିକ ପକ୍ଷରୁ ବାରମ୍ବାର ଅଭିଯୋଗ ସତ୍ୱେ ବିଜେପି କିମ୍ବା ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କ ବିରୁଦ୍ଧରେ ଆୟୋଗ କୌଣସି ପଦକ୍ଷେପ ନେଇ ନ ଥିଲେ। ଏହି ଚ୍ୟାନେଲକୁ ଟାଟା ସ୍କାଏ ପ୍ରଥମେ ନିଉଜ ଚ୍ୟାନେଲ କହୁଥିଲେ ମଧ୍ୟ ପରେ ବିଶେଷ ସେବା ବୋଲି କହିବା ସହ ପ୍ରସାରଣ ଜାରି ରଖିଥିଲା। ଅନ୍ୟପକ୍ଷରେ ଷଷ୍ଠ ପର୍ଯ୍ୟାୟ ନିର୍ବାଚନ ପୂର୍ବରୁ ନମୋ ଟିଭିରେ ନିର୍ବାଚନ ସମ୍ବନ୍ଧୀୟ ସାମଗ୍ରୀ ନାମକ କାର୍ଯ୍ୟକ୍ରମ ପ୍ରସାରଣ କରିଥିବାରୁ ଦିଲ୍ଲୀର ମୁଖ୍ୟ ନିର୍ବାଚନ ଅଧିକାରୀ ନୋଟିସ ଜାରି କରିଥିଲେ।
