ନବରଙ୍ଗପୁର: ବେଆଇନ ଜଙ୍ଗଲ ଅଧିକାର ଓ ନୂତନ ଜଙ୍ଗଲ କାଟୁଥିବା ବ୍ୟକ୍ତିମାନଙ୍କୁ ନୂତନ ଜଙ୍ଗଲ ଅଧିକାର କମିଟି (ଏଫଆରସି) ଗଠନ କରି ଜଙ୍ଗଲ ଆଇନ ଖିଲାପ କରବା ପ୍ରୟାସକୁ ରଦ୍ଦ କରିବା ଓ ଜଙ୍ଗଲ ଜମିକୁ ନେଇ ଆଦିବାସୀ ମଧ୍ୟରେ ବିବାଦ କରି ଉସୁକାଉଥିବା ରାଜେଶ ଜାନୀ, ଦିବାକର ପୂଜାରୀ ଓ ହାରାବତୀ ଗଣ୍ଡଙ୍କୁ ତୁରନ୍ତ ଗିରଫ କରିବା ଦାବିକରି ଉମରକୋଟ ରେଞ୍ଜର ୮୨ଟି ବନସୁରକ୍ଷା ସମିତି, ଜଙ୍ଗଲ ଅଧିକାର କମିଟିର ସଦସ୍ୟ ଓ ସମର୍ଥକ ଗ୍ରାମବାସୀ ମାନେ ଏକ ବିରାଟ ଶୋଭାଯାତ୍ରାରେ ଚାଉଁରିଆଗୁଡାରୁ ବାହାରି ନବରଙ୍ଗପୁର ବ୍ଳକ ଅଫିସ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରିବା ସହିତ ଧାରଣାରେ ବସିଥିଲ । ବ୍ଲକ ସମ୍ମିଳନୀ କକ୍ଷରେ ଚାଲିଥିବା ଅଭିଯୋଗ ଶିବିରରୁ ଆସି ଜିଲାପାଳ ଡଃ କମଳ ଲୋଚନ ମିଶ୍ର ଆନ୍ଦୋଳନକାରୀଙ୍କୁ ଭେଟି ଦାବିପତ୍ର ଗ୍ରହଣ କରିଥିଲେ । ଉମରକୋଟ ବ୍ଳକ ଅନ୍ତର୍ଗତ ସମସ୍ତ ୮୨ଟି ବନସୁରକ୍ଷା ସମିତି, ଜଙ୍ଗଲ ଅଧିକାର କମିଟି ଓ ଅନୁସୂଚିତ ଜନଜାତି ସଂପ୍ରଦାୟର ବ୍ୟକ୍ତିମାନେ ଏହି ଘେରାଉରେ ସାମିଲ ହୋଇଥିଲେ ।
ଗତ ୨୦୨୦ ମସିହାରେ ବେହେଡା ନର୍ସରୀ ପରିସର ମଧ୍ୟରେ ସିର୍ଲିଗୁଡା, ସୁନାବେଡା, ନାୟକଗୁଡା ଓ ପୂଜାରୀଗୁଡା ବନସୁରକ୍ଷା ସମିତି ସହିତ କପସାଭଟ୍ଟା, ସାରିଆଭଟ୍ଟା, ଲକଟିପକନା, ଗ୍ରାମଗୁଡିକର ବ୍ୟକ୍ତି ବିଶେଷ ଓ ବନବିଭାଗ କର୍ମଚାରୀଙ୍କର ଉପସ୍ଥିତରେ ବୈଠକ କରାଯାଇଥିଲା । ଏହି ବୈଠକରେ ସଂରକ୍ଷିତ ଜଙ୍ଗଲରେ ଥିବା ସମସ୍ତ ଲୋକ ପ୍ରତିଶ୍ରୁତି ଦେଇଥିଲେ ଯେ, ନିଜ ପଟ୍ଟା ବ୍ୟତୀତ ବନ ସୁରକ୍ଷାସମିତି ଅଧିନରେ ଥିବା ସଂରକ୍ଷିତ ଜଙ୍ଗଲରେ ଚାଷ କରିବେ ନାହିଁ । ତତ୍ପରେ ପୁନର୍ବାର ସେମାନେ ଚାଷ କରିବା ଉଦ୍ୟମ କରିବାରୁ ବନସୁରକ୍ଷା ସମିତି ଅଭିଯୋଗ କରିବା ପରେ ବନବିଭାଗର ପକ୍ଷରୁ ତହସିଲଦାରଙ୍କର ଉପସ୍ଥିତିରେ ୧୪୪ ଧାରା ଲାଗୁ କରାଯାଇଥିଲା । ଚଳିତବର୍ଷ ସିର୍ଲିଗୁଡା ବନସୁରକ୍ଷା ସମିତି ବୁଝାଇବା ସତ୍ୱେ ସେମାନେ ପୁନର୍ବାର ରାତାରାତି ମକା ବୁଣିବା ସହିତ ଅସ୍ଥାୟୀଘର ନିର୍ମାଣ କରିଥିଲେ । ସେହିଘରକୁ ନିଜେନିଆଁ ଲଗାଇ ଦେଇ ମୋବାଇଲରେ ରେକର୍ଡି କରି ଗଣମାଧ୍ୟମକୁ ଦେଇଥିଲେ ଓ ସିର୍ଲିଗୁଡା ବନସୁରକ୍ଷା ସମିତିକୁ ବଦନାମ କରିଛନ୍ତି ।
ଏଥିରେ ରାଜେଶ ଜାନୀ, ଦିବାକର ପୂଜାରୀ ହାରାବତୀ ଗଣ୍ଡ ମିଳିତ ଭାବେ ଆଦିବାସୀ ଓ ଆଦିବାସୀ ମାନଙ୍କର ମଧ୍ୟରେ ବିବାଦ ଉସୁକାଇଥିବାରୁ ସେମାନଙ୍କୁ ତୁରନ୍ତ ଗିରଫ କରିବାକୁ ଦାବି କରାଯାଇଛି । ନଚେତ ଉମରକୋଟ ରେଞ୍ଜର ୮୨ଟି ବନସୁରକ୍ଷା ସମିତି ଇସ୍ତଫା ଦେଇ ଜଙ୍ଗଲ ସୁରକ୍ଷା ପାଇଁ ଜିଲା ବ୍ୟାପିକ ଆନ୍ଦୋଳନ କରିବାକୁ ବାଧ୍ୟ ହେବ । କପସା ଭଟ୍ଟା, ସାରିଆ ଭଟ୍ଟା ଓ ଲକଟିପକନାରେ ନୂତନ ଏଫଆରସି ଗଠନ କରି ପଟ୍ଟାଦେବା ବନ୍ଦ କରାଯିବା, ବେଆଇନ ଭାବେ ଜଙ୍ଗଲକାଟି ମକା ଚାଷୀ ମାଫିଆଙ୍କୁ ଜମି ବିକିବା ବନ୍ଦ କରାଯିବା, ବେଆଇନ ଭାବେ ନେଇଥିବା ପଟ୍ଟାକୁ ରଦ୍ଦ କରାଯିବା । ବନସୁରକ୍ଷା ସମିତିର କର୍ମକର୍ତ୍ତା ମାନଙ୍କ ନାମରେ ମିଥ୍ୟା ମାମଲା ରୁଜୁ କରାଯାଇଥିବାରୁ ମାମଲା ପ୍ରତ୍ୟାହର କରାଯିବାକୁ ଦାବି କରାଯାଇଛି ।
ଏହି ଦାବିଗୁଡିକ ତୁରନ୍ତ କାର୍ଯ୍ୟକାରୀ କରାନଗଲେ ଆନ୍ଦୋଳନକୁ ତୀବ୍ର କରାଯିବ ବୋଲି ଚେତାବନୀ ଦିଆଯାଇଛି । ତେବେ ଏହାର ଅନୁଧ୍ୟାନ କରି ପଦକ୍ଷେପ ନିଆଯିବ ବୋଲି ଜିଲାପାଳ ଡଃ.ମିଶ୍ର ପ୍ରତିଶ୍ରୁତି ଦେଇଥିଲେ । ଅତିରିକ୍ତ ଜିଲାପାଳ ଭାସ୍କର ରଇତ, ଜିଲା ପରିଷଦର ମୁଖ୍ୟ ଉନ୍ନୟନ ଅଧିକାରୀ ରତ୍ମାକର ସାହୁ, ଅତିରିକ୍ତ ଏସ.ପି ଜୟକୃଷ୍ଣ ବେହେରା ପ୍ରମୁଖ ଉପସ୍ଥିତ ରହି ଆନ୍ଦୋଳନକାରୀଙ୍କ ସହିତ ଆଲୋଚନା କରିବା ପରେ ପ୍ରତ୍ୟାହାର କରାଯାଇଥିଲା । ପୁଲିସ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା ଗ୍ରହଣ କରାଯାଇଥିଲା ।
Comments are closed.