ସେପ୍ଟେମ୍ବର ୨୭ ତାରିଖରେ ତାମିଲନାଡୁର କରୁରଠାରେ ଘଟିଥିବା ଭୟାନକ ଦଳାଚକଟା ଭାରତରେ ସେଲିବ୍ରିଟି ଚାଳିତ ଭିଡ଼ର ବିପଦକୁ ପୁଣି ଥରେ ପଦାକୁ ଆଣିଛି। ଅଭିନେତାରୁ ରାଜନେତା ବନିଥିବା ଲୋକପ୍ରିୟ ସିନେ ତାରକା ବିଜୟ ଏବଂ ତାଙ୍କ ଦଳ, ତାମିଲଗା ଭେଟ୍ରି କାଝାଗାମର ଏକ ରାଲିରେ ୩୯ ଜଣଙ୍କ ଜୀବନ ଯାଇଥିବାବେଳେ ୫୦ରୁ ଅଧିକ ଲୋକ ଆହତ ହୋଇଛନ୍ତି। ଭାରତୀୟମାନଙ୍କର ସିନେ ତାରକାମାନଙ୍କ ପ୍ରତି ରହିଥିବା ପାଗଳାମି କେମିତି ଏକ ରାଜନୈତିକ ସମାବେଶକୁ ଧ୍ବଂସସ୍ତୂପରେ ପରିଣତ କରିପାରେ କରୁର ଘଟଣା ତାହାର ସ୍ମାରକ ପାଲଟିଛି।
ବିଜୟ ହେଉଛନ୍ତି ତାମିଲ ସିନେମାର ଜଣେ ଲୋକପ୍ରିୟ ତାରକା। ତାଙ୍କର ବହୁତ ବଡ଼ ପ୍ରଶଂସକ ବର୍ଗ ଅଛନ୍ତି। ତେବେ ବିଜୟଙ୍କ ରାଜନୈତିକ ପ୍ରବେଶ ତାଙ୍କୁ ଭଲପାଉଥିବା ଲୋକଙ୍କର ଉତ୍ସାହ ଆହୁରି ବଢ଼ାଇ ଦେଇଛି, ଯାହା ଫଳରେ ଅନେକ ପ୍ରଶଂସକଙ୍କ ପ୍ରଶଂସା ଶେଷରେ ଏକ ଉନ୍ମାଦନାରେ ପରିଣତ ହୋଇଛି। କରୁରରେ ଆୟୋଜକମାନେ ୧୦,୦୦୦ ଲୋକଙ୍କ ଆଶା କରିଥିଲେ, କିନ୍ତୁ ପ୍ରାୟ ଲକ୍ଷାଧିକ ଲୋକ ପହଞ୍ଚିଥିଲେ। ଜଣାଯାଇଛି ବିଜୟ ପ୍ରାୟ ୭ ଘଣ୍ଟା ବିଳମ୍ବରେ ଆସିଥିଲେ। ତଥାପି ଲୋକେ ଅପେକ୍ଷା କରିଥିଲେ। କେବଳ ଅପକ୍ଷା କରିନଥିଲେ ବରଂ ଲୋକସଂଖ୍ୟା ବଢିବଢି ଚାଲିଥିଲା। ଅତ୍ୟଧିକ ଭିଡ଼ ଓ ସୀମିତ ସୁରକ୍ଷା ବ୍ୟବସ୍ଥା ଏକ ବିପଜ୍ଜନକ ପରିସ୍ଥିତି ସୃଷ୍ଟି କରିଥିଲା ଯାହା ଶେଷରେ ଦଳାଚକଟାରେ ପରିଣତ ହେଲା ଓ ଅନେକ ନିରୀହ ଲୋକଙ୍କ ଜୀବନ ନେଲା।
ଏହି ଦୁର୍ଘଟଣାକୁ କେବଳ ପରିଚାଳନାଗତ ତ୍ରୁଟି କହିଲେ ଯଥେଷ୍ଟ ହେବନାହିଁ। ଏହା ଭାରତୀୟ ସମାଜରେ ଏକ ଗଭୀର ସମସ୍ୟାକୁ ପ୍ରତିଫଳିତ କରୁଛି। ସେଇଟି ହେଉଛି ସେଲିବ୍ରିଟିଙ୍କୁ ଭଲପାଇବାର ଓ ପୂଜା କରିବାର ସଂସ୍କୃତି। ଯେତେବେଳେ ଏହି ଭଲପାଇବା ଉନ୍ମାଦନାରେ ପରିଣତ ହୁଏ ଏବଂ ସୁରକ୍ଷା ନିୟମାବଳୀକୁ ଅଣଦେଖା କରାଯାଏ, ସେତେବେଳେ ବିପର୍ଯ୍ୟୟ ଅବଶ୍ୟମ୍ଭାବୀ। ବିଜୟଙ୍କ ଦୁଃଖ ପ୍ରକାଶ ଏବଂ କ୍ଷତିପୂରଣର ପ୍ରତିଶ୍ରୁତି ଦାୟିତ୍ୱର ସୂଚକ, କିନ୍ତୁ ତାହା ମୃତ୍ୟୁ ଜନିତ କ୍ଷତିକୁ ପୂରଣ କରିପାରିବ ନାହିଁ କିମ୍ବା ବ୍ୟବସ୍ଥାଗତ ସମସ୍ୟାର ସମାଧାନ କରିପାରିବ ନାହିଁ। ଉନ୍ମାଦନା ଏକ ବିପଜ୍ଜନକ ପରିବେଶ ସୃଷ୍ଟି କରେ ଯେଉଁଠାରେ ଲୋକର ବ୍ୟକ୍ତିଗତ ବିଚାର ଶକ୍ତି ଲୋପପାଏ।
କରୁରରୁ ମିଳିଥିବା ଶିକ୍ଷା ସ୍ପଷ୍ଟ, ସେଲିବ୍ରିଟିଙ୍କ ନେତୃତ୍ୱରେ ହେଉଥିବା କାର୍ଯ୍ୟକ୍ରମଗୁଡ଼ିକୁ କେବଳ ସାଧାରଣ କାର୍ଯ୍ୟକ୍ରମ ଭାବରେ ନୁହେଁ, ବରଂ ଦକ୍ଷ ପରିଚାଳନା ଆବଶ୍ୟକ କରୁଥିବା ଉଚ୍ଚ ବିପଦପୂର୍ଣ୍ଣ ସମାବେଶ ଭାବରେ ଗ୍ରହଣ କରାଯିବା ଉଚିତ। ଭିଡ଼ ନିୟନ୍ତ୍ରଣ ନିୟମ, ଉନ୍ନତ ଭିତ୍ତିଭୂମି, ସମୟାନୁବର୍ତ୍ତୀ କାର୍ଯ୍ୟସୂଚୀ ଏବଂ ପର୍ଯ୍ୟାପ୍ତ ସୁରକ୍ଷା ଅପରିହାର୍ଯ୍ୟ। ସରକାର ଏବଂ ଆୟୋଜକମାନେ ଲୋକପ୍ରିୟତା ନାମରେ ମୌଳିକ ସତର୍କତାକୁ ଅବହେଳା କରିବା ଆଦୌ ଉଚିତ ନୁହେଁ।
ନୂତନ ପିଢିର ଭାରତକୁ ସେଲିବ୍ରିଟିଙ୍କ ପ୍ରତି ଥିବା ଅସ୍ୱାସ୍ଥ୍ୟକର ମୋହର ସାମ୍ନା କରିବାକୁ ପଡ଼ିବ। ଅଭିନେତା ଏବଂ ରାଜନେତାମାନେ ସାଧାରଣ ବ୍ୟକ୍ତି। ଯଦିଓ ପ୍ରଭାବଶାଳୀ, କିନ୍ତୁ ଦିବ୍ୟ ନୁହନ୍ତି। ସେମାନଙ୍କୁ ଦେବତା ଭାବରେ ବ୍ୟବହାର କରିବା ଜୀବନକୁ ବିପଦରେ ପକାଏ ଏବଂ ଦାୟିତ୍ୱବାନ ନାଗରିକତାର ଧାରଣାକୁ କ୍ଷୁଣ୍ଣ କରେ। ସେଲିବ୍ରିଟିମାନେ ଆମର ପ୍ରେରଣା ହେବା ଉଚିତ। ତେବେ ସେମାନଙ୍କ ପ୍ରତି ଆମର ଉନ୍ମାଦନା ଆମକୁ ଦୃଷ୍ଟିହୀନ କରିବା ଉଚିତ ନୁହେଁ। କରୁର ଦଳାଚକଟା ଏକ ସତର୍କ ଘଣ୍ଟି। ଯଦି ଆମେ ଏଥିରୁ ଶିକ୍ଷା ନ ନେବା, ତେବେ ଏପରି ଦୁର୍ଘଟଣା ବାରମ୍ବାର ଘଟିବ। ସୁରକ୍ଷାକୁ ପ୍ରାଥମିକତା ଦେବା ଏବଂ ଦାୟିତ୍ୱକୁ ଭଲପାଇବା ଉପରେ ନଜର ରଖିବାର ସମୟ ଆସିଛି ।
