ମୋହନା: ହିଲଟପ ସ୍ନାତକ ମହାବିଦ୍ୟାଳୟ ପକ୍ଷରୁ ସପ୍ତାହେ ବ୍ୟାପି ଆରମ୍ଭ ହୋଇଥିବା ପୂଜା କାଳୀନ ଜାତୀୟ ସେବା ଯୋଜନା କାର୍ଯ୍ୟକ୍ରମ ଶୁକ୍ରବାର ଦିନ ଉଦଯାପିତ ହୋଇଯାଇଛି। ମହାବିଦ୍ୟାଳୟର ବରିଷ୍ଠ ଅଧ୍ୟାପକ ପ୍ରଣବାନନ୍ଦ ପାଟ୍ଟୋଶୀଙ୍କ ସଭାପତିତ୍ଵରେ ଅନୁଷ୍ଠିତ ଏହି ଉଦଯାପନି ଉତ୍ସବକୁ ମୁଖ୍ୟ ଅତିଥିଭାବେ ମୋହନା ଥାନା ଅଧିକାରୀ ପ୍ରଶାନ୍ତ ନିସିକା, ମୁଖ୍ୟବକ୍ତା ମଧୁସୂଦନ ପାଢ଼ୀ, ସମ୍ମାନୀତ ଅତିଥି ଏସଆଇ ଜ୍ୟୋତ୍ସ୍ନା ରାଏ,ଅଧ୍ୟାପିକା ରୀତା କୁମାରୀ ଶତପଥି ଯୋଗ ଦେଇଥିଲେ। ଏହି ଶିବିରର ୫୦ ଜଣ ସ୍ୱେଚ୍ଛାସେବୀ ୧ ତାରିଖଠାରୁ ୭ ତାରିଖ ପର୍ଯ୍ୟନ୍ତ ସ୍ଥାନୀୟ ଅଞ୍ଚଳର ବିଭିନ୍ନ ସାମାଜିକ ଅନୁଷ୍ଠାନ ଗୁଡିକର ସେବା କାର୍ଯ୍ୟ କରିବା ସହିତ ରାସ୍ତାଘାଟ ଓ କାର୍ଯ୍ୟାଳୟ ପରିସର ପରିଷ୍କାର ପରିଛନ୍ନ ଓ ବିଭିନ୍ନ ସଚେତନତା ମୂଳକ କାର୍ଯ୍ୟକ୍ରମ କରିଥିଲେ।
ଉଦଯାପନୀ ଉତ୍ସବ ପ୍ରାରମ୍ଭରେ ଅତିଥି ଓ ଶିକ୍ଷାର୍ଥୀମାନେ ଉଚ୍ଚ ମାଧ୍ଯମିକ ବିଦ୍ୟାଳୟର କିରାଣୀ ଅଜୟ ଦଳେଇ(ବୁଲୁ)ଙ୍କ ଅକାଳ ବିୟୋଗରେ ୨ ମିନଟ ଧରି ନିରବ ପ୍ରାର୍ଥନା କରାଯାଇଥିଲା।ଏହାପରେ ଶିକ୍ଷାର୍ଥୀମାନଙ୍କ ଦ୍ୱାରା ଦେଶାତ୍ମବୋଧ ସଙ୍ଗୀତ, ଆଦିବାସୀ ନୃତ୍ୟ ଓ ଗୀତ ପରିବେଷଣ କରାଯାଇଥିଲା। ଅତିଥିମାନେ ନିଜ ବକ୍ତବ୍ୟରେ ଶୁଙ୍ଖଳତା, ଅନୁଶାସନ, ସମୟାନୁବର୍ତ୍ତିତା,ସେବାର ଲକ୍ଷ୍ୟ, ଉଦ୍ଦେଶ୍ୟ ଓ ପରୋପକାର ସଂପର୍କରେ ମତବ୍ୟକ୍ତ କରିଥିଲେ। ଶେଷରେ ଅତିଥି ମାନଙ୍କ ଦ୍ଵାରା ଶିକ୍ଷାର୍ଥୀମାନଙ୍କୁ ମାନପତ୍ର ପ୍ରଦାନ କରାଯାଇଥିଲା। ଯୋଜନା ଅଧିକାରୀ ଅଧ୍ୟାପକ ସନ୍ତୋଷ କୁମାର ନନ୍ଦ ଏହି କାର୍ଯ୍ୟକ୍ରମକୁ ପରିଚାଳନା କରିଥିବା ବେଳେ ଗ୍ରନ୍ଥାଗାର ରକ୍ଷକ ବସନ୍ତ କୁମାର ବେହେରା ସହଯୋଗ କରିଥିଲେ।
