ଆସନ୍ତା କାଲି ଓଡିଶା ଆସୁଛନ୍ତି ମୋଦୀ ଓ ଯୋଗୀ

ଭୁବନେଶ୍ୱର : ନିର୍ବାଚନ ଯେତିକି ପାଖେଇ ଆସୁଛି, ଜାତୀୟ ନେତାଙ୍କ ଓଡିଶା ଗସ୍ତ ସେତିକି ବଢିବାରେ ଲାଗିଛି । ଏହି କ୍ରମରେ ଆସନ୍ତା କାଲି ବିଜେପିର ଦୁଇ ଜଣ ହେଭିୱଟ୍ ନେତା ନିର୍ବାଚନ ପ୍ରଚାର ପାଇଁ ଓଡିଶା ଗସ୍ତରେ ଅସୁଛନ୍ତି । ଓଡିଶାର ବ୍ରହ୍ମପୁରରେ ଆୟୋଜିତ ସମାବେଶରେ ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ଯୋଗ ଦେବାର କାର୍ଯ୍ୟକ୍ରମ ରହିଥିବା ବେଳେ ପୂର୍ବ ନିଦ୍ଧାରିତ ସୂଚୀ ଅନୁଯାୟୀ ପ୍ରଧାନମନ୍ତ୍ରୀ ମୋଦୀ ଓଡିଶା ଗସ୍ତରେ ସୁନ୍ଦରଗଡରେ ଜନସଭାକୁ ସମ୍ବୋଧିତ କରିବେ । ଯୋଗୀ ଆଦିତ୍ୟନାଥ ଆସନ୍ତାକାଲି ଦିନ ପ୍ରାୟ ୨ଟା ବେଳେ ବ୍ରହ୍ମପୁରର ବିବେକ ବିହାରଠାରେ ଜନସଭାରେ ସମ୍ବୋଧିତ କରିବେ ବୋଲି ସୂଚନା ମିଳିଛି ।

ସୂଚନାଯୋଗ୍ୟ, ଏହା ପୂର୍ବରୁ ଫେବୃଆରୀ ୨୦ ତାରିଖରେ ଯୋଗୀ ଆଦିତ୍ୟନାଥ ଓଡିଶା ଗସ୍ତରେ ଆସି ଭବାନୀପାଟଣା ସ୍ଥିତ ଲାଲବାହାଦୂର ଶାସ୍ତ୍ରୀ ଷ୍ଟାଡିୟମରେ ଏକ ସମାବେଶରେ ଉଦବୋଧନ ଦେଇଥିଲେ । ଆସନ୍ତା ୯ରେ କଂଗ୍ରେସ ଅଧ୍ୟକ୍ଷ ରାହୁଲ ଗାନ୍ଧୀ ପୁଣି ଓଡିଶା ଗସ୍ତରେ ଦିଗପହଣ୍ଡିରେ ଆୟୋଜିତ ସମାବେଶରେ ଯୋଗ ଦେବେ ।