ଜାମ୍ମୁ: ପୁଣି ଥରେ ଜାମ୍ମୁରେ ରବିବାର ମୋବାଇଲ ଏବଂ ଇଣ୍ଟରନେଟ ସେବା ବନ୍ଦ କରିଦିଆଯାଇଛି। କ’ଣ ପାଇଁ ସେବା ବନ୍ଦ କରାଯାଇଛି ସେ ନେଇ ପ୍ରଶାସନ ପକ୍ଷରୁ କୌଣସି ସୂଚନା ଦିଆଯାଇ ନାହିଁ। ଘାଟିରେ ଆତଙ୍କବାଦୀ ଆକ୍ରମଣ ପାଇଁ ଯୋଜନା ସମ୍ପର୍କରେ ତଥ୍ୟ ମିଳିବା ପରେ ଏଭଳି ପଦକ୍ଷେପ ନିଆଯାଇଥିବା କୁହାଯାଉଛି।
ଧାରା ୩୭୦ ଉଚ୍ଛେଦକୁ ଦୃଷ୍ଟିରେ ରଖି ଜାମ୍ମୁ-କାଶ୍ମୀରରେ ମୋବାଇଲ ଓ ଇଣ୍ଟରନେଟ ସେବା ବନ୍ଦ କରିଦିଆଯାଇଥିଲା। ଏହା ପରେ ଗତ ଶୁକ୍ରବାର ରାତିରୁ ଜାମ୍ମୁର ୫ଟି ଜିଲା ଯଥା ଜାମ୍ମୁ, ରିୟାସୀ, ସାମ୍ବା, କଠୁଆ ଏବଂ ଉଦ୍ଧମପୁରରେ ମୋବାଇଲ ଏବଂ ଇଣ୍ଟରନେଟ ସେବା ଆରମ୍ଭ କରାଯାଇଥିଲା। ଶୁକ୍ରବାର ମୁଖ୍ୟ ଶାସନ ସଚିବ ବି.ବି.ଆର. ସୁବ୍ରମଣ୍ୟମ କହିଥିଲେ, କିଛି ଅଞ୍ଚଳରେ ପରିସ୍ଥିତିକୁ ଦୃଷ୍ଟିରେ ରଖି ମୋବାଇଲ ସେବା ଆରମ୍ଭ କରିଦିଆଯିବ। ପର୍ଯ୍ୟାୟକ୍ରମେ ଏହି କାର୍ଯ୍ୟ କରାଯିବ। ଆମ ନିକଟରେ ବିଶ୍ଵସ୍ତ ସୂତ୍ରରୁ ସୂଚନା ରହିଛି ଯେ ଆତଙ୍କବାଦୀ ସଂଗଠନ ଜାମ୍ମୁ-କାଶ୍ମୀରରେ ଆକ୍ରମଣ କରିବାକୁ ଯୋଜନା କରୁଛନ୍ତି। ଏଥିପାଇଁ ପ୍ରଶାସନ ପକ୍ଷରୁ ମୋବାଇଲ ଏବଂ ଇଣ୍ଟରନେଟ ସେବା ଉପରେ ପ୍ରତିବନ୍ଧକ ଲଗାଯାଇଥିଲା।
