ଟଙ୍କା ହଡପକୁ ନେଇ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀଙ୍କ ନାମରେ ଏତଲା ଦେଲେ ଚାନ୍ଦବାଲି ବିଡିଓ

ଧାମରା : ଚାନ୍ଦବାଲି ବ୍ଲକ ଅଧିନସ୍ଥ ଏବଂ ବାଂଶଡା ଥାନା ଅଧିନରେ ଥିବା ବଜରାପୁର, ଗୋପିନାଥପୁର ପଞ୍ଚାୟତ ଦାୟିତ୍ୱରେ ଥିବା ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଏହି ୨ ପଞ୍ଚାୟତର ବହୁ ବୃଦ୍ଧ ଏବଂ ବୃଦ୍ଧାଙ୍କ ପେନସନ ଟଙ୍କା ହଡପ କରିଥିବା ଅଭିଯୋଗରେ ତାଙ୍କ ନାମରେ ବାଂଶଡା ଥାନାରେ ଏତଲା ଦିଆଯାଇଛି। ଏହି ଖବର ପ୍ରକାଶ ପାଇବା ପୂର୍ବରୁ ବହୁବାର ଚାନ୍ଦବାଲି ବିଡିଓ ସଂପୃକ୍ତ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଧିରେନ୍ଦ୍ର ନାୟକଙ୍କୁ ସେ ହଡପ କରିଥିବା ଅର୍ଥର ହିସାବ ଦେବାକୁ କହିଥିବା ବେଳେ ସଂପୃକ୍ତ ପଞ୍ଚାୟତ କାର୍ଯ୍ୟ ନିର୍ବାହୀ ଅଧିକାରୀ ଏହି କଥାକୁ ଖାତିର ନକରି ସମସ୍ତ ଅର୍ଥକୁ ହଡପ କରି ଚଳୁ କରି ଦେଇଥିଲେ। ଖବର ଅନୁଯାୟୀ ଗତ ସେପ୍ଟମ୍ବର ୨୦୨୧ ମସିହାରୁ ଜୁଲାଇ ୨୦୨୨ ମସିହା (୧୧ମାସ ) ମଧ୍ୟରେ ସେ ୨୯ଲକ୍ଷ ୧୯ହଜାର ୯ଶହ ଟଙ୍କାର ହିସାବ ଦେଇ ପାରୁନଥିବା ବେଳେ ତାଙ୍କ ନାମରେ ଚାନ୍ଦବାଲି ବିଡିଓ ଜ୍ୟୋତି ବିକାଶ ଦାସ ଏକ ଏତଲା ଦେଇଛନ୍ତି । କେଉଁ ପରିସ୍ଥିତିରେ ସଂପୃକ୍ତ ପଞ୍ଚାୟତ କାର୍ଯ୍ୟନିର୍ବାହୀ ଅଧିକାରୀ ଦୀର୍ଘ ୧୧ ମାସ ମଧ୍ୟରେ ସରକାରୀ ତହବିଲରୁ ବୃଦ୍ଧ ଏବଂ ବୃଦ୍ଧାଙ୍କ ପେନସନ ପାଇଁ ଥିବା ଏତେ ପରିମାଣର ଅର୍ଥ ହଡପ କଲେ ତାହାର ବିଧିବଦ୍ଧ ତଦନ୍ତ ହେବା ଜରୁରୀ ବୋଲି ସଂପୃକ୍ତ ପଞ୍ଚାୟତ ବାସିନ୍ଦା ଅଭିଯୋଗ ଆଣିଛନ୍ତି।