ଶ୍ରୀନଗର: ପିପୁଲ୍ସ ଡେମୋକ୍ରାଟିକ ପାର୍ଟି (ପିଡିପି) ମୁଖ୍ୟ ମେହବୁବା ମୁଫ୍ତି ଜାମ୍ମୁ-କାଶ୍ମୀର ବିଧାନସଭା ନିର୍ବାଚନରେ ପ୍ରତିଦ୍ବନ୍ଦ୍ବିତା କରିବେ ନାହିଁ ବୋଲି ବୁଧବାର ଘୋଷଣା କରିଛନ୍ତି। ମେହବୁବା କହିଛନ୍ତି କେନ୍ଦ୍ରଶାସିତ ଅଞ୍ଚଳ ସରକାରରେ ମୁଖ୍ୟମନ୍ତ୍ରୀ ହେଲେ ସେ ତାଙ୍କ ଦଳର ଲକ୍ଷ୍ୟ ପୂରଣ କରିପାରିବେ ନାହିଁ। ଏପରି କି ଭୋଟରକୁ ଦେଇଥିବା ବିଭିନ୍ନ ପ୍ରକାର ପ୍ରତିଶ୍ରୁତି ପୂରଣ କରିପାରିବେ ନାହିଁ। ୨୦୧୬ରେ ବିଜେପି ସହିତ ମେଣ୍ଟ କରି ସେ ରାଜ୍ୟରେ ସରକାର ଗଠନ କରିଥିଲେ। ସରକାର ଗଠନ କରିବା ପରେ ୧୨,୦୦୦ ଲୋକଙ୍କ ବିରୋଧରେ ରୁଜୁ ହୋଇଥିବା ଏତଲାକୁ ପ୍ରତ୍ୟାହାର କରିନେଇଥିଲେ। ଏବେ କିନ୍ତୁ ଜାମ୍ମୁ-କାଶ୍ମୀର ଏକ କେନ୍ଦ୍ରଶାସିତ ଅଞ୍ଚଳ। ଏଠାରେ ମୁଖ୍ୟମନ୍ତ୍ରୀ ହେଲେ ସେ କୌଣସି ସ୍ବାଧୀନ ନିଷ୍ପତ୍ତି ନେଇପାରିବେ ନାହିଁ। ନିର୍ବାଚନ ନ ଲଢିବା ନିଷ୍ପତ୍ତି ସମ୍ପର୍କରେ ମେହବୁବା ବିଚ୍ଛିନ୍ନତାବାଦୀ ନେତାଙ୍କୁ ଚିଠି ଲେଖିଛନ୍ତି। ଜାମ୍ମୁ କାଶ୍ମୀର ବିଧାନସଭାର ୯୦ ଆସନ ପାଇଁ ସେପ୍ଟେମ୍ବର ୧୮, ୨୫ ଓ ଅକ୍ଟୋବର ୧ ତିନିଟି ପର୍ଯ୍ୟାୟରେ ଭୋଟ ଗ୍ରହଣ ହେବ। ଅକ୍ଟୋବର ୪ରେ ଭୋଟ ଗଣତି ହେବ। ବିଧାନସଭା ନିର୍ବାଚନରେ କଂଗ୍ରେସ ଓ ଏନସି ମେଣ୍ଟ କରିଛନ୍ତି।
Comments are closed.