ନାଗପୁର : ମହାରାଷ୍ଟ୍ରର ଗାଡ୍ଛିରୋଲି ଜିଲାରେ ପ୍ରବାହିତ ଇନ୍ଦ୍ରାବତୀ ନଦୀରୁ ମଙ୍ଗଳବାର ସକାଳେ ଆଉ ୧୧ ମାଓବାଦୀଙ୍କ ଶବ ଉଦ୍ଧାର କରାଯାଇଛି। ଏହାକୁ ମିଶାଇ ତିନି ଦିନ ମଧ୍ୟରେ ମାଓବାଦୀଙ୍କ ମୃତ୍ୟୁସଂଖ୍ୟା ୩୩କୁ ବୃଦ୍ଧି ପାଇଛି । ନଦୀରେ ଭାସୁଥିବା ଶବଗୁଡ଼ିକ ଫୁଲି ଯାଇଛି। ତେଣୁ ରବିବାର ସୁରକ୍ଷା କର୍ମୀଙ୍କ ସହ ଗୁଳି ବିନିମୟ ବେଳେ ଖସିପଳାଇବା ଚେଷ୍ଟାରେ ଏହି ମାଓବାଦୀମାନେ ନଦୀରେ ପଶି ପ୍ରାଣ ହରାଇଥିବା ସନ୍ଦେହ କରାଯାଉଛି । ସେହିପରି ଏହି ମାଓବାଦୀମାନେ ଗୁଳି ବିନିମୟ ବେଳେ ଆହତ ହୋଇ ପରବର୍ତ୍ତୀ ସମୟରେ ପ୍ରାଣ ହରାଇଥିବା କୁହାଯାଉଛି । ଦୁଇ ଦିନ ମଧ୍ୟରେ ଦ୍ୱିତୀୟ ଥର ସୁରକ୍ଷା କର୍ମୀ ଓ ମାଓବାଦୀଙ୍କ ମଧ୍ୟରେ ଗୁଳି ବିନିମୟ ଘଟିଛି। ସୋମବାର ସୁରକ୍ଷା କର୍ମୀଙ୍କ ସହ ଗୁଳି ବିନିମୟରେ ୬ ଜଣ ମାଓବାଦୀ ପ୍ରାଣ ହରାଇଛନ୍ତି। ଗାଡ୍ଛିରୋଲି ଜିଲାରେ ସୁରକ୍ଷା କର୍ମୀ ଓ ପୁଲିସ୍ ପକ୍ଷରୁ ମିଳିତ ତଲାସୀ ଅଭିଯାନ ଜାରି ରହିଛି। ଏପଟେ ସୋମବାର ଅହେରି ତଲସିଲ ଅଧୀନ ରାଜାରାମ ଖାନଲା ଜଙ୍ଗଲରେ ସୁରକ୍ଷା କର୍ମୀଙ୍କ ସହ ଗୁଳି ବିନିମୟରେ ୬ ମାଓବାଦୀ ନିହତ ହୋଇଛନ୍ତି । ଏହା ପୂର୍ବରୁ ରବିବାର ଭାମ୍ରାଗଡ ସହର ସନ୍ନିକଟ ତାଡ୍ଗାଓଁ ଜଙ୍ଗଲରେ ସୁରକ୍ଷା କର୍ମୀଙ୍କ ଗୁଳିରେ ୧୬ ମାଓବାଦୀ ନିହତ ହୋଇଥିଲେ । ଏହି ତିନି ଘଟଣାକୁ ମିଶାଇ ତିନି ଦିନ ମଧ୍ୟରେ ସୁରକ୍ଷା କର୍ମୀଙ୍କ କାର୍ଯ୍ୟାନୁଷ୍ଠାନରେ ୩୩ ମାଓବାଦୀ ପ୍ରାଣ ହରାଇଛନ୍ତି ।
